(ພາບ:ອິນເຕີແນັດ)
(VOV)- ຕອນບ່າຍວັນທີ 6/10, ວາລະປະຊຸມຄັ້ງທີ 12 ຄະນະປະຈຳສະພາແຫ່ງຊາດຫວຽດນາມ ສືບຕໍ່ລາຍການເຮັດວຽກດ້ວຍເນື້ອໃນຕົ້ນຕໍຄື: ໃຫ້ຄຳເຫັນໃນບົດຍື່ນສະເໜີຕໍ່ສະພາແຫ່ງຊາດກ່ຽວກັບຂັ້ນຕອນ, ລະບຽບການ, ວິທີເອົາບັດໄວ້ວາງໃຈ, ປ່ອນບັດໄວ້ວາງໃຈສຳລັບຜູ້ດຳລົງຕຳແໜ່ງໂດຍສະພາແຫ່ງຊາດ, ສະພາປະຊາຊົນເລືອກຕັ້ງຫຼືໃຫ້ສັດຕະຍາບັນ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ເປັນປະທານວາລະປະຊຸມ. ຄຳເຫັນຂອງຫຼາຍທ່ານສະເໜີຕ້ອງກຳນົດ ແລະ ແບ່ງຂັ້ນສິດອຳນາດການປະຕິບັດເລື່ອງເອົາບັດໄວ້ວາງໃຈໃຫ້ທັງສະພາຊົນເຜົ່າ, ບັນດາກຳມາທິການຂອງສະພາແຫ່ງຊາດ ແລະ ບັນດາຄະນະຂອງສະພາປະຊາຊົນ ເພື່ອແນ່ໃສ່ຮັບປະກັນລັກສະນະເປັນໄປໄດ້ຂອງຂໍ້ກຳນົດດັ່ງກ່າວ, ສ້າງເງື່ອນໄຂສະດວກເພື່ອໃຫ້ການເອົາບັດໄວ້ວາງໃຈໄດ້ຮັບການສຸມໃສ່, ຫຼີກເວັ້ນການກະແຈກກະຈາຍ ແລະ ມີລັກສະນະເປັນຮູບການ. ປະກອບຄຳເຫັນເຂົ້າໃນເນື້ອໃນດັ່ງກ່າວ, ປະທານສະພາແຫ່ງຊາດຫວຽດນາມ Nguyen Sinh Hung ຖືວ່າ:
“ຖ້າຫາກໄດ້ເລືອກຕັ້ງ ແລະ ໃຫ້ສັດຕະຍາບັນແລ້ວ ກໍ່ລ້ວນແຕ່ຕ້ອງເອົາບັດໄວ້ວາງໃຈເພື່ອຕິດຕາມກວດກາວ່າ ຜູ້ໄດ້ຮັບການເລືອກຕັ້ງ ຫຼືໃຫ້ສັດຕະຍາບັນຈາກສະພາປະຊາຊົນດັ່ງກ່າວໄດ້ປະຕິບັດໜ້າທີ່ສຳເລັດຫຼືບໍ່. ແຕ່ລະປີຕ້ອງເອົາບັດໄວ້ວາງໃຈ. ພວກຂ້າພະເຈົ້າໄດ້ແກ້ໄຂຕາມເນື້ອໃນຈິດໃຈແມ່ນດຳເນີນການເອົາບັດໄວ້ວາງໃຈເທົ່ານັ້ນ, ສ່ວນການປ່ອນບັດມອບໃຫ້ຄະນະກຳມະການ ແລະ ສະພາປະຊາຊົນເຮັດ“