(vovworld) - ຕອນເຊົ້າວັນທີ 14/6, ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ຕອບຄຳຊັກຖາມຂອງ ສະມາຊິກສະພາແຫ່ງຊາດ (ສສຊ) ກ່ຽວກັບບາງບັນຫາຊຶ່ງຜູ້ມີສິດເລືອກຕັ້ງມີຄວາມສົນໃຈ.
ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ
ພາບ: baomoi.com |
ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຫນູນຊ່ວຍການຜະລິດດຳເນີນທຸລະກິດ, ພັດທະນາການຄ້າ ແລະ ນຳເຂົ້າສົ່ງອອກ, ຮັກສາລາຄາໃນທ້ອງຕະຫລາດເປັນປົກກະຕິ, ການເຄື່ອນໄຫວຂອງກຸ່ມບໍລິສັດເສດຖະກິດຈຳນວນຫນຶ່ງກໍຄືເລື່ອງຍົກເລີກສິດຜູກຂາດຂອງຂະແຫນງໄຟຟ້າ, ນ້ຳມັນອາຍແກສ ນັ້ນແມ່ນບັນດາບັນຫາທີ່ໄດ້ຮັບຄວາມສົນໃຈໃນວາລະຊັກຖາມທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ Vu Huy Hoang. ສຳລັບບັນຫາຄວບຄຸມຕະຫລາດ, ສະພາບສໍ້ໂກງການຄ້າ, ຫນີພາສີ, ຕາມທ່ານ ລັດຖະມົນຕີ Vu Huy Hoang ແລ້ວ, ມາດຕະການແກ້ໄຂນັ້ນແມ່ນ ກະຊວງອຸດສາຫະກຳ ແລະ ການຄ້າ ຈະສົມທົບຢ່າງແຫນ້ນແຟ້ນກັບບັນດາກະຊວງ, ຂະແຫນງການກ່ຽວຂ້ອງເພື່ອມີມາດຕະການຂ້ຽວຂາດເຮັດໃຫ້ ການສໍ້ໂກງການຄ້າຫລຸດຜ່ອນລົງເທື່ອລະກ້າວ. ທ່ານ ລັດຖະມົນຕີ Vu Huy Hoang ກໍຮັບເອົາຄຳເຫັນຂອງຜູ້ມີສິດເລືອກຕັ້ງກ່ຽວກັບສະພາບແກ່ຍາວສິດຜູກຂາດຂອງຂະແຫນງໄຟຟ້າ, ນ້ຳມັນອາຍແກສ ພ້ອມທັງໝັ້ນໝາຍຈະມີວິວັດການເພື່ອລົບລ້າງສະພາບການນີ້. ທ່ານ ລັດຖະມົນຕີ Vu Huy Hoang ກ່າວວ່າ:
“ແຕ່ວັນທີ 1/7/2012 ຈະອະນຸຍາດໃຫ້ດຳເນີນທຸລະກິດໄຟຟ້າແບບແກ້ງແຍ້ງຢ່າງເປັນທາງການ. ປີ 2014 ຈະເປີດຕະຫລາດຂາຍຍົກໄຟຟ້າແກ້ງແຍ້ງ ແລະ ຮອດປີ 2012 ຈະປະຕິບັດການຂາຍຍ່ອຍໄຟຟ້າ. ສຳລັບນ້ຳມັນອາຍແກສກໍເຊັ່ນດຽວກັນ. ປະຈຸບັນ ນ້ຳມັນອາຍແກສພວມໄດ້ຮັບການຄຸ້ມຄອງຕາມດຳລັດເລກທີ 84 ກ່ຽວກັບລາຄານ້ຳມັນອາຍແກສ ແລະ ເຄື່ອນໄຫວຕາມກົນໄກການຕະຫລາດໂດຍມີການບໍລິຫານຂອງລັດ.”
ສຳລັບອຸດສາຫະກຳສຳຮອງຍັງພັດທະນາຢ່າງຊັກຊ້າ, ຕາມ ທ່ານ ລັດຖະມົນຕີ Vu Huy Hoang ແລ້ວ ຄວນແກ້ໄຂດ້ວຍວິທີເພີ່ມທະວີການຮ່ວມມື, ຍາດແຍ່ງການຊ່ວຍເຫລືອຈາກບັນດາປະເທດພັດທະນາຢູ່ໃນໂລກ ຄຽງຄູ່ກັນນັ້ນຍົກສູງອັດຕາສ່ວນຜະລິດສິນຄ້າພາຍໃນປະເທດ. ກ່ຽວກັບບັນຫາແກ້ໄຂສິນຄ້າຄ້າງສາງ, ທ່ານ ລັດຖະມົນຕີ Vu Huy Hoang ຖືວ່າ: ວິສາຫະກິດເອງຕ້ອງເປັນເຈົ້າການເພື່ອຊອກມາດຕະການຂາຍສິນຄ້າ. ລັດ, ປະຊາຊົນ ແລະ ວິສາຫະກິດພ້ອມກັນສົມທົບກັນປະຕິບັດ. ເພື່ອແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຫນູນຊ່ວຍການຜະລິດດຳເນີນທຸລະກິດກໍຄືພັດທະນາຕະຫລາດ, ທ່ານ ລັດຖະມົນຕີ Vu Huy Hoang ໃຫ້ຮູ້ວ່າ:
“ພວກເຮົາຕ້ອງຊຸກຍູ້ການເຄື່ອນໄຫວສົ່ງເສີມດ້ານການຄ້າ, ນັ້ນແມ່ນສົ່ງເສີມດ້ານການຄ້າພາຍໃນປະເທດ, ສົ່ງເສີມການສົ່ງອອກ ແລະ ສົ່ງເສີມການຄ້າຢູ່ເຂດພູດອຍ, ເຂດຊາຍແດນ. ພວກຂ້າພະເຈົ້າພວມຕັ້ງຫນ້າປະຕິບັດໂຄງການນີ້ເພື່ອໃຫ້ບັນດາວິສາຫະກິດຈຳຫນ່າຍຜະລິດຕະພັນໄດ້. ທີສອງແມ່ນເພີ່ມທະວີປະສິດທິຜົນໂຄງການຊາວຫວຽດນາມ ບຸລິມະສິດນຳໃຊ້ສິນຄ້າ ຫວຽດນາມ ແລະ ຈຳກັດການນຳເຂົ້າສິນຄ້າທີ່ບໍ່ຈຳເປັນເພື່ອໃຫ້ບັນດາວິສາຫະກິດຈຳຫນ່າຍສິນຄ້າໄດ້. ຖ້າຫາກປະສານສົມທົບ ບັນດາມາດຕະການກ່ຽວກັບການເງິນ, ສິນຄ້າ, ການລົງທຶນຢ່າງຄົບຊຸດ …. ສິນຄ້າຄ້າງສາງຈະຄອ່ຍໆຫລຸດລົງ.”
ຕອນບ່າຍວັນດຽວກັນ, ທ່ານ Tran Dai Quang ລັດຖະມົນຕີກະຊວງຕຳຫລວດ ໄດ້ຕອບຄຳຊັກຖາມບັນດາສະມາຊິກສະພາແຫ່ງຊາດ (ສສຊ). ກ່ຽວກັບສະພາບຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ, ທ່ານ ລັດຖະມົນຕີ Tran Dai Quang ເນັ້ນຫນັກວ່າ: ປະຈຸບັນ ສະພາບການອາດຊະຍາກຳຍັງຜັນແປໄປຢ່າງສັບສົນ ເປັນຕົ້ນແມ່ນອາດຊະຍາກຳມີການຈັດຕັ້ງ, ອາດຊະຍາກຳຄ້າຂາຍມະນຸດ, ຢາເສບຕິດ ແລະ ການສໍ້ລາດບັງຫລວງ. ຄຽງຄູ່ກັນນັ້ນ ເກີດອາດຊະຍາກຳໃຫມ່ ຄື: ອາດຊະຍາກຳໃນຂົງເຂດເຕັກໂນໂລຊີສູງ, ໂທລະຄົມ, ອາດຊະຍາກຳກ່ຽວກັບສິ່ງແວດລ້ອມ. ກ່ຽວກັບດ້ານການເມືອງ, ປ້ອງກັນຄວາມສະຫງົບ, ທ່ານ ລັດຖະມົນຕີ Tran Dai Quang ຢືນຢັນວ່າ: ກະຊວງຕຳຫລວດ ໄດ້ພ້ອມກັບທົ່ວປວງຊົນຕໍ່ສູ້ເຮັດໃຫ້ທຸກກົນອຸບາຍ, ເລ່ຫລ່ຽມຂອງບັນດາກຳລັງເປັນປໍລະປັກຖືກປະລາໄຊ. ທ່ານ Quang ເນັ້ນຫນັກວ່າ:
“ກ່ອນອື່ນໝົດ ພວກຂ້າພະເຈົ້າສຸມໃສ່ບັນດາອາດຊະຍາກຳທີ່ອັນຕະລາຍດັ່ງກ່າວ, ເຮັດແນວໃດຮັບປະກັນຄວາມສະຫງົບໃຫ້ແກ່ປະຊາຊົນ. ຄຽງຄູ່ກັນນັ້ນ ຍູ້ແຮງຂະບວນການທົ່ວປວງຊົນປ້ອງກັນຄວາມສະຫງົບຂອງປະເທດຊາດ. ກຳລັງຕຳຫລວດເປີດບັນດາບັ້ນບຸກໂຈມຕີ ປາບປາມອາດຊະຍາກຳຢ່າງຕໍ່ເນື່ອງ.”