ທ່ານລັດຖະມົນຕີການຕ່າງປະເທດລັດເຊຍ Sergei Lavrov
ພາບ:TTXVN
|
(vovworld)- ວັນທີ 20/2, ລັດຖະມົນຕີການຕ່າງປະເທດລັດເຊຍ Sergei Lavrov ຊີ້ແຈ້ງວ່າ: ບັນດາຄຳກ່າວຫາກ່ຽວກັບບົດບາດຂອງບັນດາອົງການແຫ່ງລັດຂອງລັດເຊຍ ໃນກົນອຸບາຍລັດຖະປະຫານຢູ່ Montenegro ເມື່ອເດືອນ 10/2016 ແມ່ນບໍ່ມີຫລັກຖານ.
ລັດຖະມົນຕີການຕ່າງປະເທດລັດເຊຍ Sergei Lavrov ຮຽກຮ້ອງ “ບໍ່ຄວນຖີ້ມໂທດໃສ່ຜູ້ອື່ນ ຫາກຄວນຊອກຫາຄວາມຈິງ”. ໃນວັນດຽວກັນ, ເລຂາສື່ມວນຊົນຂອງປະທານາທິບໍດີ ລັດເຊຍ, ທ່ານ Dmitry Peskov ກໍຄັດຄ້ານຢ່າງແຮງຕໍ່ຄຳຖະແຫລງຂອງ ທ່ານ Milivoje Katnicha, ຫົວຫນ້າອົງການໄອຍະການ Montenegro ໂດຍຖືວ່າ: ບັນດາອົງການຂອງລັດເຊຍ ແມ່ນມີສ່ວນກ່ຽວຂ້ອງເຖິງແຜນການລອບສັງຫານ ນາຍົກລັດຖະມົນຕີ Milo Djukanovic ເພື່ອນຳ ຝ່າຍຄ້ານຢູ່ Montenegro ຂຶ້ນກຳອຳນາດ. ຜູ້ຕາງຫນ້າ ວັງ Kremlin ຢືນຢັນວ່າ: ລັດເຊຍ ບໍ່ແຊກແຊງເຂົ້າວຽກງານພາຍໃນຂອງປະເທດອື່ນ, ພິເສດແມ່ນ Montenegro, ແມ່ນປະເທດເຄີຍມີການພົວພັນອັນດີງາມກັບລັດເຊຍ.
ບັນດາຄຳກ່າວປາໄສດັ່ງກ່າວຂອງເຈົ້າຫນ້າທີ່ລັດເຊຍ ຖືກຍົກອອກມາ ພາຍຫລັງ ຫນັງສືພິມ “Sunday Telegraph” ຂອງອັງກິດ ລົງພິມຂ່າວໂດຍຖືວ່າ: ມີເຈົ້າຫນ້າທີ່ຂອງ Montenegro ຫລາຍທ່ານ ມີຄວາມເຊື່ອໝັ້ນວ່າ ລັດຖະບານ ລັດເຊຍ ຢືນຢູ່ເບື້ອງຫລັງກົນອຸບາຍລອບສັງຫານທ່ານນາຍົກລັດຖະມົນຕີ Milo Djukanovic ຂອງ Montenegro ຊື່ງໄດ້ຮັບການຫນູນຫລັງຈາກຝ່າຍຕາເວັນຕົກ ເມື່ອເດືອນ 11/2016.