(vovworld) – ຕອນເຊົ້າວັນທີ 30/6, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເປັນປະທານວາລະປະຊຸມຜ່ານເຄືອຂ່າຍ ອິນເຕີເນັດປະຈຳເດືອນ 6 ຂອງລັດຖະບານ ກັບການນຳທັງໝົດຂອງທ້ອງຖີ່ນຕ່າງໆພາຍໃນປະເທດ. ທ່ານນາຍົກລັດຖະມົນຕີ ຫງວຽນເຕີນຢູ້ງ ຊີ້ແຈ້ງວ່າ: ວາລະປະຊຸມຄັ້ງນີ້ສຸມໃສ່ທົບທວນຄືນ, ຕີລາຄາສະພາບການເສດຖະກິດ, ສັງຄົມ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດ ໃນ 6 ເດືອນຕົ້ນປີ 2014, ຈາກນັ້ນ ໄດ້ກຳນົດບັນດາໜ້າທີ່, ມາດຕະການຈຳເປັນຄວນສຸມໃສ່ຊີ້ນຳເພື່ອປະຕິບັດບັນດາຈຸດໝາຍ, ໜ້າທີ່ໃນ 6 ເດືອນທ້າຍປີຢ່າງມີໄຊ. ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ວາລະປະຊຸມໄດ້ດຳເນີນໃນສະພາບການພິເສດ ຍ້ອນວ່າແຕ່ຕົ້ນເດືອນ 5 ມາຮອດປະຈຸບັນ, ຈີນ ໄດ້ຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ. ການກະທຳນີ້ຂອງ ຈີນ ບໍ່ພຽງແຕ່ແມ່ນການລ່ວງລ້ຳອະທິປະໄຕ, ສິດອະທິປະໄຕ, ສິດອຳນາດສານຂອງ ຫວຽດນາມ, ນາບຂູ່ເຖິງສັນຕິພາບ, ສະຖຽນລະພາບ, ຄວາມສະຫງົບຂອງປະເທດ, ສົ່ງຜົນສະທ້ອນບໍ່ດີເຖິງການພົວພັນມິດຕະພາບ ຫວຽດນາມ ຈີນ ຢ່າງຮ້າຍແຮງເທົ່ານັ້ນ ຫາກຍັງນາບຂູ່ຢ່າງໜັກໜ່ວງເຖິງສັນຕິພາບ, ສະຖຽນລະພາບ, ຄວາມສະຫງົບໃນພາກພື້ນອີກດ້ວຍ.
ໃນສະພາບການນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ລັດຖະບານພ້ອມກັບອຳນາດການປົກຄອງ ແລະ ການນຳທ້ອງຖີ່ນຕ່າງໆຕ້ອງພ້ອມກັນມານະພະຍາຍາມຢ່າງສູງສຸດ, ດ້ວຍມາດຕະການເໝາະສົມກັບກົດໝາຍສາກົນເພື່ອສືບຕໍ່ຢືດໝັ້ນ, ເດັດດ່ຽວຕໍ່ສູ້ປົກປັກຮັກສາອະທິປະໄຕເຂດທະເລຂອງປະເທດຊາດ, ທັງຮັກສາສະພາບແວດລ້ອມສັນຕິພາບ, ສະຖຽນລະພາບ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍເພື່ອກໍ່ສ້າງ ແລະ ພັດທະນາເສດຖະກິດ - ສັງຄົມຂອງປະເທດຊາດດ້ວຍທຸກໆມາດຕະການເໝາະສົມ.
ກ່ຽວຂ້ອງເຖິງໝາກຜົນຂອງການປະຕິບັດໜ້າທີ່ພັດທະນາເສດຖະກິດ - ສັງຄົມ, ທ່ານລັດຖະມົນຕີກະຊວງແຜນການ ແລະ ການລົງທຶນ ບຸ່ຍກວາງວີງ ຢືນຢັນວ່າ: 6 ເດືອນຕົ້ນປີນີ້, ບັນດາກະຊວງ, ຂະແໜງການ ແລະ ທ້ອງຖີ່ນ ບັນລຸໄດ້ຫຼາຍໝາກຜົນຕັ້ງໜ້າ. ໄພເງິນເຟີ້ໄດ້ຮັບການຄວບຄຸມ, ດັດສະນີລາຄາໃຊ້ສອຍເພີ່ມຂຶ້ນບໍ່ຫຼາຍ, ລາຄາຕະຫຼາດໄດ້ຮັບປະກັນເປັນປົກກະຕິ, ການສະໜອງ ແລະ ຄວາມຕ້ອງການສິນຄ້າໄດ້ຮັບປະກັນ. ການສົ່ງອອກຍັງຮັກສາທ່າເຕີບໂຕສູງ ແລະ ສືບຕໍ່ມີການສົ່ງອອກເກີນດຸ່ນ. ກ່ຽວກັບການເຕີບໂຕດ້ານເສດຖະກິດ, GDP ໄຕມາດທີ 2 ເພີ່ມຂຶ້ນສູງກ່ວາໄຕມາດທີ 1 ແລະ ຄາດວ່າ 6 ເດືອນຕົ້ນປີບັນລຸ 5,18% ເພີ່ມຂຶ້ນສູງກ່ວາເມື່ອທຽບໃສ່ລະດັບເຕີບໂຕຂອງໄລຍະດຽວກັນຂອງປີກ່ອນ.