(vovworld) – ວັນທີ 21/10, ການເຈລະຈາ 3 ຝ່າຍລະຫວ່າງ ລັດເຊຍ, ຢູແກຼນ ແລະ ສະຫະພາບເອີລົບ (ອີຢູ) ຢູ່ ບຣຸກແຊນ, ປະເທດ ແບນຊິກ ເພື່ອແນໃສ່ແກ້ໄຂບັນດາຄວາມບໍ່ລົງລອຍກັນກ່ຽວກັບອາຍແກັດ ແລະ ລົບລ້າງຄວາມວິຕົກວັງວົນທີ່ວ່າ: ມົດສະກູ ອາດຈະຢຸດຕິການສະໜອງອາຍແກັດໃຫ້ແກ່ ເອີລົບໃນລະດູໜາວຈະມາເຖິງ, ໄດ້ສິ້ນສຸດລົງແຕ່ບໍ່ບັນລຸໄດ້ຂໍ້ຕົກລົງທາງການໃດໆ. ດັ່ງນັ້ນ, ບັນດາຝ່າຍຕ້ອງສືບຕໍ່ພົບປະກັນໃນການເຈລະຈາເຊິ່ງຈັດຕັ້ງໃນວັນທີ 29/10 ຈະມາເຖິງ, ຢູ່ ບຣຸກແຊນ. ກ່າວຄຳເຫັນທີ່ການປະຊຸມຂ່າວ, ກຳມະການພະລັງງານສະຫະພາບເອີລົບ ທ່ານ Guenther Oettinger ປະກາດໃຫ້ບັນດາຝ່າຍໄດ້ເຫັນດີເປັນເອກະສັນກັນຖືວ່າ: ລາຄາອາຍແກັດເຊິ່ງ ຢູແກຼນ ຈະຕ້ອງຈ່າຍໃຫ້ກຸ່ມບໍລິສັດ Gazprom ຂອງລັດເຊຍ ແມ່ນ 385 USD/ພັນແມັດກ້ອນ ດ້ວຍເງື່ອນໄຂຕ້ອງຊຳລະກ່ອນ. ນອກຈາກນັ້ນ, ລັດເຊຍ ອາດຈະສະໜອງອາຍແກັດ 4 ລ້ານແມັດກ້ອນໃຫ້ແກ່ຢູແກຼນ ໃນປີນີ້, ແຕ່ຕ້ອງອີງໃສ່ສະພາບການການເງິນຂອງ ກີແອບ. ທ່ານ Guenther Oettinger ກໍ່ຮັບຮູ້ວ່າ ແຕ່ນີ້ຮອດທ້າຍປີບໍລິສັດ Naftogaz ຂອງ ຢູແກຼນຈະຊຳລະບ້ວງເງິນ 3,1 ຕື້ USD ໃນບ້ວງໜີ້ຊື້ອາຍແກັດຂອງ ລັດເຊຍ. ສ່ວນທ່ານລັດຖະມົນຕີພະລັງງານ ລັດເຊຍ Alexander Novak ສືບຕໍ່ເຕື້ອງເຖິງຄວາມວິຕົກກັງວົນຂອງລັດເຊຍ ກ່ຽວກັບຄວາມສາມາດດ້ານການເງິນຂອງ ຢູແກຼນ ໃນການຊຳລະບ້ວງໜີ້ຊື້ອາຍແກັດຂອງ ມົດສະກູ.