(vovworld) – ທີ່ການຕ້ອນຮັບເຊິ່ງຈັດຂຶ້ນໃນຕອນບ່າຍວັນທີ 18/6, ຢູ່ ຮ່າໂນ້ຍ, ເນື່ອງໃນໂອກາດຄະນະພະນັກງານກະຊວງປ້ອງກັນປະເທດ ອິນເດຍ, ໂດຍຫົວໜ້າກົມຮ່ວມມືສາກົນ ກະຊວງປ້ອງກັນປະເທດ ສ. ອິນເດຍ ທ່ານນາງ Smita Nagaraj ເປັນຫົວໜ້າຄະນະ ມາຢ້ຽມຢາມ ຫວຽດນາມ ເຂົ້າຮ່ວມກອງປະຊຸມກຸ່ມຮ່ວມມືປ້ອງກັນຊາດ ຫວຽດນາມ - ອິນເດຍ ຄັ້ງທີ 2.
ທ່ານຮອງລັດຖະມົນຕີການຊວງປ້ອງກັນປະເທດ ຫວຽດນາມ, ພົນໂທ ຫງວຽນຈີ໋ວີ້ງ ເນັ້ນໜັກວ່າ: ການພົວພັນຮ່ວມມືດ້ານປ້ອງກັນຊາດລະຫວ່າງ 2 ປະເທດ ພວມພັດທະນາຢ່າງດີງາມຖືກຕ້ອງຕາມຂໍ້ຕົກລົງທີ່ການໂອ້ລົມສົນທະນາປ້ອງກັນຊາດ ຫວຽດນາມ - ອິນເດຍ ປີ 2013, ໃນນັ້ນ, ການຮ່ວມມືກອງທັບທະຫານອາກາດ ແລະ ກອງທັບເຮືອແມ່ນຂົງເຂດຮ່ວມມືດີເດັ່ນໃນການຮ່ວມມືປ້ອງກັນຊາດລະຫວ່າງ 2 ປະເທດ. ພົນໂທ ຫງວຽນຈີ໋ວີ້ງ ເຊື່ອໝັ້ນວ່າ: ໃນໄລຍະຈະມາເຖິງ, ຈະເພີ່ມທະວີການຮ່ວມມືຢ່າງແໜ້ນແຟ້ນໃນບັນດາຂົງເຂດນີ້ກ່ວາອີກ ເພື່ອມຸ່ງໄປເຖິງການຮ່ວມມືກ່ຽວກັບອຸດສາຫະກຳປ້ອງກັນຊາດ. ສ່ວນທ່ານນາງ Smita Nagaraj ໃຫ້ຮູ້ວ່າ: ອິນເດຍຈະມີແຜນການຮ່ວມມື ແລະ ໜູນຊ່ວຍລະອຽດໃຫ້ກະຊວງປ້ອງກັນປະເທດ ຫວຽດນາມ ຜັນຂະຫຍາຍ, ສ້າງມະຫາວິທະຍາໄລສື່ສານເປັນທັນສະໄໝ. ໃນການຮ່ວມມືອຸດສາຫະກຳປ້ອງກັນຊາດ, ທ່ານນາງ Smita Nagaraj ໃຫ້ຮູ້ວ່າ: ອິນເດຍພວມມີແຜນການຜັນຂະຫຍາຍການຕໍກຳປັ່ນລາດຕາເວນຄວາມໄວສູງ ໃຫ້ ຫວຽດນາມ, ອິນເດຍ ແລະ ຫວຽດນາມ ຈະຮ່ວມມືຜະລິດບັນດາພາຫະນະອຸປະກອນການທະຫານ, ສະໜອງໃຫ້ຕະຫຼາດ 2 ປະເທດ ແລະ ໃນພາກພື້ນ ອາຊີຕາເວັນອອກ, ພ້ອມທັງສະໜອງໃຫ້ ຫວຽດນາມ ບາງກິດຈະກຳຍ່ອຍໃນຂົງເຂດອຸດສາຫະກຳປ້ອງກັນຊາດ ເຊິ່ງ ຫວຽດນາມ ມີຄວາມຕ້ອງການ.