(vovworld) – ພາຍຫຼັງທີ່ລັດເຊຍ ແລະ ບັນດາປະເທດເອີລົບ ບໍ່ເກ້ັຍກອມຢູແກຼນ ຕໍ່ກຳນົດເວລາຢຸດຍິງຢູ່ທິດຕາເວັນອອກຂອງປະເທດນີ້ໄດ້, ລັດຖະມົນຕີການຕ່າງປະເທດ ລັດເຊຍ, ຝລັ່ງ, ເຢຍລະມັນ ແລະ ຢູແກຼນ ໄດ້ພົບປະກັນຢູ່ນະຄອນຫຼວງ Berlin, ເຢຍລະມັນ ໃນວັນທີ 02/07, ເພື່ອຊອກຫາວິທີຊຸກຍູ້ບັນດາຂໍ້ລິເລີມສັນຕິພາບແນໃສ່ແກ້ໄຂວິກິດການທີ່ແກ່ຍາວຢູ່ຢູແກຼນ. ກ່ອນໜ້ານັ້ນ, ທ່ານລັດຖະມົນຕີການຕ່າງປະເທດລັດເຊຍ Sergei Lavrov ໄດ້ມີການໂອ້ລົມທາງໂທລະສັບກັບທ່ານລັດຖະມົນຕີການຕ່າງປະເທດອາເມລິກາ John Kerry ເພື່ອກະຕຸກຊຸກຍູ້ອາເມລິກາ ກໍ່ຄວາມກົດດັນບັງຄັບໃຫ້ອຳນາດການປົກຄອງຢູແກຼນ ຢຸດຕິບັ້ນຮົບດ້ານການທະຫານຢູ່ທິດຕາເວັນອອກ. ນັກການທູດລັດເຊຍ ຢືນຢັນວ່າ ເລື່ອງປະທານາທິບໍດີຢູແກຼນ ບໍ່ຕໍ່ກຳນົດເວລາຢຸດຍິງ ຈະກໍ່ໃຫ້ເກີດການໃຊ້ຄວາມຮຸນແຮງທີ່ນອງເລືອດຄັ້ງໃໝ່ ດ້ວຍຜົນຮ້າຍຢ້ອນຫຼັງທີ່ບໍ່ສາມາດຄາດຄະເນໄດ້. ໃນຂະນະນັ້ນ, ທ່ານ Kerry ຖະແຫຼງວ່າ ອາເມລິກາ ແລະ ບັນດາປະເທດຄູ່ຮ່ວມມືເອີລົບ ຈະສືບຕໍ່ຮຽກຮ້ອງໃຫ້ລັດເຊຍ ຢຸດຕິການກະທຳເຊິ່ງເຂົ້າເຈົ້າຖືວ່າ “ສະໜອງອາວຸດ” ໃຫ້ກຳລັງປ້ອງກັນທ້ອງຖິ່ນຢູ່ທາງທິດຕາເວັນອອກຢູແກຼນ, ມີການເຄື່ອນໄຫວຫຼາຍກວ່າ ເພື່ອຕິດຕາມກວດກາເຂດຊາຍແດນຕິດກັບຢູແກຼນ, ຮຽກຮ້ອງໃຫ້ຝ່າຍທີ່ຮຽກຮ້ອງຫັນເປັນສະຫະພັນປະລະອາວຸດ, ມອບຄືນບັນດາປ້ອມປ້ອງກັນຊາຍແດນເຊິ່ງເຂົ້າເຈົ້າພວມຄວບຄຸມໃຫ້ອຳນາດການປົກຄອງຢູແກຼນ ແລະ ປ່ອຍຕົວຈຳນວນນັກໂທດທີ່ຍັງເຫຼືອ.