ພິທີລົງນາມໃນກົດລະ ບຽບສົມທົບໃນການ ຄຸ້ມຄອງ,ບໍລິຫານ ເສດຖະກິດມະຫາພາກ
(ພາບ:vov)
(vovworld) - ຕອນເຊົ້າວັນທີ 1/12, ຢູ່ຮ່າໂນ້ຍ, ໄດ້ດຳເນີນພິທີລົງນາມໃນກົດລະບຽບສົມທົບໃນການຄຸ້ມຄອງ ແລະ ບໍລິຫານເສດຖະກິດມະຫາພາກ ລະຫວ່າງກະຊວງແຜນການ ແລະ ການລົງທຶນ, ກະຊວງການເງິນ, ກະຊວງອຸດສາຫະກຳ-ການຄ້າ ແລະ ທະນາຄານແຫ່ງລັດ. ທ່ານນາຍົກລັດຖະມົນ ຕີຫວຽດນາມ ຫງວຽນເຕິນຢຸງ ແລະ ບັນດາຮອງນາຍົກລັດຖະມົນຕີຫວຽດນາມ ທ່ານຫງວຽນຊວນຟຸກ, ທ່ານຮ່ວາງຈຸງຫາຍ, ທ່ານຫວູວັນນິງ, ທ່ານຫວູດຶກດາມ ແລະ ທ່ານຟ້າມບິງມິງ ໄດ້ເປັນສັກຂີພິຍານພິທີລົງນາມດັ່ງກ່າວ. ວັນທີ 6/8/2013, ທ່ານນາຍົກລັດຖະມົນຕີຫວຽດນາມ ໄດ້ປະກາດຂໍ້ຕົກລົງອະນຸມັດແຜນຮ່າງປະຕິຮູບກົນໄກການສົມທົບ, ການຄຸ້ມຄອງ ແລະ ການບໍລິຫານເສດຖະກິດມະຫາພາກ, ໃນນັ້ນມອບໃຫ້ກະຊວງແຜນການ ແລະ ລົງທຶນ ເປັນເຈົ້າພາບສົມທົບກັບກະຊວງການເງິນ, ກະຊວງອຸດສາຫະກຳ-ການຄ້າ ແລະ ທະນາຄານແຫ່ງລັດສ້າງ, ປະກາດໃຊ້ ແລະ ຈັດຕັ້ງການປະຕິບັດກົດລະບຽບໃນການຄຸ້ມຄອງບໍລິຫານເສດຖະກິດມະຫາພາກ. ນີ້ແມ່ນຂໍ້ອ້າງອີງສຳຄັນ ເພື່ອໃຫ້ບັນດາກະຊວງສົມທົບກັນຜັນຂະຫຍາຍບັນດາໜ້າທີ່ໄດ້ຮັບການມອບໝາຍ ໃນການຄຸ້ມຄອງບໍລິຫານຂົງເຂດງົບປະມານ, ເງິນຕາ, ການລົງທຶນ, ການຄ້າ ແລະ ລາຄາ.