(vovworld) – ໃນຂອບເຂດການຢ້ຽມຢາມທາງລັດຖະກິດ ລາຊະອານາຈັກ ແດນມາກ, ຕອນຄຳ່ວັນທີ 18/9, ຕາມເວລາ Copenhagen, ພະລາຊິນີ Margerthe 2 ແລະ ພະເດັດເຈົ້າ ໄດ້ຈັດຕັ້ງງານລ້ຽງທ່ານປະທານປະເທດ ຫວຽດນາມ ເຈືອງເຕີນຊາງ ແລະ ພັນລະຍາ ພ້ອມດ້ວຍຄະນະຜູ້ແທນຂັ້ນສູງ ຫວຽດນາມ, ທີ່ວັງ Fredensborg. ກ່າວຄຳເຫັນທີ່ພິທີ, ການນຳ 2 ທ່ານໄດ້ເນັ້ນໜັກນ້ຳໃຈມິດຕະພາບ ຫວຽດນາມ - ແດນມາກ ທີ່ໄດ້ຮັບການເພີ່ມພູນຄຸນສ້າງມາເປັນເວລາ 40 ປີ ແລະ ໃຫ້ຄຳໝັ້ນສັນຍານຳການພົວພັນລະຫວ່າງ 2 ປະເທດຂຶ້ນສູ່ລະດັບສູງໃໝ່, ມຸ່ງໄປເຖິງການພົວພັນຄູ່ຮ່ວມມືຮອບດ້ານເພື່ອຜົນປະໂຫຍດຂອງປະຊາຊົນ 2 ປະເທດ ຫວຽດນາມ - ແດນມາກ. ພະລາຊິນີ Margerthe ຢັ້ງຢືນວ່າ: ປະຈຸບັນ, ໃນສະພາບການໃໝ່, ແດນມາກ ຍັງຄົງສືບຕໍ່ຮ່ວມເດີນທາງພ້ອມກັບ ຫວຽດນາມ ບໍ່ພຽງແຕ່ຍ້ອນນ້ຳໃຈມິດຕະພາບເທົ່ານັ້ນ ຫາກຍັງແມ່ນເພື່ອ ຫວຽດນາມ ພວມນັບມື້ນັບພັດທະນາ, ຢັ້ງຢືນທີ່ຕັ້ງບົດບາດຂອງຕົນໃນພາກພື້ນ ແລະ ໃນໂລກ, ລັດຖະບານ ແລະ ປະຊາຄົມວິສາຫະກິດ ແດນມາກ ຍາມໃດກໍ່ເອົາໃຈໃສ່ ແລະ ປາດຖະໜາຢາກຊຸກຍູ້ການພົວພັນຮ່ວມມືກັບ ຫວຽດນາມ ໃນທຸກຂົງເຂດ, ເຊິ່ງຈຸດສຸມແມ່ນການຮ່ວມມືເພື່ອພັດທະນາແບບຍືນຍົງ. ພະລາຊິນີ Margerthe ຖືວ່າ: ເລື່ອງ 2 ຝ່າຍມຸ່ງໄປເຖິງການພົວພັນຄູ່ຮ່ວມມືຮອບດ້ານໂດຍໄວຈະເປີດກາລະໂອກາດໃໝ່ໃນການພົວພັນລະຫວ່າງ 2 ປະເທດ.
ສ່ວນທ່ານປະທານປະເທດ ຫວຽດນາມ ເຈືອງເຕີນຊາງ ສະແດງຄວາມເປັນກຽດທີ່ເປັນປະທານປະເທດຜູ້ທຳອິດຂອງ ຫວຽດນາມ ມາຢ້ຽມຢາມ ວາຊະອານາຈັກ ແດນມາກ. ທ່ານປະທານປະເທດ ເນັ້ນໜັກວ່າ: 40 ປີຜ່ານມາ, ການພົວພັນ ຫວຽດນາມ - ແດນມາກ ນັບມື້ນັບສະແດງໃຫ້ເຫັນພະລັງຊີວິດທີ່ໝັ້ນຄົງ ແລະ ແຂງແຮງ, ເປີດກ້ວາງ ແລະ ພັດທະນາຮອບດ້ານໃນທຸກຂົງເຂດຢ່າງບໍ່ຢຸດຢັ້ງ. ການຢ້ຽມຢາມ ແລະ ການພົບປະຂອງການນຳຂັ້ນສູງລະຫວ່າງ 2 ປະເທດກໍ່ຟົດຟື້ນ, ບັນດາວິສາຫະກິດອັນດັບໜຶ່ງຂອງແດນມາກ ກໍ່ເຂົ້າມາລົງທຶນຢູ່ ຫວຽດນາມ ນັບມື້ນັບຫຼາຍ... ນີ້ແມ່ນພະຍານຫຼັກຖານຢ່າງມີຊີວິດຊີວາທີ່ສຸດໃຫ້ແກ່ການພົວພັນທີ່ເຕັມໄປດ້ວຍພະລັງຊີວິດຂອງ 2 ປະເທດ ຫວຽດນາມ - ແດນມາກ. ນີ້ແມ່ນພື້ນຖານສຳຄັນທີ່ສຸດເພື່ອໃຫ້ 2 ປະເທດຍົກລະດັບການພົວພັນ 2 ຝ່າຍຂຶ້ນເປັນຄູ່ຮ່ວມມືຮອບດ້ານ.
ກ່ອນໜ້ານັ້ນ, ຕອນບ່າຍວັນທີ 18/9 ຕາມເວລາ Copenhagen, ທ່ານປະທານປະເທດ ເຈືອງເຕີນຊາງ ແລະ ພັນລະຍາ ໄດ້ມາຢ້ຽມຢາມແລະ ໂອ້ລົມກັບພະນັກງານ, ລັດຖະກອນສະຖານທູດ ຫວຽດນາມ ແລະ ຜູ້ຕາງໜ້າປະຊາຄົມຊາວ ຫວຽດນາມ ພວມດຳລົງຊີວິດ ແລະ ຮຳ່ຮຽນຢູ່ ແດນມາກ.