ລັດຖະມົນຕີ ກະຊວງອຸດສາຫະກຳການຄ້າ ວູ້ຮີຮ່ວາງ ຕອບຄຳຊັກຖາມບັນດາ ສ.ສ.ຊ (ພາບ: baodientuchinhphu)
|
(vovworld)- ຕອນບ່າຍວັນທີ 17/11, ໂດຍພາຍໃຕ້ການປະທານ ຂອງທ່ານປະທານ ສະພາ ແຫ່ງຊາດຫວຽດນາມຫງວຽນຊິງຮຸ່ງ, ສະພາແຫ່ງຊາດ ຫວຽດນາມໄດ້ເລີ່ມຕົ້ນການຊັກຖາມ ບັນດາ ສະມາຊິກລັດຖະບານ. ເມື່ອຕອບ ຄຳຖາມຂອງບັນດາ ສ.ສ.ຊ ກ່ຽວກັບນະໂຍບາຍພັດທະນາຂົງເຂດ ອຸດສາຫະກຳໜູນຊ່ວຍຄື ປະກອບລົດໂອໂຕ, ໄຟຟ້າ, ເອເລັກໂຕນິກ….,ທ່ານລັດຖະມົນຕີ ກະຊວງອຸດສາຫະກຳການຄ້າ ວູ້ຮີຮ່ວາງຖືວ່າ ເຖິງວ່າຂະແໜງອຸດສາຫະກຳໜູນຊ່ວຍຂອງຫວຽດນາມມີຄວາມຈຳກັດຫຼາຍຢ່າງກໍຕາມ, ແຕ່ໃນບາງຂົງເຂດ, ຂະແໜງອຸດສາຫະກຳນີ້ໄດ້ບັນລຸໝາກຜົນທີ່ໜ້າຊື່ນຊົມ. ທ່ານລັດຖະມົນຕີ ກະຊວງອຸດສາຫະກຳການຄ້າ ວູ້ຮີຮ່ວາງ ຖືວ່າ
“ ນອກຈາກເລື່ອງສ້າງຂອບເຂດກົດໝາຍໃຫ້ສົມບູນແບບ, ພວກຂ້າພະເຈົ້າຫວັງຢ່າງຍິ່ງວ່າ ໃນກອງປະຊຸມເທື່ອນີ້, ສະພາແຫ່ງຊາດຫວຽດນາມຈະຮັບຮອງເອົາຮ່າງກົດໝາຍປັບປຸງເພີ່ມເຕີບບາງຂໍ້ມາດຕາຂອງກົດຫມາຍວ່າດ້ວຍສ່ວຍສາອາກອນ, ໃນນັ້ນມີສ່ວນກ່ຽວຂ້ອງເຖິງອຸດສາຫະກຳໜູນຊ່ວຍ. ນັ້ນແມ່ນກ່ຽວກັບການໃຫ້ບຸລິມະສິດໃນອາກອນລາຍຮັບວິສາຫະກິດ, ກໍຄື ອາກອນລາຍຮັບສ່ວນບຸກຄົນເພື່ອໃຫ້ບັນດາຜູ້ຊ່ຽວຊານເຂົ້າມາຊ່ວຍຫວຽດນາມໃນການພັດທະນາ ອຸດສາຫະກຳໜູນຊ່ວຍ. ນີ້ແມ່ນເງື່ອນໄຂສຳຄັນ ເພື່ອຊຸກຍູ້ການພັດທະນາ ອຸດສາຫະກຳໜູນຊ່ວຍ”
ເມື່ອຕອບຄຳຖາມກ່ຽວກັບການປະຕິບັດມະຕິເລກທີ 62 ຂອງ ສະພາແຫ່ງຊາດ ຫວຽດນາມໃນການກວດກາ, ວາງແຜນກຳນົດບັນດາໂຮງງານໄຟຟ້ານຳ້ຕົກ. ທ່ານລັດຖະມົນຕີ ກະຊວງອຸດສາຫະກຳການຄ້າ ວູ້ຮີຮ່ວາງ ຢືນຢັນວ່າ ຜ່ານ 1 ປີແຫ່ງການປະຕິບັດມະຕິ 62 ໄດ້ສຳເລັດການກວດກາ, ວາງແຜນກຳນົດບັນດາໂຮງງານໄຟຟ້ານຳ້ຕົກໂດຍພື້ນຖານ. ທ່ານກ່າວວ່າ :
“ ກ່ອນທີ່ອອກມະຕິ 62 , ພວກຂ້າພະເຈົ້າໄດ້ປັດເຂ່ຍໂຄງການໂຮງງານໄຟຟ້ານຳ້ຕົກກວ່າ 400 ສະບັບອອກຈາກແຜນກຳນົດ. ພາຍຫຼັງທີ່ ມະຕິ 62ໄດ້ຮັບການປະກາດໃຊ້, ບັນດາອົງການທີ່ມີໜ້າທີ ຮັບຜິດຊອບ ໄດ້ປັດເຂ່ຍ 15 ໂຄງການ ພ້ອມກັບ 47 ໂຄງການອື່ນທີ່ຍັງບໍ່ທັນມີນັກລົງທຶນ ກໍຖືກບັນດາທ້ອງຖິ່ນປັດເຂ່ຍອອກຈາກແຜນກຳນົດ. ມະຕິ 62 ໄດ້ຍົກສູງຄວາມຮັບຮູ້ຂອງບັນດານັກລົງທຶນໃນການກໍ່ສ້າງ, ເຄື່ອນໄຫວ, ຄຸ້ມຄອງບັນດາໂຄງການໂຮງງານໄຟຟ້ານຳ້ຕົກ”