ກ່າວຄຳເຫັນຕໍ່ວົງການນັກຂ່າວຢູ່ທຳນຽບຂາວ, ທ່ານລັດຖະມົນຕີການຕ່າງປະເທດ Mike Pompeo ກ່າວວ່າ, ການນຳສປປ.ເກົາຫຼີ ໄດ້ສະແດງກັບທ່ານກ່ຽວກັບເລື່ອງພ້ອມແລ້ວທີ່ຈະຫຼຸດຜ່ອນອາວຸດນິວເຄຼຍ. ຕາມທ່ານລັດຖະມົນຕີການຕ່າງປະເທດ Mike Pompeo ແລ້ວ, ທ່ານ Kim Jong un ເຂົ້າໃຈວ່າ ຮູບແບບໃນປະຈຸບັນແມ່ນບໍ່ມີປະສິດທິຜົນ. ນອກນັ້ນ, ທ່ານ Mike Pompeo ກໍ່ໃຫ້ຮູ້ວ່າ, ພາຍຫຼັງການພົບປະສຸດຍອດລະຫວ່າງທ່ານປະທານາທິບໍດີອາເມລິກາ Donald Trump ແລະ ການນຳສປປ.ເກົາຫຼີ Kim Jong un ແລ້ວ, ທ່ານກໍ່ຈະໄປສ.ເກົາຫຼີ, ຍີ່ປຸ່ນ ແລະ ຈີນ ເພື່ອແຈ້ງໃຫ້ການນຳຂອງບັນດາປະເທດດັ່ງກ່າວຊາບກ່ຽວກັບບັນດາບາດກ້າວເດີນຕໍ່ໄປ.

      ກ່ອນໜ້ານັ້ນ, ກ່າວຄຳເຫັນທີ່ການປະຊຸມຂ່າວໃນວັນດຽວກັນ, ພາຍຫຼັງການພົບປະກັບທ່ານນາຍົກລັດຖະມົນຕີຍີ່ປຸ່ນ Shinzo Abe ຢູ່ທຳນຽບຂາວ, ທ່ານປະທານາທິບໍດີອາເມລິກາ Donald Trump ສະແດງຄວາມກຽມພ້ອມໃນການເຊື້ອເຊີນການນຳສປປ.ເກົາຫຼີ Kim Jong un ມາຢ້ຽມຢາມອາເມລິກາ ຖ້າຫາກການພົບປະສຸດຍອດຈະມາເຖິງຢູ່ສິງກະໂປ ດຳເນີນໄປຢ່າງດີງາມ.

      ໃນຂະນະນັ້ນ, ທ່ານນາຍົກລັດຖະມົນຕີຍີ່ປຸ່ນ Abe ໃຫ້ຮູ້ວ່າ, ທ່ານກໍ່ພ້ອມແລ້ວຈະເຈລະຈາໂດຍກົງກັບສປປ.ເກົາຫຼີ, ໃນຄວາມມານະພະຍາຍາມເພື່ອແນໃສ່ແກ້ໄຂບັນຫາກ່ຽວກັບບັນດາພົນລະເມືອງຍີ່ປຸ່ນ ຖືກລອບຈັບຕົວ ແລະ ປັບປຸງການພົວພັນກັບພຽງຢາງ.

      ໃນເຫດການທີ່ກ່ຽວຂ້ອງ, ວັນທີ 07 ມິຖຸນາ, ລັດຖະມົນຕີການຕ່າງປະເທດສປປ.ເກົາຫຼີ ແລະ ສິງກະໂປ ໄດ້ດຳເນີນການເຈລະຈາກ່ອນການພົບປະສຸດຍອດລະຫວ່າງການນຳສປປ.ເກົາຫຼີ ແລະ ປະທານາທິບໍດີອາເມລິກາ ເຊິ່ງຈະດຳເນີນໃນວັນທີ 12 ມິຖຸນາ ຈະມາເຖິງຢູ່ສິງກະໂປ.