(vovworld) – ຕອນເຊົ້າວັນທີ 18/5, ຢູ່ ຮ່າໂນ້ຍ, ຄະນະບໍລິຫານງານສູນກາງພັກກອມມູນິດ ຫວຽດນາມ, ສະພາແຫ່ງຊາດ, ປະທານປະເທດ, ລັດຖະບານ ຫວຽດນາມ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ແລະ ນະຄອນ ຮ່າໂນ້ຍ ໄດ້ຈັດຕັ້ງພິທີສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ (19/5/1890 – 19/5/2015). ເຂົ້າຮ່ວມພິທີມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢູ້ງ, ທ່ານປະທານສະພາແຫ່ງຊາດ ຫງວຽນຊິງຮູ່ງ.
ກ່າວຄຳເຫັນທີ່ພິທີ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ: ຊີວິດ ແລະ ພາລະກິດຂອງປະທານ ໂຮ່ຈີມິນ ແມ່ນບົດເພງໄຊ, ແບບຢ່າງທີ່ໄສແຈ້ງກ່ຽວກັບລັດທິຮັກຊາດ, ກ່ຽວກັບຄຸນນະທາດກອມມູນິດ, ກ່ຽວກັບພຸມປັນຍາ, ຄຸນສົມບັດສິນທຳປະຕິວັດທີ່ໄສ ແລະ ແມ່ນການລະດົມກຳລັງໃຈອັນໃຫຍ່ຫຼວງສຳລັບຊາວ ຫວຽດນາມ ລຸ້ນຕ່າງໆ. ດ້ວຍການກຳເນີດຂຶ້ນຂອງພັກກອມມູນິດ ຫວຽດນາມ ໂດຍປະທານ ໂຮ່ຈີມິນ ເປັນຜູ້ກໍ່ຕັ້ງເມື່ອປີ 1930 ພ້ອມກັບໂຄງການການເມືອງທຳອິດຂອງພັກ, ແນວທາງການປະຕິວັດ ຫວຽດນາມ ໄດ້ຮັບການສ້າງຕັ້ງ, ເສັ້ນທາງກູ້ຊາດຂອງ ຫວຽດນາມ ໄດ້ຮັບການກຳນົດໂດຍພື້ນຖານ. ພາຍໃຕ້ການນຳພາຂອງປະທານ ໂຮ່ຈີມິນ ແລະ ພັກກອມມູນິດ ຫວຽດນາມ, ການປະຕິວັດ ຫວຽດນາມ ໄດ້ຜ່ານຜ່າໄລຍະຫຍຸ້ງຍາກ, ການທ້າທາຍຫຼາຍຢ່າງເພື່ອຍາດຈາກໄຊຊະນະນີ້ຫາໄຊຊະນະອື່ນ. ທ່ານເລຂາທິການໃຫຍ່ ຫງວຽນຟູ໋ຈ້ອງ, ຊີ້ແຈ້ງວ່າ:
“ຄຸນງາມຄວາມດີຂອງປະທານ ໂຮ່ຈີມິນ ຕໍ່ປະຊາຊົນ ຫວຽດນາມ ປຽງເໝືອພູສູງ ແລະ ທະເລກ້ວາງໃຫຍ່. ປະທານ ໂຮ່ຈີມິນ ໄດ້ຜູກພັນ ແລະ ອຸທິດສ່ວນຕະຫຼອດຊີວິດຂອງຕົນໃຫ້ແກ່ພາລະກິດປະຕິບັດຂອງພັກກອມມູນິດ ຫວຽດນາມ, ປະຊາຊົນ ຫວຽດນາມ, ສຸດຈິດສຸດໃຈ, ຮັບໃຊ້ປະເທດຊາດ, ຮັບໃຊ້ປະຊາຊົນ. ຊື່ສຽງຮຽງນາມ ແລະ ພາລະກິດຂອງປະທານ ໂຮ່ຈີມິນ ຈະຝັງເລິກໃນດວງໃຈຂອງຊາວ ຫວຽດນາມ ແຕ່ລະຄົນ. ປະທານ ໂຮ່ຈີມິນ ໄດ້ປະໄວ້ໃຫ້ພວກເຮົາ ແລະ ຄົນລຸ້ນຫຼັງຊັບສົມບັດອັນລ້ຳຄ່ານັ້ນແມ່ນ: ແນວຄິດ ໂຮ່ຈີມິນ, ຍຸກສະໄໝ ໂຮ່ຈີມິນ ແລະ ແບບຢ່າງຄຸນສົມບັດ, ບຸກຄະລິກກະພາບ ໂຮ່ຈີມິນ.”
ຕອນເຊົ້າວັນທີ 18/5, ເນື່ອງໃນໂອກາດສະເຫລີມສະຫລອງ 125 ປີແຫ່ງວັນຄ້າຍວັນເກີດຂອງປະທານໂຮ່ຈິມີນ, ຢູ່ ພະນົມເປັນ, ສະມາຄົມຊາວ ກຳປູເຊຍ ເຊື້ອຊາດ ຫວຽດນາມ ຢູ່ນະຄອນຫລວງ ພະນົມເປັນ ໄດ້ຈັດຕັ້ງພິທີສະເຫລີມສະຫລອງ 125 ປີແຫ່ງວັນຄ້າຍວັນເກີດປະທານໂຮ່ຈິມີນ ໂດຍມີການເຂົ້າຮ່ວມຂອງບັນດາຜູ້ຕາງຫນ້າສະຖານທູດຫວຽດນາມ ຢູ່ ກຳປູເຈຍ, ຜູ້ຕາງຫນ້າຊາວຫວຽດນາມ ພວມຮ່ຳຮຽນ ແລະ ດຳລົງຊີວິດຢູ່ ພະນົມເປັນ. ບັນດາຜູ້ແທນເຂົ້າຮ່ວມພິທີ ໄດ້ຖະຫວາຍທູບທຽນອາໄລຫາປະທານໂຮ່ຈິມີນ ແລະ ພ້ອມກັນແບ່ງປັນບັນດາອະນຸສອນ, ຄວາມຮູ້ສຶກຂອງຊາວຫວຽດນາມ ທີ່ຫ່າງໄກກັບບ້ານເກີດເມືອງນອນທີ່ມີຕໍ່ຜູ້ນຳແສນເຄົາລົບຮັກຂອງຊາດ.