"I, Daniel Blake" ເປີດສາກງານມະໂຫລານຮູບເງົາສາກົນ
ຮ່າໂນ້ຍຄັ້ງທີ4
|
(vovworld)- ດ້ວຍຫົວຂໍ້: “ຮູບເງົາ - ການເຊື່ອມໂຍງ ແລະ ພັດທະນາແບບຍືນຍົງ” ງານມະໂຫລານຮູບເງົາສາກົນຮ່າໂນ້ຍຄັ້ງທີ4 ໂດຍກົມຮູບເງົາ, ກະຊວງວັດທະນະທຳ ກິລາ ແລະ ທ່ອງທ່ຽວ ສົມທົບກັນຈັດຕັ້ງ ໄດ້ໄຂຂຶ້ນໃນຕອນຄ່ຳວັນທີ 1/11 ຢູ່ ຮ່າໂນ້ຍ. ມີຜູ້ແທນກວ່າ 1000 ຄົນ ຊື່ງແມ່ນບັນດານັກສະແດງ, ນັກຜະລິດຮູບເງົາ, ການຄຸ້ມຄອງຮູບເງົາຢູ່ພາຍໃນປະເທດ ແລະ ສາກົນໄດ້ເຂົ້າຮ່ວມງານມະໂຫລານດັ່ງກ່າວ. ໂດຍດຳເນີນໃນເວລາ 5 ວັນ, ງານມະໂຫລານຮູບເງົາສາກົນຮ່າໂນ້ຍຄັ້ງທີ4 ຈະແນະນຳໃຫ້ຜູ້ຊົມຫວຽດນາມ ຮູບເງົາ 146 ເລື່ອງ ຂອງ 43 ປະເທດ ແລະ ເຂດແຄ້ວນ. ບັນດາຮູບເງົານີ້ມີເນື້ອໃນອຸດົມສົມບູນ, ຫລາຍຮູບຫລາຍແບບກ່ຽວກັບປະເພດ ຈາກຮູບເງົາເລື່ອງຍາວ, ຟີມເອກະສານຕະຫລອດຮອດເລື່ອງກະຕຸນຂອງບັນດາພື້ນຖານຮູບເງົາທີ່ກ້າວກນ້າຄື: ອາເມລິກາ, ອັງກິດ, ຝລັ່ງ, ອິນເດຍ, ຍີ່ປຸ່ນ. ໃນນັ້ນ ຫວຽດນາມມີຮູບເງົາ 2 ເລື່ອງ ຄື “ຂ້ອຍເຫັນດອກໄມ້ສີເຫລືອງຢູ່ທົ່ງຫຍ້າສີຂຽວ” ແລະ “ຖືກຫວຍ” ພ້ອມກັບຮູບເງົາເລື່ອງສັ້ນ 10 ເລື່ອງ ແລະ ຮູບເງົາປະເພດອື່ນ 17 ເລື່ອງ. ທ່ານ ເວືອງຢູຍບຽນ, ຮອງລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ໃຫ້ຮູ້ວ່າ:
“ພ້ອມກັບເລື່ອງເປີດກວ້າງເປົ້າໝາຍເຂົ້າຮ່ວມການແຂ່ງຂັນ, ງານມະໂຫລານຮູບເງົາສາກົນຮ່າໂນ້ຍຄັ້ງທີ4 ແມ່ນໂອກາດເພື່ອໃຫ້ບັນດານັກສິລະປິນຢູ່ພາຍໃນປະເທດ ແລະ ສາກົນ ໄດ້ພົວພັນແລກປ່ຽນເຊິ່ງກັນ ແລະກັນ. ງານມະໂຫລານຮູບເງົາສາກົນຮ່າໂນ້ຍຄັ້ງທີ4 ກໍແມ່ນໂອກາດເພື່ອແນະນຳກ່ຽວກັບນະຄອນຫລວງ ຮ່າໂນ້ຍ, ຊື່ງແມ່ນນະຄອນຫລວງແຫ່ງອະລິຍະທຳນັບພັນປີ, ຍາມໃດກໍຍິນດີຕ້ອນຮັບບັນດານັກທ່ອງທ່ຽວມາຢ້ຽມຢາມຮ່າໂນ້ຍ.”