(ທ່ານ ຟ້າມບີ່ງມິງ, ຮອງນາຍົກລັດຖະມົນຕີຕ້ອນຮັບ
ລັດຖະມົນຕີວ່າການກະຊວງການຕ່າງປະເທດ ແລະ ຮ່ວມມື Timor Leste)
(vovworld) – ໂດຍໄດ້ຮັບຄຳເຊີນຂອງທ່ານ ຟ້າມບີ່ງມິງ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ທ່ານ Hernaini Coelho da Silva, ລັດຖະມົນຕີວ່າການກະຊວງການຕ່າງປະເທດ ແລະ ຮ່ວມມື Timor Leste, ຢ້ຽມຢາມ ຫວຽດນາມ ແຕ່ວັນທີ 6 – 8/4. ໃນການເຈລະຈາເມື່ອວັນທີ 7/4, ຢູ່ຮ່າໂນ້ຍ, ທ່ານ ຟ້າມບີ່ງມິງ, ຢັ້ງຢືນນະໂຍບາຍຂອງ ຫວຽດນາມ ທີ່ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນມິດຕະພາບກັບ Timor Leste ໃນຂອບເຂດ 2 ຝ່າຍ ກໍ່ຄືຫຼາຍຝ່າຍ. ທ່ານລັດຖະມົນຕີວ່າການກະຊວງການຕ່າງປະເທດ ແລະ ການຮ່ວມມື Timor Leste ປາດຖະໜາຢາກຮຳ່ຮຽນເອົາບົດຮຽນໃນການພັດທະນາປະເທດຊາດຂອງ ຫວຽດນາມ ກໍ່ຄືຍູ້ແຮງການຮ່ວມມືຕ່າງຝ່າຍຕ່າງມີຜົນປະໂຫຍດກັບ ຫວຽດນາມ. ລັດຖະມົນຕີ 2 ທ່ານສະແດງຄວາມເພິ່ງພໍໃຈຕໍ່ໝາກຜົນທີ່ 2 ຝ່າຍບັນລຸໄດ້ ແລະ ເຫັນດີເປັນເອກະສັນຈະເພີ່ມທະວີການຮ່ວມມືຢ່າງແໜ້ນແຟ້ນກ່ວາອີກໃນຂົງເຂດຕ່າງໆຄື: ການເມືອງ, ເສດຖະກິດ - ການຄ້າ - ການລົງທຶນ, ກະສິກຳ - ປ່າໄມ້ - ສິນໃນນຳ້, ພະລັງງານ, ຖະແຫຼງຂ່າວ - ໂທລະຄົມ.
ລັດຖະມົນຕີ 2 ທ່ານໄດ້ແລກປ່ຽນກ່ຽວກັບບາງບັນຫາຮ່ວມມືພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ຢັ້ງຢືນ 2 ຝ່າຍຈະສືບຕໍ່ເພີ່ມທະວີການສົມທົບກັນຢູ່ບັນດາເວທີປາໄສ ແລະ ອົງການຫຼາຍຝ່າຍ. ກ່ຽວກັບບັນຫາທະເລຕາເວັນອອກ,2 ຝ່າຍໄດ້ເຫັນດີເປັນເອກະສັນຕ້ອງຮັບປະກັນຄວາມສະຫງົບ, ຄວາມປອດໄພ, ຮັບປະກັນໃນການເດີນທະເລ, ການບິນ, ແກ້ໄຂບັນດາຄວາມຂັດແຍ້ງກັນດ້ວຍມາດຕະການສັນຕິພາບບົນພື້ນຖານກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) 1982 ແລະ ຮັກສາສັນຕິພາບ, ສະຖຽນລະພາບຢູ່ພາກພື້ນນີ້.
ກ່ອນໜ້ານັ້ນ, ກໍ່ໃນຕອນບ່າຍວັນດຽວກັນ, ທ່ານ ອວງຈູລືວ, ຮອງປະທານສະພາແຫ່ງຊາດ ຫວຽດນາມ ໄດ້ໃຫ້ການຕ້ອນຮັບ ທ່ານ Hernaini Coelho da Silva, ລັດຖະມົນຕີວ່າການກະຊວງການຕ່າງປະເທດ ແລະ ຮ່ວມມື Timor Leste. ທ່ານຮອງປະທານສະພາແຫ່ງຊາດ ສະເໜີລັດຖະບານ Timor Leste ປັບປຸງລະບຽບການພາຍໃນເພື່ອໃຫ້ສັນຍາການຄ້າ 2 ຝ່າຍລະຫວ່າງ 2 ປະເທດທີ່ໄດ້ຮັບການລົງນາມເມື່ອປີ 2013 ມີຜົນສັດສິດໃນໄລຍະໄວທີ່ສຸດ, ຍູ້ແຮງການຮ່ວມມືດ້ານການຄ້າກ່ຽວກັບເຂົ້າສານໄລຍະ 2015 – 2017… ສ່ວນທ່ານ Hernaini Coelho da Silva ຕີລາຄາສູງບັນດາໝາກຜົນທີ່ ຫວຽດນາມ ບັນລຸໄດ້ໃນວິວັດແຫ່ງການກໍ່ສ້າງ ແລະ ພັດທະນາເສດຖະກິດ - ສັງຄົມ.