ເວທີປາໄສວິສາຫະກິດພັດທະນາແບບຍືນຍົງ ຫວຽດນາມ
(vovworld) - ຕອນເຊົ້າວັນທີ 8/11, ຢູ່ ຮ່າໂນ້ຍ, ໄດ້ເປີດເວທີປາໄສວິສາຫະກິດພັດທະນາແບບຍືນຍົງ ຫວຽດນາມ 2016 ດ້ວຍຫົວຂໍ້ວ່າ “ປະດິດສ້າງເພື່ອຜັນຂະຫຍາຍບັນດາຄາດໝາຍພັດທະນາແບບຍືນຍົງ“. ກ່າວຄວາມເຫັນທີ່ເວທີປາໄສ, ທ່ານຮອງນາຍົກລັດຖະມົນຕີ ຫວູດຶກດາມ ເນັ້ນໜັກວ່າ, ວິສາຫະກິດຕ້ອງເອົາໃຈໃສ່ເປັນພິເສດເຖິງການກໍ່ສ້າງ ແລະ ນຳໃຊ້ບັນດາຮູບແບບດຳເນີນທຸລະກິດຢ່າງມີຫົວຄິດປະດິດສ້າງ, ຂະຫຍັນຂັນເຄື່ອນ, ສ້າງຄຸນຄ່າຫຼາຍຢ່າງໃຫ້ສັງຄົມ, ກໍ່ຄືເປັນເຈົ້າການຄົ້ນຄ້ວາ ແລະ ຜັນຂະຫຍາຍບັນດາມາດຕະການແກ້ໄຂຢ່າງຄົບຊຸດ ເພື່ອແນໃສ່ຍົກສູງສະມັດຕະພາບ ຮັບປະກັນພັດທະນາແບບຍືນຍົງ ແລະ ສ້າງການບຸກທະລຸໃນການປັບປຸງຄວາມສາມາດແກ່ງແຍ້ງ. ທ່ານຮອງນາຍົກລັດຖະມົນຕີ ຫວູດຶກດາມ ເນັ້ນໜັກວ່າ:
“ລັດຖະບານຮຽກຮ້ອງກະຊວງ, ຂະແໜງການທັງໝົດ, ອົງການຈັ້ງຕັ້ງທຸກຂັ້ນຕ້ອງເຊົ່າການບໍລິການເຕັກໂນໂລຢີຂໍ້ມູນຂ່າວສານ ເພື່ອສະໜອງການບໍລິການບໍລິຫານລັດ, ຫາກບໍ່ເຮັດແບບໂດຍກົງອີກ. ຍ້ອນເຫດນັ້ນ, ລັດຖະບານໄດ້ຮຽກຮ້ອງຕ້ອງຍູ້ແຮງການສ້າງໂຄງປະກອບວິສາຫະກິດ, ຫັນເປັນຫຸ້ນສ່ວນຢ່າງແທ້ຈິງ. ປະຈຸບັນຕະຫຼາດການບໍລິການໄດ້ເປີດກວ້າງ ແລະ ລັດຖະບານຫວັງວ່າ ບັນດາວິສາຫະກິດຈະເຮັດບໍລິການດ້ານການສຶກສາ, ສາທາລະນະສຸກ. ພິເສດແມ່ນລົງທຶນຕາມຮູບແບບປອດກຳໄລ. ຖ້າຫາກພວກເຮົາມີວິໄສທັດຢ່າງຍາວນານ, ນີ້ແມ່ນບັນດາຂົງເຂດລົງທຶນຢ່າງໝັ້ນຄົງ“.
ທີ່ເວທີປາໄສ, ທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ເຈິ່ນຮົ່ງຮ່າ ໄດ້ລາຍງານແຜນການປະຕິບັດຂໍ້ຕົກລົງ ປາຣີ ກ່ຽວກັບການປ່ຽນແປງຂອງດິນຟ້າອາກາດຢູ່ ຫວຽດນາມ ເພື່ອແນໃສ່ແກ້ໄຂບັນດາບັນຫາກ່ຽວກັບການປ່ຽນແປງຂອງດິນຟ້າອາກາດໃນຫຼາຍທົດສະວັດຕໍ່ໜ້າ, ພ້ອມທັງສະແດງຄວາມຮັບຜິດຊອບຂອງ ຫວຽດນາມທີ່ພ້ອມກັບປະຊາຄົມສາກົນແກ້ໄຂບັນດາສິ່ງທ້າທາຍອັນໃຫຍ່ຫຼວງທີ່ນາບຂູ່ເຖິງການຄົງຕົວຂອງມະນຸດ.