(vovworld) – ວັນທີ 7/4, ບັນດາລັດຖະມົນຕີກະຊວງການຕ່າງປະເທດ ລັດເຊຍ, ເຢຍລະມັນ ແລະ ອາເມລິກາ ໄດ້ດຳເນີນການໂອ້ລົມສົນທະນາທາງໂທລະສັບເພື່ອປຶກສາຫາລືມາດຕະການໃຫ້ແກ່ວິກິດການຢູ່ ຢູແກຼນ. ຕາມກະຊວງການຕ່າງປະເທດ ລັດເຊຍ ແລ້ວ, ໃນການໂອ້ລົມສົນທະນານີ້, ທ່ານລັດຖະມົນຕີການຕ່າງປະເທດ ລັດເຊຍ Sergei Lavrov ຢືນຢັນວ່າ: ຕໍ່ໜ້າສະພາບການເຄັ່ງຕຶງປີນຂັ້ນໄດຢູ່ບັນດາແຂວງທາງພາກຕາເວັນອອກ ຢູແກຼນ, ປະຊາຄົມໂລກຕ້ອງຮີບເຮັ່ງໜູນຊ່ວຍຈັດຕັ້ງການໂອ້ລົມສົນທະນາ ລະຫວ່າງບັນດາພັກຝ່າຍການເມືອງ ແລະ ເຂດພາກຢູ່ພາຍໃນປະເທດ ເອີລົບ ຕາເວັນອອກ ນີ້, ບົນພື້ນຖານເຄົາລົບນັບຖືສິດ ແລະ ຜົນປະໂຫຍດຢ່າງຖືກຕ້ອງຂອງບັນດາຝ່າຍ. ມົດສະກູຖືວ່າ: ການໂອ້ລົມສົນທະນາຄັ້ງນີ້ ຄວນໄດ້ດຳເນີນພາຍໃຕ້ຮູບແບບເປີດ ແລະ ສຸມໃສ່ປຶກສາຫາລືບັນຫາປັບປຸງລັດຖະທຳມະນູນ, ໃນນັ້ນມີການນຳໃຊ້ກົນໄກສະຫະພັນ ຢູແກຼນ. ທັງລັດເຊຍ ແລະ ອາເມລິກາ ລ້ວນແຕ່ເຫັນດີເປັນເອກະສັນສືບຕໍ່ມານະພະຍາຍາມສົມທົບກັນເພື່ອແນໃສ່ຊຸກຍູ້ວິວັດທະນາການໂອ້ລົມສົນທະນານີ້ເພື່ອໃຫ້ຊາວ ຢູແກຼນ ຕັດສິນຊາຕາກຳຂອງປະເທດຕົນເອງ. ສ່ວນຝ່າຍເຢຍລະມັນ, ລັດຖະມົນຕີການຕ່າງປະເທດ Frank – Walter Steinmeier ສະແດງຄວາມພ້ອມແລ້ວທີ່ຈະຮ່ວມມືກັບຂໍ້ສະເໜີຂອງລັດເຊຍ.