(vovworld) - ຕອນບ່າຍວັນທີ 26/12, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເປັນປະທານກອງປະຊຸມປະຈຳເດືອນ 12 ຂອງລັດຖະບານ ແລະ ນີ້ແມ່ນວາລະປະຊຸມຄັ້ງສຸດທ້າຍໃນປີ 2012. ບັນດາສະມາຊິກລັດຖະບານໄດ້ປະກອບຄຳເຫັນໃສ່ໃບຍື່ນສະເໜີຂອງກະຊວງແຜນການ ແລະ ການລົງທຶນ ກ່ຽວກັບແຜນຮ່າງ “ກຳນົດທິດຍົດສູງປະສິດທິຜົນການດຶງດູດ, ນຳໃຊ້ ແລະ ຄຸ້ມຄອງການລົງທຶນໂດຍກົງຈາກຕ່າງປະເທດຮອດປີ 2020” ແລະ ບາງບັນຫາທີ່ຍັງຄົງຄ້າງໃນປະຈຸບັນໃນການເຄື່ອນໄຫວລົງທຶນຕ່າງປະເທດ. ບົນພື້ນຖານຄຳເຫັນຂອງບັນດາສະມາຊິກລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເຫັນດີກັບຂໍ້ສັງເກດວ່າ ມາຮອດຈຸດເວລານີ້ນະໂຍບາຍດຶງດູດການລົງທຶນໂດຍກົງຈາກຕ່າງປະເທດບໍ່ເໝາະສົມກັບສະພາບຕົວຈິງ ແລະ ສະແດງໃຫ້ເຫັນຂໍ້ຈຳກັດຫຼາຍຢ່າງ. ທ່ານນາຍົກລັດຖະມົນຕີຫງວຽນເຕີນຢຸງ ເນັ້ນໜັກວ່າ.
“ກຳນົດທິດຄາດໝາຍຄວາມຮຽກຮ້ອງດຶງດູດການລົງທຶນຈາກຕ່າງປະເທດເປັນເອກະພາບສູງ, ບໍ່ສ້າງເງື່ອນໄຂໃຫ້ບັນດາໂຄງການລົງທຶນເຂົ້າເຕັກໂນໂລຊີຕໍ່າ, ສົ່ງຜົນສະທ້ອນເຖິງສິ່ງແວດລ້ອມ, ນຳໃຊ້ພະລັງງານຫຼາຍ ແລະ ພຽງແຕ່ດຶງດູດຄົນງານທີ່ມີລະດັບຕໍ່າ. ປະຈຸບັນ, ຕ້ອງລົງທຶນເຂົ້າໃນຂົງເຂດເຕັກໂນໂລຊີສູງມີຜົນປະໂຫຍດລວມ. ສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບການເຕີບໂຕ, ຍົກສູງກຳລັງແກ່ງແຍ້ງ, ພັດທະນາຢ່າງວ່ອງໄວ ແລະ ໝັ້ນຄົງ, ຫັນເປັນອຸດສາຫະກຳ ແລະ ທັນສະໄໝ.”
ບັນດາສະມາຊິກລັດຖະບານ ກໍ່ປຶກສາຫາລື, ປະກອບຄຳເຫັນເປັນຄັ້ງທຳອິດກ່ຽວກັບໂຄງການແກ້ໄຂໜີ້ເສຍຂອງລະບົບບັນດາອົງການຈັດຕັ້ງສິນເຊື່ອ ແລະ ແຜນຮ່າງສ້າງຕັ້ງບໍ່ລິສັດຄຸ້ມຄອງຊັບສົມບັດ.