ທ່ານ ຫງວຽນແທງຟອງ ຕ້ອນຮັບທ່ານ Denny Doyle
(ພາບ: TTXVN)
(vovworld) - ຕອນບ່າຍວັນທີ 17/11, ທ່ານ ຫງວຽນແທງຟອງ, ປະທານຄະນະກຳມະການປະຊາຊົນນະຄອນ ໂຮ່ຈີມິນ ຕ້ອນຮັບທ່ານ Denny Doyle ເຈົ້າຄອງນະຄອນ Beaverton ລັດ Oregon ອາເມລິກາ ທີ່ນຳໜ້າຄະນະຜູ້ແທນວິສາຫະກິດຂຶ້ນກັບອົງການພັນທະມິດດຳເນີນທຸລະກິດ Portland ທີ່ພວມຢູ່ຢ້ຽມຢາມ, ຊອກຫາກາລະໂອກາດສົ່ງເສີມການຮ່ວມມືລົງທຶນ, ການຄ້າລະຫວ່າງລັດ Oregon ກັບນະຄອນ ໂຮ່ຈີມິນ. ທີ່ການຕ້ອນຮັບ ທ່ານ ຫງວຽນແທງຟອງ ໃຫ້ຮູ້ວ່າ: ນະຄອນ ໂຮ່ຈີມິນ ໄດ້ ແລະ ພວມນຳໜ້າໃນການຊຸກຍູ້ສາຍພົວພັນຮ່ວມມືຮອບດ້ານລະຫວ່າງ ຫວຽດນາມ ແລະ ອາເມລິກາ ແລະ ກາຍເປັນຈຸດມັດພົບນິຍົມຂອງບັນດາວິສາຫະກິດ, ນັກລົງທຶນ ອາເມລິກາ. ຕີລາຄາສູງການພັດທະນາ ແລະ ທ່າແຮງຂອງນະຄອນ Beaverton, ທ່ານ ຫງວຽນແທງຟອງ ສະເໜີນະຄອນ Beaverton ຮ່ວມມືໜູນຊ່ວຍບຳລຸງສ້າງແຫຼ່ງຊັບພະຍາກອນມະນຸດໃນຂົງເຂດກໍ່ສ້າງບໍລິຫານນະຄອນສະຫລາດ ແລະ ພັດທະນາແບບຍືນຍົງ. ການນຳນະຄອນ ໂຮ່ຈີມິນ ພ້ອມແລ້ວທີ່ຈະສ້າງເງື່ອນໄຂ, ກາຍເປັນຂົວຕໍ່ໃຫ້ບັນດາວິສາຫະກິດ Beaverton ແລະ ລັດ Oregon ຜັນຂະຫຍາຍບັນດາການເຄື່ອນໄຫວສົ່ງເສີມ, ຂໍ້ຕົກລົງຮ່ວມມືລະອຽດໃນບັນດາຂົງເຂດການສຶກສາ, ການຄ້າ ແລະ ການລົງທຶນ.
ສ່ວນທ່ານ Denny Doyle ຢືນຢັນວ່າ ນະຄອນ Beaverton ເວົ້າສະເພາະ, ລັດ Oregon ເວົ້າລວມ ປາດຖະໜາ ແລະ ພ້ອມແລ້ວທີ່ຈະໜູນຊ່ວຍ, ແບ່ງປັນບົດຮຽນແກ້ໄຂບັນດາບັນຫາ ເຊິ່ງນະຄອນ ໂຮ່ຈີມິນ ພວມປະເຊີນໜ້າໃນວິວັດການພັດທະນາຕົວເມືອງຄື: ມົນລະພິດສະພາບແວດລ້ອມ, ຍົກສູງຄຸນນະພາບການສຶກສາ ແລະ ຄຸນນະພາບດ້ານຊີວິດໃຫ້ປະຊາຊົນ.