(vovworld) - ຕອນບ່າຍວັນທີ 7/8, ຢູ່ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ແລະ ທ່ານ ລັດຖະມົນຕີວ່າການກະຊວງການຕ່າງປະເທດ ອາເມລິກາ Jonh Kerry, ເປັນເຈົ້າພາບການປະຊຸມຂ່າວ ເພື່ອແຈ້ງກ່ຽວກັບຜົນຂອງການເຈລະຈາ ແລະ ຕອບຄຳຖາມຂອງສື່ມວນຊົນ. ເມື່ອຕອບຄຳຖາມຂອງນັກຂ່າວກ່ຽວກັບແງ່ຫວັງສຳເລັດສັນຍາຄູ່ຮ່ວມມືຂ້າມປາຊີຟິກ (TPP), ທ່ານລັດຖະມົນຕີວ່າການກະຊວງການຕ່າງປະເທດ ອາເມລິກາ Jonh Kerry ໃຫ້ຮູ້ວ່າ: “ໄດ້ມີຄວາມກ້າວໜ້າ, ແຕ່ຍັງມີຫຼາຍບັນຫາຍັງຄົງຄ້າງຢູ່, ມື້ນີ້ພວກຂ້າພະເຈົ້າໄດ້ປຶກສາຫາລືບັນດາບັນຫາທີ່ກ່ຽວຂ້ອງເຖິງຫວຽດນາມ. ບັນດາປະເທດອື່ນໆກໍ່ມີຫຼາຍບັນຫາຕ້ອງໄດ້ຮັບການແກ້ໄຂໃນຊຸມມື້ຈະມາເຖິງ ເພື່ອສາມາດສຳເລັດ TPP ໃນທ້າຍປີນີ້“… ກ່ຽວກັບບັນຫາທະເລຕາເວັນອອກ, ທ່ານລັດຖະມົນຕີວ່າການກະຊວງການຕ່າງປະເທດ ອາເມລິກາ Jonh Kerry ສະແດງຄວາມວິຕົກກັງວົນຕໍ່ເລື່ອງຫັນເປັນບັນຫາການທະຫານ, ຖົມດິນເປັນເກາະ, ແລະ ເຫັນດີຕໍ່ການແກ້ໄຂຄວາມຂັດແຍ້ງກັນດ້ວຍສັນຕິວິທີ, ທາງການທູດ ຫຼືຜ່ານສານສາກົນ. ທ່ານກໍ່ຢືນຢັນວ່າ ເລື່ອງຫວຽດນາມ ເຂົ້າຮ່ວມກຳລັງຮັກສາສັນຕິພາບສະຫະປະຊາຊາດ ແມ່ນບາດກ້າວທີ່ສຳຄັນ, ເຊິ່ງສະຫະປະຊາຊາດ ພວມມານະພະຍາຍາມເພື່ອຊອກຫາແຫຼ່ງກຳລັງໃຫ້ວຽກງານຮັກສາສັນຕິພາບ.
ສ່ວນທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ກໍ່ຢືນຢັນວ່າຢູ່ຫວຽດນາມ ທຸກນະໂຍບາຍລ້ວນແຕ່ຖືມະນຸດເປັນໃຈກາງຂອງການພັດທະນາ. ຫວຽດນາມ ຖືເປັນສຳຄັນ ແລະ ຊຸກຍູ້ສິດທິມະນຸດ. ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ໃຫ້ຮູ້ວ່າ, ການຮ່ວມມືທາງດ້ານການສຶກສາ ແມ່ນການຮ່ວມມືທີ່ມີຄວາມສຳຄັນລະຫວ່າງຫວຽດນາມ - ອາເມລິກາ. ນີ້ແມ່ນຂົງເຂດເຊິ່ງທັງສອງຝ່າຍລ້ວນແຕ່ມີຄວາມຕ້ອງການ, ພິເສດ, ຝ່າຍຫວຽດນາມ ມີຄວາມຕ້ອງການໃຫຍ່ໃນການບຳລຸງສ້າງຊັບພະຍາກອນມະນຸດ. ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ກໍ່ໃຫ້ຮູ້ວ່າ, ການພົວພັນລະຫວ່າງຫວຽດນາມ - ອາເມລິກາ ໄດ້ຫັນເປັນຄູ່ຮ່ວມມືຮອບດ້ານນັບແຕ່ປີ 2013. ຫວຽດນາມ ຫວັງວ່າ, ການພົວພັນໄດ້ຮັບການພັດທະນາບົນພື້ນຖານສ້າງຄວາມໄວ້ເນື້ອເຊື່ອໃຈດ້ານການເມືອງ, ເພີ່ມທະວີການແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດ.