ປະທານປະເທດ ຫວຽດນາມ ເຈືອງເຕີນຊາງ ແລະ ລັດຖະມົນຕີກະຊວງປ້ອງກັນປະເທດ ລັດເຊຍ
(ພາບ:Nguyễn Khang/TTXVN)
(vovworld) - ໃນການຕ້ອນຮັບທ່ານພົນເອກ, ລັດຖະມົນຕີກະຊວງປ້ອງກັນປະເທດ ລັດເຊຍ Sergie Shoigu ແລະ ຄະນະຜູ້ແທນການທະຫານຂັ້ນສູງສະຫະພັນ ລັດເຊຍ ໃນຕອນເຊົ້າວັນທີ 5/3 ຢູ່ ຮ່າໂນ້ຍ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ຊົມເຊີຍທ່ານພົນເອກ Sergie Shoigu ພາຍຫຼັງດຳລົງຕຳແໜ່ງໃໝ່ ໄດ້ມາຢ້ຽມຢາມ ຫວຽດນາມ, ພ້ອມທັງຕີລາຄາສູງໝາກຜົນຂອງການເຈລະຈາ ລະຫວ່າງ ລັດຖະມົນຕີກະຊວງປ້ອງກັນປະເທດ ຫວຽດນາມ ຟຸ່ງກວາງແທງ ແລະ ລັດຖະມົນຕີກະຊວງປ້ອງກັນປະເທດ ລັດເຊຍ Sergie Shoigu ແລະ ເຊື່ອໝັ້ນວ່າ: ໝາກຜົນຂອງການຢ້ຽມຢາມຂອງທ່ານ ລັດຖະມົນຕີກະຊວງປ້ອງກັນປະເທດ ລັດເຊຍ ຢູ່ ຫວຽດນາມ ຄັ້ງນີ້ ຈະປະກອບສ່ວນຢ່າງແທດຈິງເຂົ້າໃນການຊຸກຍູ້ການພົວພັນຮ່ວມມືຫຼາຍດ້ານລະຫວ່າງ 2 ປະເທດ. ຢັ້ງຢືນ ຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນເພື່ອພ້ອມກັບສະຫະພັນ ລັດເຊຍ ສືບຕໍ່ນຳການພົວພັນລະຫວ່າງ 2 ປະເທດ ນັບມື້ນັບພັດທະນາເລິກເຊິ່ງ, ກ້ວາງຂວາງ, ມີປະສິດທິຜົນໃນບັນດາຂົງເຂດ, ໃນນັ້ນມີຂົງເຂດປ້ອງກັນຊາດ, ທ່ານປະທານປະເທດ ເຈືອງເຕີນຊາງ ຫວັງວ່າ: ໃນຖະນາຕຳແໜ່ງໃໝ່, ລັດຖະມົນຕີກະຊວງປ້ອງກັນປະເທດ Sergie Shoigu ຈະປະກອບສ່ວນເພີ່ມທະວີການພົວພັນຮ່ວມມືດ້ານປ້ອງກັນຊາດລະຫວ່າງ 2 ປະເທດ ສືບຕໍ່ພັດທະນາ ແລະ ຮັກສາຢູ່ລະດັບສູງ, ເມື່ອມີບັນດາຄະນະຜູ້ແທນຂອງ ຫວຽດນາມ ໄປຍັງ ສະຫະພັນ ລັດເຊຍ ແລະ ບັນດາຄະນະຜູ້ແທນຂອງ ສະຫະພັນ ລັດເຊຍ ມາຍັງ ຫວຽດນນາມ, ລ້ວນແຕ່ສະຫງວນບັນດານ້ຳໃຈທີ່ດີງາມໃຫ້ກັນ.
ລັດຖະມົນຕີກະຊວງປ້ອງກັນປະເທດ ລັດເຊຍ Sergie Shoigu ຢັ້ງຢືນວ່າ: ໃນຖານະເປັນລັດຖະມົນຕີກະຊວງປ້ອງກັນປະເທດ ຈະເຮັດຈົດສຸດຄວາມສາມາດຂອງຕົນເພື່ອປະຕິບັດບັນດາຂໍ້ຕົກລົງກ່ຽວກັບການຮ່ວມມືດ້ານການທະຫານ ແລະ ເຕັກນິກການທະຫານເຊິ່ງ 2 ຝ່າຍໄດ້ເປັນເອກະພາບກັນຢ່າງມີປະສິດທິຜົນ.
ກ່ອນໜ້ານັ້ນ, ໃນຕອນເຊົ້າວັນດຽວກັນ, ໃນການເຈລະຈາລະຫວ່າງ ລັດຖະມົນຕີກະຊວງປ້ອງກັນປະເທດຂອງ 2 ປະເທດ, 2 ຝ່າຍໄດ້ປຶກສາຫາລືບາງບັນຫາທີ່ກ່ຽວຂ້ອງເຖິງສະຖານະການໂລກ, ພາກພື້ນ ແລະ ແຕ່ລະປະເທດ, ໝາກຜົນແຫ່ງການຮ່ວມມືລະຫວ່າງ 2 ກະຊວງປ້ອງກັນປະເທດໃນໄລຍະທີ່ຜ່ານມາ. ກ່ຽວກັບທິດທາງການຮ່ວມມື ດ້ານການປ້ອງກັນຊາດໃນໄລຍະທີ່ຈະເຖິງ, ທ່ານລັດຖະມົນຕີກະຊວງປ້ອງກັນປະເທດທັງ 2 ໄດ້ເປັນເອກະພາບກັນເພີ່ມທະວີການພົບປະແລກປ່ຽນ, ຍົກອອກການກຳນົດທິດລະອຽດ, ແນໃສ່ຊຸກຍູ້ການພົວພັນດ້ານປ້ອງກັນຊາດລະຫວ່າງຫວຽດນາມ-ລັດເຊຍໃຫ້ຂຶ້ນສູ່ລະດັບສູງໃໝ່, ມີປະສິດທິຜົນ, ແທດຈິງ, ສອດຄ່ອງກັບການພົວພັນມິດຕະພາບທີ່ເປັນມູນເຊື້ອ ແລະ ທຽບເທົ່າກັບລະດັບການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ. ທ່ານລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ ເນັ້ນໜັກວ່າ :
“ 2 ຝ່າຍໄດ້ເປັນເອກະສັນກັນ ເພີ່ມທະວີການແລກປ່ຽນຄະນະຜູ້ແທນກອງທັບຂັ້ນຕ່າງໆຂອງ 2 ປະເທດ, ຊອກຮູ້ກາລະໂອກາດຮ່ວມມື, ແລກປ່ຽນບົດຮຽນໃນການກໍ່ສ້າງກອງທັບ, ຄຸ້ມຄອງລັດດ້ານປ້ອງກັນຊາດ. 2 ຝ່າຍເປັນເອກະສັນກັນຮ່ວມມືກໍ່ສ້າງພະນັກງານ, ພາລະກອນເຕັກນິກກອງທັບຂອງຫວຽດນາມຢູ່ລັດເຊຍ. ຫວຽດນາມຈະສືບຕໍ່ຊື້ອາວຸດຍຸດທະພັນຈາກລັດເຊຍ. ບັນດາເຫຼົ່າທັບຂອງຫວຽດນາມຈະຮ່ວມມື 2 ຝ່າຍກັບລັດເຊຍເພື່ອຮັບປະກັນຜົນປະໂຫຍດຂອງແຕ່ລະຝ່າຍ.