(vovworld) - ວັນທີ 12/9, ພະບາດສົມເດັດພະເຈົ້າມະຫາຊີວິດ ກຳປູເຈຍ Norodom Sihamoni, ໄດ້ອອກພະລາຊະດຳລັດຮຽກຕົວການນຳພັກກຳອຳນາດກຳປູເຈຍ (CPP) ແລະ ພັກຝ່າຍຄ້ານ CNRP ມາໂຮມປະຊຸມຢູ່ວັງ Khmemara ຢູ່ ພະລາດຊະວັງ ໃນວັນທີ 14/9 ເພື່ອແກ້ໄຂບັນດາການຖົກຖຽງກັນພາຍຫຼັງການເລືອກຕັ້ງສະພາແຫ່ງຊາດໃນທ້າຍເດືອນ 7 ຜ່ານມາ. ເພື່ອ ໂຕ້ຕອບຄຳເຊີນຂອງພະບາດສົມເດັດ, ທ່ານນາຍົກລັດຖະມົນຕີ Hunsen ໃຫ້ຮູ້ວ່າ ຈະເຂົ້າຮ່ວມກອງປະຊຸມ. ປະຈຸບັນ, CNRP ບໍ່ທັນມີປະຕິກິລິຍາກ່ຽວກັບຄຳເຊີນຂອງພະບາດສົມເດັດເທື່ອ.
ທ້າຍອາທິດຜ່ານມາ, ຄະນະກຳມະການເລືອກຕັ້ງແຫ່ງຊາດ ກຳປູເຈຍ (NEC) ໄດ້ປະກາດໝາກຜົນເປັນທາງການຂອງການເລືອກຕັ້ງສະພາແຫ່ງຊາດຊຸດທີ 5 ເມື່ອວັນທີ 28/7. ຕາມນັ້ນແລ້ວ, ພັກ CPP ກຳອຳນາດຍາດໄດ້ 68 ທີ່ນັ່ງໃນຈຳນວນ 123 ທີ່ນັ່ງ ແລະ ພັກ CNRP ຍາດໄດ້ 55 ທີ່ນັ່ງຍັງເຫຼືອ. ແຕ່ເຖິງຢ່າງໃດກໍ່ຕາມ, ພັກ CNRP ສືບຕໍ່ປະຕິເສດໝາກຜົນນີ້ ແລະ ນາບຂູ່ຈະສືບຕໍ່ແຫ່ຂະບວນປະທ້ວງໃນທົ່ວປະເທດເພື່ອກໍ່ຄວາມດັ່ນໃຫ້ແກ່ບັນດາຄຳຮຽກຮ້ອງຂອງເຂົາເຈົ້າ.
ກ່ຽວຂ້ອງເຖິງສະພາບການຢູ່ ກຳປູເຈຍ ຍັງມີຂ່າວວ່າ ຕອນເຊົ້າວັນທີ 13/9, ບັນດາອົງການທີ່ມີໜ້າທີ່ຮັບຜິດຊອບໄດ້ຄົ້ນພົບ ແລະ ທຳລາຍວັດຖຸລະເບີດ ແລະ ລູກລະເບີດຜະລິດເອງ ຈຳນວນໜຶ່ງຢູ່ສະຖານທີ່ 2 ແຫ່ງໃນນະຄອນຫຼວງ ພະນົມເປັນ. ຕາມແຫຼ່ງຂ່າວໃນເບື້ອງຕົ້ນແລ້ວ, ບັນດາວັດຖຸລະເບີດນີ້ຖືກຫ້າງໄວ້ຢູ່ຕໍ່ໜ້າສຳນັກງານສະພາແຫ່ງຊາດ ແລະ ໃກ້ກັບສວນສາທາລະນະເສລີ, ບ່ອນທີ່ຝ່າຍຄ້ານພວມມີແຜນການແຫ່ຂະບວນປະທ້ວງຂະໜາດໃຫຍ່ເປັນ 3 ວັນຢ່າງຕໍ່ເນື່ອງໃນທ້າຍອາທິດນີ້ ແລະ ຕົ້ນອາທິດໜ້າ.