(vovworld) - ຕອນເຊົ້າວັນທີ 23/12, ທ່ານນາຍົກລັດຖະມົນຕີຫງວຽນເຕີນຢຸງ ໄດ້ເປັນປະທານກອງປະຊຸມກັບບັນດາທ້ອງຖິ່ນ ເພື່ອແນໃສ່ຜັນຂະຫຍາຍມະຕິຂອງສະພາແຫ່ງຊາດກ່ຽວກັບໜ້າທີ່ພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດປີ 2014. ເຂົ້າຮ່ວມກອງະຊຸມໂດຍກົງຜ່ານເຄືອຂ່າຍອີນເຕີແນັດ ມີການນຳຫຼັກແຫຼ່ງຂອງ 63 ແຂວງ, ນະຄອນໃນທົ່ວປະເທດ.
ຮ່າງມະຕິກ່ຽວກັບບັນດາໜ້າທີ່, ມາດຕະການຕົ້ນຕໍ່ໃນການຊີ້ນຳ, ບໍລິຫານປະຕິບັດແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດປີ 2014 ຊີ້ແຈ້ງວ່າ, ລັດຖະບານຮຽກຮ້ອງໃຫ້ບັນດາກະຊວງ, ອົງການ, ຄະນະກຳມະການປະຊາຊົນແຂວງ, ນະຄອນຂຶ້ນກັບສູນກາງ ສຸມໃສ່ຊີ້ນຳ ບໍລິຫານ, ຈັດຕັ້ງປະຕິບັດ 9 ໝວດໜ້າທີ່ມາດຕະການແກ້ໄຂຢ່າງຄົບຊຸດ ແລະ ມີປະສິດທິຜົນ. ໃນນັ້ນ, ສຸມໃສ່ຮັກສາເສດຖະກິດມະຫາພາກເປັນປົກກະຕິ, ຄວບຄຸ້ມໄພເງິນເຟີ້, ແກ້ໄຂຄວາມຫຍຸ້ງຍາກ, ຊຸກຍູ້ການພັດທະນາການຜະລິດດຳເນີນທຸລະກິດ, ພ້ອມທັງຍູ້ແຮງການປະຕິບັດ 3 ຂອດບຸກທະລຸຍຸດທະສາດ ຕິດພັນກັບການສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ, ຍົກສູງຄຸນນະພາບ, ປະສິດທິຜົນ, ກຳລັງແກ່ງແຍ່ງຂອງພື້ນຖານເສດຖະກິດ.
ໃຫ້ຄຳເຫັນຊີ້ນຳກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີໃຫ້ບັນດາທ້ອງຖິ່ນ ສຸມໃສ່ປຶກສາຫາລື, ຕີລາຄາສະພາບເສດຖະກິດ, ສັງຄົມ ແລະ ສຳຫຼວດກວດກາວຽກງານຊີ້ນຳ, ບໍລິຫານຂອງລັດຖະບານໃນປີ 2013, ນັບທັງດ້ານດີ, ດ້ານອ່ອນ ແລະ ຂໍ້ຈຳກັດ, ເພື່ອເປັນເອກະພາບສະຕິຄວາມຮູ້ ແລະ ການເຄື່ອນໄຫວຕາມມະຕິຂອງລັດຖະບານ, ພ້ອມກັນຮ່ວມແຮງຮ່ວມໃຈປະຕິບັດບັນດາຈຸດໝາຍ, ຄາດໝາຍ, ໜ້າທີ່ພັດທະນາເສດຖະກິດສັງຄົມປີ 2014 ເຊິ່ງສະພາແຫ່ງຊາດໄດ້ຮັບຮອງເອົາຢ່າງມີໄຊ.
ຕາມແຜນການເຮັດວຽກ, ວາລະປະຊຸມລັດຖະບານກັບບັນດາທ້ອງຖິ່ນຈະດຳເນີນ ເປັນເວລາ 2 ວັນ. ສິ້ນສຸດກອງປະຊຸມ, ລັດຖະບານຈະປະກາດໃຊ້ມະຕິກ່ຽວກັບບັນດາມາດຕະການຊີ້ນຳ, ບໍລິຫານໃນການປະຕິບັດແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດປີ 2014 ເພື່ອຜັນຂະຫຍາຍຢ່າງເປັນເອກະພາບໃນທົ່ວປະເທດ.