ທ່ານ ຫງວຽນຊວນຟຸກ ເປັນປະທານກອງປະຊຸມ
(vovworld) – ກອງປະຊຸມຂອງລັດຖະບານປະຈຳເດືອນ 7/2016, ແມ່ນວາລະປະຊຸມລັດຖະບານທຳອິດພາຍຫຼັງກອງປະຊຸມຄັ້ງປະຖົມມະເລິກ, ສະພາແຫ່ງຊາດຊຸດທີ 14 ເລີ່ມແຕ່ຕອນເຊົ້າວັນທີ 1/8 ຢູ່ຮ່າໂນ້ຍ, ພາຍໃຕ້ການເປັນປະທານຂອງທ່ານນາຍົກລັດຖະມົນຕີ ຫງວຽນຊວນຟຸກ. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີບັນດາສະມາຊິກລັດຖະບານ ຄວນມີສະຕິຢ່າງເລິກຕໍ່ຄວາມຮັບຜິດຊອບໜ້າທີ່ຂອງຕົນ, ກຳແໜ້ນບັນດາຂົງເຂດ, ຂະແໜງທີ່ຕົນຮັບຜິດຊອບກ່ວາອີກເພື່ອແກ້ໄຂບັນຫາຍັງຄົງຄ້າງ, ອ່ອນດ້ອຍຢ່າງທັນການ, ພິເສດແມ່ນບັນດາບັນຫາທີ່ຫາງສຽງເອົາໃຈໃສ່. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ບັນດາກະຊວງ, ຂະແໜງການຕ້ອງປະຕິບັດໜ້າທີ່ຂອງລັດຖະບານ, ສ້າງລະບອບກົດໝາຍ, ນະໂຍບາຍ. ທ່ານນາຍົກລັດຖະມົນຕີ ຫງວຽນຊວນຟຸກ ຊີ້ນຳ ບັນດາສະມາຊິກລັດຖະບານມານະພະຍາຍາມສູ້ຊົນ, ປະຕິບັດໜ້າທີ່ຂອງທັງອາຍຸການສຳເລັດຜົນ, ຮ່ວມແຮງຮ່ວມໃຈສ້າງລັດຖະບານ ສັດຊື່ບໍລິສຸດ, ຮັບໃຊ້ປະຊາຊົນນັບມື້ນັບດີກ່ວາ:
“ລັດຖະບານ ແລະ ສະມາຊິກລັດຖະບານແຕ່ລະຄົນຕ້ອງນຳໜ້າໃນວຽກງານປະຢັດ, ຕ້ານການຟຸມເຟືອຍ. ບັນດາກະຊວງ, ຂະແໜງການ, ຫົວໜ່ວຍນຳໃຊ້ງົບປະມານ, ຊັບສິນປະຢັດ, ມີປະສິດທິຜົນ, ພິເສດແມ່ນລົດຂອງລັດ, ສຳນັກງານ, ການຈັດກອງປະຊຸມ, ການໄປປະຕິບັດງານ. ບັນດາກະຊວງ, ຂະແໜງການຕ້ອງເພີ່ມທະວີການປະຊຸມຜ່ານເຄືອຂ່າຍອີນເຕີເນັດ, ໝູນໃຊ້ເຕັກໂນໂລຢີຂໍ້ມູນຂ່າວສານ, ຫລຸດຜ່ອນເອກະສານບໍ່ຈຳເປັນ. ຕ້ອງກວດກາການຄຸ້ມຄອງຊັບສິນຂອງລັດ, ກຳນົດລະດັບການນຳໃຊ້ຢູ່ບັນດາອົງການ, ສຳນັກງານ.”