(vovworld) – ລັດຖະບານສາມັກຄີປາແລດສຕິນ ພາຍໃຕ້ການຊີ້ນຳນຳພາຂອງທ່ານນາຍົກລັດຖະມົນຕີ Rami Hamdallah ດຳເນີນກອງປະຊຸມຄົບຄະນະຄັ້ງທຳອິດຢູ່ເຂດກາຊາ ໃນວັນທີ 09/10 ຈະມາເຖິງ. ໃນຖະແຫຼງການໜຶ່ງເຊິ່ງໄດ້ຝາກຜ່ານທາງອິນເຕີແນັດ ໃນວັນທີ 06/10, ທ່ານລັດຖະມົນຕີກະຊວງແຮງງານປາແລດສຕິນ Ma’mon Abu Shahla ໃຫ້ຮູ້ວ່າ, ທ່ານນາຍົກລັດຖະມົນຕີ Hamdallah ແລະ ບັນດາລັດຖະມົນຕີພາຍໃນລັດຖະບານ, ຈາກເຂດຝັ່ງຕາເວັນຕົກ ແລະ ເຂດກາຊາ ຈະຈັດກອງປະຊຸມຄັ້ງທຳອິດຢູ່ນະຄອນກາຊາ ນັບແຕ່ເວລາລັດຖະບານຮັບໜ້າທີ່ເມື່ອເດືອນ 06 ຜ່ານມາ. ແຕ່ວ່າ, ຍັງບໍ່ທັນຮູ້ວ່າ ອິດສຣາແອນ ຈະອະນຸຍາດໃຫ້ບັນດາລັດຖະມົນຕີຈາກຝັ່ງຕາເວັນຕົກ ຜ່ານເຂດຊາຍແດນ Erez ເຂົ້າເຂດກາຊາ ເພື່ອເຂົ້າຮ່ວມກອງປະຊຸມຫຼືບໍ່. ຕາມທ່ານ Abu Shahla ແລ້ວ, ເຖິງວ່າຈະຈັດກອງປະຊຸມຫຼືບໍ່, ລັດຖະບານປາແລດສຕິນ ກໍ່ຈະປຶກສາກາລືກ່ຽວກັບຜົນຮ້າຍຍ້ອນຫຼັັງຈາກສົງຄາມໂດຍອິດສຣາແອນ ປະຕິບັດຢູ່ເຂດກາຊາ ໃນໄລຍະຜ່ານມາ ກໍ່ຄືກົນໄກສ້າງຕັ້ງເຂດດິນແດນນີ້ຄືນໃໝ່ ແລະ ໜູນຊ່ວຍປະຊາຊົນ.
ແລະກໍ່ໃນວັນທີ 06/10, ກະຊວງການຕ່າງປະເທດອິດສຣາແອນ ໄດ້ຮຽກຕົວທ່ານເອກອັກຄະລັດຖະທູດຊູແອດ ມາເພື່ອຄັດຄ້ານ Stockholm ມີເຈດຈຳນົງຮັບຮູ້ລັດປາແລດສຕິນ.