( vovworld ) - ຕອນຄໍ່າວັນທີ 28/7, ຢູ່ນະຄອນຫຼວງວຽງຈັນ, ໄດ້ດຳເນີນພິທີມອບລາງວັນ “ວິສາຫະກິດດີເດັ່ນອາຊຽນ”, “ເຄື່ອງໝາຍການຄ້າທີ່ມີຊື່ສຽງອາຊຽນ”, ລາງວັນ “ປັນຍານັກທຸລະກິດໄລຍະເຊື່ອມໂຍງ” ຫວຽດນາມ, ລາວ, ກຳປູເຈຍ ປີ 2012 ໃຫ້ແກ່ບັນດາວິສາຫະກິດ ແລະ ນັກທຸລະກິດບັນດາປະເທດອາຊຽນ. ພິທີມອບລາງວັນໂດຍກະຊວງອຸດສາຫະກຳການຄ້າລາວ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ, ກະຊວງອຸດສາຫະກຳການຄ້າ ແລະ ກະຊວງແຜນການ ແລະ ການລົງທຶນຫວຽດນາມ; ສະຫະສະມາຄົມວິສາຫະກິດຂະໜາດກາງ ແລະ ນ້ອຍຫວຽດນາມ; ສະຫະພັນສະຫະກອນຫວຽດນາມ ສົມທົບກັນຈັດຕັ້ງ. ໃນຈົດໝາຍອວຍພອນບັນດາວິສາຫະກິດ ແລະ ນັກທຸລະກິດທີ່ດີເດັ່ນທີ່ໄດ້ຮັບລາງວັນໃນຄັ້ງນີ້, ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ຢືນຢັນວ່າ ນີ້ແມ່ນເຫດການທີ່ມີຄວາມໝາຍພິເສດ, ປະກອບສ່ວນຊຸກຍູ້ຄວາມສາມັກຄີມິດຕະພາບ ແລະ ວິວັດການເຊື່ອມໂຍງຂອງບັນດາປະເທດໃນພາກພື້ນກັບເສດຖະກິດໂລກ; ຖືນີ້ແມ່ນຮູບການທີ່ເໝາະສົມ, ປະກອບສ່ວນໂຄສະນາ, ພົບປະແລກປ່ຽນບົດຮຽນ ແລະ ລະດົມກຳລັງໃຈຍ້ອງຍໍ ແລະ ມອບລາງວັນໃຫ້ບັນດານັກທຸລະກິດ, ວິສາຫະກິດ, ຊຸກຍູ້ການພັດທະນາເສດຖະກິດ ແລະ ຫວັງວ່າ ບັນດານັກທຸລະກິດ, ວິສາຫະກິດທີ່ໄດ້ຮັບລາງວັນໃນຄັ້ງນີ້ ຈົ່ງເປີດກວ້າງການເຄື່ອນໄຫວຂອງຕົນໄປທົ່ວພາກພື້ນ, ສ້າງປະສິດທິຜົນເສດຖະກິດສູງ, ປະກອບສ່ວນຊຸກຍູ້ການຮ່ວມມື ແລະ ນ້ຳໃຈມິດຕະພາບລະຫວ່າງບັນດາປະເທດ. ມີ 86 ລາງວັນທີ່ໄດ້ມອບໃຫ້ບັນດາວິສາຫະກິດ ແລະ ນັກທຸລະກິດດີເດັ່ນມີຈິດໃຈກ້າຄິດກ້າທຳ, ອອກແຮງງານຢ່າງມີຫົວຄິດປະດິດສ້າງ, ມີຄຸນນະພາບ ແລະ ມີປະສິດທິຜົນສູງ, ເຂົ້າຮ່ວມບັນດາການເຄື່ອນໄຫວດ້ານສັງຄົມຢ່າງຕັ້ງໜ້າ, ມີໃຈບຸນໃຈກຸສົນຊຸກຍູ້ຄວາມສາມັກຄີ, ມິດຕະພາບ ແລະ ວິວັດການຊື່ອມໂຍງຂອງບັນດາປະເທດໃນພາກພື້ນກັບເສດຖະກິດໂລກ.