(vovworld) – ແຕ່ວັນທີ 2/7, ຄະນະຜູ້ແທນຂັ້ນສູງກະຊວງຕຳຫຼວດ ສສ ຫວຽດນາມ ໂດຍພົນເອກ ເຈີ່ນດ້າຍກວາງ, ກຳມະການກົມການເມືອງ, ລັດຖະມົນຕີກະຊວງຕຳຫຼວດ ນຳໜ້າ, ມີການຢ້ຽມຢາມສາທາລະນະລັດສະຫະພັນ ເຢຍລະມັນ ຢ່າງເປັນທາງການ. ໃນຂອບເຂດການຢ້ຽມຢາມ, ຄະນະມີການເຈລະຈາກັບຄະນະຜູ້ແທນຂັ້ນສູງອົງການປະສານງານປ້ອງກັນຄວາມສະຫງົບ, ສຳນັກງານນາຍົກລັດຖະມົນຕີສາທາລະນະລັດ ສະຫະພັນ ເຢຍລະມັນ ໂດຍທ່ານ Gunter Heiss, ທີ່ປຶກສານາຍົກລັດຖະມົນຕີ - ຜູ້ປະສານງານ, ນຳໜ້າ.
ທີ່ການເຈລະຈາ, 2 ຝ່າຍໄດ້ແລກປ່ຽນ, ຕີລາຄາສູງບັນດາບັນຫາສາກົນ ແລະ ພາກພື້ນ, ເນັ້ນໜັກເຖິງບັນຫາປ້ອງກັນຄວາມສະຫງົບທາງເຄືອຂ່າຍ ອີນເຕີເນັດ ແລະ ສົມທົບກັນຕໍ່ສູ້ປ້ອງກັນ, ຕ້ານອາດຊະຍາກຳເຄືອຂ່າຍ ອີນເຕີເນັດ, ແລກປ່ຽນບົດຮຽນ, ແລກປ່ຽນຄະນະຜູ້ແທນທຸກຂັ້ນ... ເນື່ອງໃນໂອກາດນີ້, ທ່ານລັດຖະມົນຕີ ເຈີ່ນດ້າຍກວາງ, ໄດ້ປະກາດກ່ຽວກັບສະພາບການກ່ຽວຂ້ອງເຖິງເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ, ກໍ່ຄືທັດສະນະຂອງ ຫວຽດນາມ ໃນການແກ້ໄຂບັນຫາທະເລຕາເວັນອອກ. ທ່ານລັດຖະມົນຕີ ເຈີ່ນດ້າຍກວາງ, ສະເໜີລັດຖະບານ ເຢຍລະມັນ ມີສຽງເວົ້າສະໜັບສະໜູນການຕໍ່ສູ້ເປັນທຳຂອງປະຊາຊົນ ຫວຽດນາມ ກໍ່ຄືຮຽກຮ້ອງ ຈີນ ຢຸດຕິບັນດາການກະທຳລະເມີດອະທິປະໄຕ ຜືນແຜ່ນດິນຂອງ ຫວຽດນາມ. ທ່ານ Gunter Heiss ໄດ້ແບ່ງປັນຢ່າງເລິກເຊິ່ງ ແລະ ເຫັນດີເຫັນພ້ອມກັບແຜນນະໂຍບາຍ, ມາດຕະການຂອງ ຫວຽດນາມ ໃນການແກ້ໄຂບັນຫາທະເລຕາເວັນອອກດ້ວຍມາດຕະການສັນຕິພາບ, ບົນພື້ນຖານກົດໝາຍສາກົນ ແລະ ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 (UNCLOS).
ກ່ອນໜ້ານັ້ນ, ທ່ານລັດຖະມົນຕີ ເຈີ່ນດ້າຍກວາງ ແລະ ຄະນະຜູ້ແທນຂັ້ນສູງກະຊວງຕຳຫຼວດ ຫວຽດນາມ ໄປຢ້ຽມຢາມສະຖານທູດ ຫວຽດນາມ ປະຈຳ ສາທາລະນະລັດສະຫະພັນ ເຢຍລະມັນ.