ລັດຖະມົນຕີເສດຖະກິດ ອາຊຽນ ທາບທາມຄຳເຫັນກັບຈີນ, ສເກົາຫລີ ແລະ ຍີ່ປຸ່ນ
ພາບ: dantri.com.vn
|
(vovworld) - ທີ່ກອງປະຊຸມທາບທາມຄຳເຫັນຄັ້ງທີ 11 ລະຫວ່າງບັນດາທ່ານລັດຖະມົນຕີເສດຖະກິດ ອາຊຽນ ແລະ ລັດຖະມົນຕີການຄ້າ ຈີນ ໃນຂອບເຂດກອງປະຊຸມລັດຖະມົນຕີເສດຖະກິດ ອາຊຽນ ຄັ້ງທີ 44 (AEM - 44) ຊ່ືງດຳເນີນໄປໃນຕອນເຊົ້າວັນທີ 29/8 ຢູ່ ນະຄອນ ຊຽມຣຽບ ປະເທດ ກຳປູເຈຍ, ສອງຝ່າຍໄດ້ໝັ້ນໝາຍເປີດກວ້າງການຮ່ວມມືດ້ານການຄ້າ ແລະ ການລົງທຶນ. ທີ່ກອງປະຊຸມ, ເນື້ອໃນສຳຄັນຈຳນວນຫນຶ່ງຊື່ງບັນດາທ່ານລັດຖະມົນຕີເສດຖະກິດອາຊຽນ ແລະ ລັດຖະມົນຕີການຄ້າ ຈີນ ຍົກອອກມາປຶກສາຫາລື ແມ່ນພິຈາລະນາຂໍ້ສະເຫນີກ່ຽວກັບເລື່ອງ ຮົ່ງກົງ ເຂົ້າຮ່ວມສັນຍາການຄ້າເສລີ ອາຊຽນ - ຈີນ (ACFTA). ບັນດາທ່ານລັດຖະມົນຕີຂໍໃຫ້ເອົາໃຈໃສ່ເຖິງການຄົ້ນຄ້ວາປະຕິບັດວິວັດການ ຮົ່ງກົງ ເຂົ້າຮ່ວມ ACFTA ແລະ ຊົມເຊີຍການພິຈາລະນາຢ່າງຕັ້ງຫນ້າຂອງບັນດາທ່ານລັດຖະມົນຕີເສດຖະກິດ ອາຊຽນ ສຳລັບຂໍ້ສະເຫນີເຂົ້າຮ່ວມ ACFTA ຂອງຮົ່ງກົງ .
ທີ່ກອງປະຊຸມທາບທາມ ອາຊຽນ - ສເກົາຫລີ ຄັ້ງທີ 9, ສອງຝ່າຍໄດ້ເນັ້ນຫນັກເຖິງຄວາມສຳຄັນໃນການປະຕິບັດສັນຍາແລກປ່ຽນສິນຄ້າ ອາຊຽນ - ສເກົາຫລີຂອງຝ່າຍຕ່າງໆ. ສ່ວນໃນຂອບເຂດກອງປະຊຸມລັດຖະມົນຕີເສດຖະກິດ ອາຊຽນ ຄັ້ງທີ 44 ຈັດຂຶ້ນໃນຕອນບ່າຍວັນທີ 29/8 ໄດ້ດຳເນີນກອງປະຊຸມທາບທາມຄຳເຫັນຮ່ວມຄັ້ງທີ 15 ລະຫວ່າງລັດຖະມົນຕີເສດຖະກິດ ອາຊຽນ ກັບລັດຖະມົນຕີເສດຖະກິດສາມປະເທດຄູ່ເຈລະຈາຢູ່ພາກພື້ນ ອາຊີຕາເວັນອອກສຽງເຫນືອ ນັ້ນແມ່ນ: ຈີນ, ຍີ່ປຸ່ນ ແລະ ສເກົາຫລີ. ບັນດາທ່ານລັດຖະມົນຕີກໍແລກປ່ຽນທັດສະນະກ່ຽວກັບສະພາບເສດຖະກິດໃນທົ່ວໂລກ ແລະ ການພັດທະນາເສດຖະກິດໃນໄລຍະມໍ່ໆມານີ້ຂອງ ອາຊຽນ ແລະ ບັນດາປະເທດ./.