ພາບປະກອບ
|
(vovworld) – ທຳນຽບ 5 ແຈໃຫ້ຮູ້ວ່າ: ບັນດາເຈົ້າໜ້າຂັ້ນສູງດ້ານປ້ອງກັນປະເທດຂອງລັດເຊຍ ແລະ ອາເມລິກາ ໄດ້ຈັດຕັ້ງກອງປະຊຸມຜ່ານເຄືອຂ່າຍອິນເຕີເນັດໃນວັນທີ 28/1 ກ່ຽວກັບບັນຫາຄວາມປອດໄພການບິນທາງທະຫານຢູ່ ຊີຣີ ໃນສະພາບການທີ່ກຳລັງ 2 ປະເທດພວມປະຕິບັດບັນດາບັ້ນຮົບບຸກໂຈມຕີທາງອາກາດສະເພາະ ແນໃສ່ບັນດາມືປືນຂອງອົງການ “ລັດອິດສະລາມ” (IS) ອ້າງຊື່ເອງ ຢູ່ປະເທດຕາເວັນອອກກາງນີ້. ເລຂາດ້ານການຂ່າວຂອງທຳນຽບ 5 ແຈ ທ່ານ Peter Cook ໃຫ້ຮູ້ວ່າ: ການປຶກສາຫາລືດຳເນີນໄປໃນຈິດໃຈສ້າງສາ ແລະ 2 ຝ່າຍເຫັນດີເປັນເອກະສັນສືບຕໍ່ປຶກສາຫາລືກ່ຽວກັບຄວາມປອດໄພດ້ານການບິນຕາມກົນໄກເຊິ່ງ 2 ປະເທດໄດ້ຮັບຮອງເອົາໃນເດືອນ 10/2015. ຕາມນັ້ນແລ້ວ, ລັດເຊຍ ແລະ ອາເມລິກາ ສ້າງຕັ້ງບັນດາມາດຕະການການບິນປອດໄພ, ຫລຸດຜ່ອນໄພເກີດອຸບັດຕິເຫດລະຫວ່າງບັນດາເຮືອບິນຂອງກຳລັງທະຫານປະສົມ ແລະ ບັນດາເຮືອບິນຂອງລັດເຊຍ ເຄື່ອນໄຫວໃນເຂດນ່ານຟ້າ ຊີຣີ. ປະຈຸບັນ, ກຳລັງທະຫານປະສົມໂດຍ ອາເມລິການຳໜ້າ ພວມດຳເນີນບັນດາບັ້ນບຸກໂຈມຕີທາງອາກາດແນໃສ່ບັນດາຈຸດໝາຍຂອງ IS ຢູ່ ຊີຣີ ແລະ ອີຣັກ.