(vovworld) - Festival ມໍລະດົກ ກວາງນາມ ຄັ້ງທີ 5 ປີ 2013, ດ້ວຍຫົວຂໍ້ວ່າ “ມໍລະດົກວັດທະນະທຳຫວຽດນາມ - ອາຊຽນ”, ໄດ້ຖືກໄຂຂຶ້ນຢ່າງເປັນທາງການໃນຕອນຄໍ່າວັນທີ 22/06, ຢູ່ນະຄອນໂຮ້ຍອານ, ແຂວງກວາງນາມ. ນີ້ແມ່ນເຫດການ ວັດທະນະທຳສຳຄັນເພື່ອສະເຫຼີມສະຫຼອງ 10 ປີແຫ່ງວັນຫວຽດນາມປະຕິບັດສັນທິສັນຍາຂອງອົງການສຶກສາວິທະຍາສາດ ແລະ ວັດທະນະທຳສະຫະປະຊາຊາດ (UNESCO) ກ່ຽວກັບການອະນຸລັກຮັກສາມໍລະດົກບໍ່ມີຮູບຮ່າງ. Festival ແມ່ນໂອກາດເພື່ອໃຫ້ແຂວງກວາງນາມ, ຫວຽດນາມ ແລະ UNESCO ເພີ່ມທະວີການຮ່ວມມື, ຄວາມໄວ້ເນື້ອເຊື່ອໃຈໃນການອະນຸລັກຮັກສາ ແລະ ເສີມຂະຫຍາຍບັນດາມໍລະດົກວັດທະນະທຳມີຮູບຮ່າງ ແລະ ບໍ່ມີຮູບຮ່າງຂອງບັນດາປະຊາຊາດໃນກຸ່ມອາຊຽນກ່ວາອີກ. ທ່ານຮອງນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ເຂົ້າຮ່ວມງານ Festival ແລະ ຢືນຢັນວ່າ.
“ໃນຊຸມປີຜ່ານມາ, ພັກ, ລັດຫວຽດນາມ ໄດ້ຖືການປົກປັກຮັກສາ ແລະ ເສີມຂະຫຍາຍຄຸນຄ່າບັນດາມໍລະດົກວັດທະນະທຳເປັນສຳຄັນ. ທ່ານນາຍົກລັດຖະມົນຕີໄດ້ຮັບຮອງເອົາແຜນສັງລວມບັນດາມໍລະດົກວັດທະນະທຳທີ່ UNESCO ເຊີດຊູ ເພື່ອໃຫ້ບັນດາທ້ອງຖິ່ນເປັນເຈົ້າການຜັນຂະຫຍາຍການຄົ້ນຄວ້າປະຫວັດສາດເດີມ, ອະນຸລັກຮັກສາ, ບູລະນະປະຕິສັງຂອນ ແລະ ເສີມຂະຫຍາຍບັນດາຄຸນຄ່າວັດທະນະທຳ, ພ້ອມທັງກໍມີນະໂຍບາຍ, ມາດຕະການຢ່າງລະອຽດເພື່ອແນໃສ່ເສີມຂະຫຍາຍການເຂົ້າຮ່ວມຂອງປະຊາຊົນເປັນຈຳນວນຫຼວງຫຼາຍ ແລະ ອົງການຈັດຕັ້ງທັງຢູ່ພາຍໃນ ແລະ ຕ່າງປະເທດ. ພວກເຮົາປາດຖະໜາວ່າ ຜ່ານບັນດາການເຄື່ອນໄຫວໃນ Festival ຄັ້ງນີ້, ປະຊາຊົນຫວຽດນາມ ແລະ ປະຊາຄົມບັນດາປະເທດອາຊຽນ ຈະມີສຽງເວົ້າລວມ, ຄວາມເປັນເອກະພາບລວມ ໃນການເຄື່ອນໄຫວຮັບໃຊ້ວຽກງານປົກປັກຮັກສາ ແລະ ເສີມຂະຫຍາຍບັນດາມໍລະດົກ”.
ກ່າວຄຳເຫັນທີ່ພິທີໄຂ, ທ່ານນາງ Irina Bokova ຫົວໜ້າ UNESCO ເນັ້ນໜັກວ່າ.
“ນີ້ແມ່ນຈຸດເວລາທີ່ສຳຄັນຍິ່ງນັບທັງຫວຽດນາມ ແລະ UNESCO, ນີ້ກໍ່ແມ່ນຈຸດເວລາທີ່ສຳຄັນສຳລັບວັດທະນະທຳ. ຫວຽດນາມ ໄດ້ພິສູດໃຫ້ເຫັນວ່າວັດທະນະທຳໂດຍກຳລັງແຮງສ້າງຂຶ້ນ ແລະ ປະກອບສ່ວນຊຸກຍູ້ໃຫ້ແກ່ການພັດທະນາຢ່າງໝັ້ນຄົງ. ບັນດາບົດຮຽນຂອງຫວຽດນາມ ຕ້ອງໄດ້ແບ່ງປັນກັບບັນດາປະເທດອື່ນ”.