ລັດຖະບານຫວຽດນາມ ຈັດກອງປະຊຸມສະໄໝສາມັນປະຈຳເດືອນ 02
(ພາບປະກອບ)
(vovworld) - ວັນທີ 28/02, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ເປັນປະທານກອງປະຊຸມສະໄໝສາມັນປະຈຳເດືອນ 02/2014 ເພື່ອແນໃສ່ຕີລາຄາສະພາບການເສດຖະກິດ, ສັງຄົມໃນເດືອນ 2 ແລະ 2 ເດືອນຕົ້ນປີ ກໍ່ຄືປຶກສາຫາລື, ເປັນເອກະພາບກ່ຽວກັບການກຳນົດທິດຊີ້ນຳ, ບໍລິຫານເສດຖະກິດໃນໄລຍະຈະມາເຖິງ ແລະ ບາງບັນຫາສຳຄັນອື່ນໆອີກ. ກ່າວຄຳເຫັນສະຫຼຸບກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເຫັນດີກັບບັນດາຄຳເຫັນຕີລາຄາກ່ຽວກັບສະພາບເສດຖະກິດສັງຄົມໃນ 2 ເດືອນຕົ້ນປີ 2014 ໃນທຸກຂົງເຂດ ລ້ວນແຕ່ມີການຫັນປ່ຽນຢ່າງຕັ້ງໜ້າ ແລະ ສະເໝີກັນ; ທຸກຂັ້ນ, ທຸກຂະແໜງການກໍ່ໄດ້ມີຄວາມເອົາໃຈໃສ່ເຍິ່ງແຍງດູແລຊີວິດການເປັນຢູ່ຂອງປະຊາຊົນ. ທ່ານນາຍົກລັດຖະມົນຕີ ຫງວຽນເຕີນຢຸງ ຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖິ່ນຕ່າງໆສືບຕໍ່ສຸມໃສ່ປະຕິບັດຢ່າງຂ້ຽວຂາດ, ຄົບຊຸດ, ພ້ອມກັບບັນດາມາດຕະການທີ່ໄດ້ວາງອອກໃນມະຕິເລກ 01 ຂອງລັດຖະບານກ່ຽວກັບໜ້າທີ່, ມາດຕະການແກ້ໄຂຕົ້ນຕໍ່ໃນການຊີ້ນຳບໍລິຫານການປະຕິບັດແຜນການພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດປີ 2014. ທ່ານນາຍົກລັດຖະມົນຕີ ຫງວຽນເຕີນຢຸງກ່າວວ່າ.
“ກ່ອນອື່ນໝົດ ກ່ຽວກັບດ້ານເສດຖະກິດ, ຂ້າພະເຈົ້າສະເໜີໃຫ້ປ່ອຍເງິນລົງທຶນໄວ ສຳລັບເງິນລົງທຶນກໍ່ສ້າງພື້ນຖານຈາກພັນທະບັດ, ງົບປະມານ. ພ້ອມກັນນັ້ນ, ຍູ້ແຮງບັນດາໂຄງການ ODA, ທຶນສົມທົບກໍ່ໄດ້ກ່ຽມພ້ອມແລ້ວ ແລະ ຊ່ວຍວິສາຫະກິດ FDI ຜັນຂະຫຍາຍບັນດາໂຄງການລົງທຶນ. ສິ່ງດັ່ງກ່າວຈະຕັດສິນການເຕີບໂຕນັບແຕ່ໄລຍະຕົ້ນປີ. ພ້ອມທັງຕ້ອງຜູກຮັດກັບການຄວບຄຸມຄຸນນະພາບ, ຍູ້ແຮງລະດັບຄວາມຄືບໜ້າ, ບໍ່ປະໃຫ້ເກີດການຮົ່ວໄຫຼ ແລະ ຫຍໍ້ທໍ້”
ກໍ່ທີ່ກອງປະຊຸມ, ລັດຖະບານໄດ້ສຸມໃສ່ປຶກສາຫາລື, ຕີລາຄາ 5 ປີແຫ່ງການປະຕິບັດມະຕິສູນກາງພັກຄັ້ງທີ 6 ຊຸດທີ 10 ກ່ຽວກັບການສືບຕໍ່ສ້າງກົນໄກເສດຖະກິດການຕະຫຼາດ ຕາມທິດສັງຄົມນິຍົມ, ພ້ອມທັງສະເໜີບັນດາມາດຕະການເພີ່ມທະວີກົນໄກການຕະຫຼາດໃຫ້ສົມບູນແບບ ໃນເງື່ອນໄຂເຊື່ອມໂຍງເຂົ້າກັບເສດຖະກິດໂລກຢ່າງເລີກເຊິ່ງ ແລະ ກວ້າງຂວາງ.