ປະເທດມົງໂກນ
(ພາບ: vea.gov.vn)
(vovworld)- ໂດຍໄດ້ຮັບຄຳເຊິນຂອງລັດຖະບານມົງໂກນ, ທ່ານດັ້ງມິງໂກຍ ລັດຖະມົນຕີຊ່ວຍວ່າກະຊວງການຕ່າງປະເທດຫວຽດນາມ ໄດ້ໄປຢ້ຽມຢາມໂມງກົນ ແລະ ເຂົ້າຮ່ວມພິທີສະເຫຼີມສະລອງ 60 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ- ມົງໂກນ (17/11/1954-17/11/2014). ທີ່ການຕ້ອນຮັບທ່ານຮອງລັດຖະມົນຕີຊ່ວຍວ່າການດັ້ງມິງໂກຍ ເມື່ອຕອນບ່າຍວັນທີ 17/11, ທ່ານຮອງນາຍົກລັດຖະມົນຕີໂມງກົນ Terbishdagva ຢືນຢັນວ່າ: ລັດຖະບານ ແລະ ປະຊາຊົນ ມົງໂກນ ຖືເປັນສຳຄັນ ແລະ ປາດຖະໜາຢາກສືບຕໍ່ຊຸກຍູ້ການພົວພັນລະຫວ່າງຫວຽດນາມ-ໂມງກົນ ໃຫ້ພັດທະນາຢ່າງແຮງ, ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນໃນທຸກຂົງເຂດກ່ວາອີກ. ທ່ານຮອງນາຍົກລັດຖະມົນຕີ ເນັ້ນໜັກວ່າ, ໃນໄລຍະຈະມາເຖິງ, ສອງຝ່າຍຕ້ອງເພີ່ມທະວີການແລກປ່ຽນ ແລະ ພົບປະຂັ້ນສູງ, ຫັນການຮ່ວມມືເປັນລະອຽດດ້ວຍບັນດາໂຄງການໃຫ່ຍໃນຂົງເຂດເສດຖະກິດ, ການຄ້າ, ການລົງທຶນ, ສາທາລະນະສຸກ, ວັດທະນະທຳ… ຜ່ານນັ້ນຈະຊ່ວຍເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຄວາມເຂົ້າອົກເຂົ້າໃຈ ແລະ ການຮ່ວມມື ລະຫວ່າງ ຫວຽດນາມ- ມົງໂກນ, ນຳການພົວພັນສອງປະເທດກ້າວເຂົ້າສູ່ໄລຍະພັດທະນາໃໝ່, ສົມກັບການພົວພັນດ້ານການເມືອງອັນຈົບງາມລະຫວ່າງສອງປະເທດ.
ໃນຕອນຄ່ຳຂອງວັນດຽວກັນ, ທີ່ພິທີສະເຫຼີມສະລອງ 60 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງຫວຽດນາມ- ມົງໂກນ, ທ່ານຮອງລັດຖະມົນຕີຊ່ວຍວ່າການດັ້ງມິງໂກຍ ໄດ້ປະດັບຫຼຽນໄຊມິດຕະພາບຂອງລັດຫວຽດນາມ ໃຫ້ແກ່ຊາວ ມົງໂກນ ດີເດັ່ນຈຳນວນ 1 ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການເພີ່ມທະວີ ແລະ ພັດທະນາການພົວພັນມິດຕະພາບ ແລະ ການຮ່ວມມືຫວຽດນາມ- ມົງໂກນ ໃນ 60 ປີຜ່ານມາ.
ເມື່ອຕອບຄຳສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ເນື່ອງໃນເຫດການນີ້, ທ່ານເອກອັກຄະລັດຖະທູດຫວຽດນາມປະຈຳມົງໂກນ ຟານດັງເຢືອງ ຖືວ່າ: ເພື່ອໃຫ້ການພົວພັນທາງການທູດຂອງ 2 ປະເທດກ້າວເຂົ້າສູ່ລວງເລິກ ແລະ ມີປະສິດທິຜົນໃນສະພາບການປະຈຸບັນ, 2 ປະເທດຄວນດຳເນີນບັນດາມາດຕະການຢ່າງຄົບຊຸດ. ທ່ານເອກອັກຄະລັດຖະທູດຫວຽດນາມຟານດັງເຢືອງຊີ້ແຈ້ງວ່າ:
“ພວກເຮົາຄວນສ້າງເງື່ອນໄຂໃຫ້ບັນດາກະຊວງ, ຂະແໜງການ 2 ຝ່າຍ ຜັນຂະຫຍາຍການລົງນາມໃນບັນດາສັນຍາ, ຂໍ້ຕົກລົງສ້າງພື້ນຖານນິຕິກຳ, ສ້າງເງື່ອນໄຂໃຫ້ການຮ່ວມມືເສດຖະກິດ, ການຄ້າພັດທະນາ ( ຄື ສັນຍາກວດກາໂລກລະບາດສຳລັບສັດ ແລະ ພືດ, ສັນຍາການຮ່ວມມືໃນຂົງເຂດທະນາຄານ, ແຮງງານ…). 2 ປະເທດຄວນຮັກສາບັນດາກອງປະຊຸມສະໄໝສາມັນຂອງຄະນະກຳມະການລະຫວ່າງລັດຖະບານ ກ່ຽວກັບການຮ່ວມມືເສດຖະກິດ, ການຄ້າ ແລະ ວິທະຍາສາດເຕັກນິກ ຢ່າງສະໝຳ່ສະເໝີ, ກວດກາຄືນທຸກຂົງເຂດຮ່ວມມືທີ່ພວມຜັນຂະຫຍາຍ, ຂົງເຂດໃດບໍ່ສາມາດເປັນໄປໄດ້ຈະຢຸດຕິ, ຂົງເຂດໃດມີແງ່ຫວັງຄວນຊຸກຍູ້”.