(vovworld) - ເນື່ອງໃນການຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການ, ຕອນເຊົ້າວັນທີ 25/11, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ມີການໂອ້ລົມກັບພະນັກງານ, ຄູອາຈານ, ນັກສຶກສາມະຫາວິທະຍາໄລແຫ່ງຊາດ ລາວ. ເຂົ້າຮ່ວມການໂອ້ລົມມີທ່ານເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ບຸນຍັງ ວໍລະຈິດ, ພ້ອມກັບ ພະນັກງານ, ຄູອາຈານ, ນັກສຶກສາມະຫາວິທະຍາໄລແຫ່ງຊາດ ລາວ ປະມານ 1.500 ຄົນ, ການໂອ້ລົມໄດ້ຮັບການຖ່າຍທອດສົດທາງວິທະຍຸກະຈາຍສຽງ ແລະ ໂທລະພາບຈາກນະຄອນຫຼວງ ວຽງຈັນ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ທີ່ການໂອ້ລົມ
|
ໃນບົດຄຳເຫັນໃນເວລາປະມານ 30 ນາທີ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ສະຫງວນເວລາສ່ວນຫຼາຍເພື່ອເຕື້ອງເຖິງການພົວພັນແບບພິເສດ ຫວຽດນາມ - ລາວ ໃນອະດິດຕະການ ກໍ່ຄືໃນປະຈຸບັນ ແລະ ແໜ້ນໜັກເຖິງບົດບາດຂອງລຸ້ນໜຸ່ມໃນການເພີ່ມພຸນຄຸນສ້າງ ແລະ ພັດທະນາການພົວພັນທີ່ເປັນແບບຢ່າງນີ້.
ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັ້ນວ່າ: ໃນພາລະກິດແຫ່ງການຕໍ່ສູ້ຍາດເອົາເອກະລາດ, ເສລີພາບໃຫ້ແກ່ປະເທດຊາດ ກ່ອນນີ້ ກໍ່ຄືໃນໄລຍະປ່ຽນໃໝ່, ສ້າງສາປະເທດຊາດໃນປະຈຸບັນ, 2 ຊາດຮູ້ສຶກເອກອ້າງທະນົງໃຈທີ່ສຸດຍ້ອນເຫັນໄດ້ນ້ຳໃຈຖານສະຫາຍຈົ່ງຮັກພັກດີ, ບໍລິສຸດຜຸດຜ່ອງຂອງກັນ. ສາຍພົວພັນນັ້ນໄດ້ກາຍເປັນສາຍພົວພັນທີ່ເປັນແບບຢ່າງ ແລະ ຫາຍາກຢູ່ໃນໂລກ.
“ການສົມທົບ, ຊ່ວຍເຫຼືອຢ່າງສຸດຈິດສຸດໃຈຖານອ້າຍນ້ອງລະຫວ່າງ 2 ຊາດແມ່ນປັນໄຈສຳຄັນສ້າງເປັນໄຊຊະນະຂອງການປະຕິວັດແຕ່ລະປະເທດ. ການເສຍສະຫຼະອັນສູງສົ່ງໄດ້ກາຍເປັນກຳລັງແຮງ, ເປັນກຳລັງໜູນອັນໃຫຍ່ຫຼວງ, ປະກອບສ່ວນນຳການປະຕິວັດ 2 ປະເທດໄປໄຊຊະນະນີ້ເຖິງໄຊຊະນະອື່ນ, ກ້າວໄປເຖິງໄຊຊະນະຮອບດ້ານໃນປີ 1975. ຮູບພາບເຂົ້າເມັດຫັກ, ຜັກເສັ້ນດຽວກໍ່ແບ່ງປັນກັນໄດ້ກາຍເປັນຮູບພາບອະມະຕະ ຍ້ອງຍໍນ້ຳໃຈມິດຕະພາບອັນສູງສົ່ງ, ການແບ່ງປັນຢ່າງເລິກເຊິ່ງທັງດ້ານວັດຖຸ ແລະ ຈິດໃຈ ຊຶ່ງປະຊາຊົນ 2 ປະເທດໄດ້ສະຫງວນໃຫ້ກັນໃນຍາມທຸກຍາກລຳບາກທີ່ສຸດ”
ບັນດາພະນັກງານ, ຄູສອນ, ນັກສຶກສາມະຫາວິທະຍາໄລແຫ່ງຊາດ ລາວ ເຂົ້າຮ່ວມກອງປະຊຸມ
|
ທ່ານເລຂາທິການໃຫຍ່ ຫງວຽນຟູ໋ຈ້ອງ ໃຫ້ຮູ້ວ່າ ໃນການພົບປະເຈລະຈາກັບການນຳ ສປປ ລາວ ຄັ້ງຕ່າງໆ, ເນື່ອງໃນໂອກາດຢ້ຽມຢາມສັນທະວະໄມຕີ ສປປ ລາວ ຄັ້ງນີ້, ສອງຝ່າຍລ້ວນແຕ່ເຫັນດີເປັນເອກະສັນນຳກັນວ່າ ສາຍພົວພັນສະມັກຄີ ຕິດພັນແບບພິເສດລະຫວ່າງ 2 ປະເທດໄດ້ກາຍເປັນສັບສົມບັດລ້ຳຄ່າທີ່ສຸດຂອງສອງຊາດ, ແມ່ນກົດເກນແຫ່ງຄວາມເປັນຕາຍ, ແມ່ນປັດໄຈຮັບປະກັນໄຊຊະນະຂອງສອງຊາດ ຫວຽດນາມ - ລາວ. ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ຢັ້ງຢືນເຖິງຄວາມພາກພຸມໃຈເມື່ອເຫັນວ່າ, ໃນສະພາບການໂລກມີການຜັນແປ, ການທ້າທາຍຫຼາຍຢ່າງ, ແຕ່ພາລະກິດປະຕິວັດສອງປະເທດຍັງຄົງສືບຕໍ່ບັນລຸໄດ້ບັນດາຜົນງານສຳຄັນໃນການພັດທະນາເສດຖະກິດ, ມີສະຖຽນລະພາບດ້ານການເມືອງ - ສັງຄົມ, ຍົກສູງທີ່ຕັ້ງໃນເວທີສາກົນ.
“ບັນດາຜົນງານອັນໃຫຍ່ຫຼວງ ແລະ ມີຄວາມໝາຍປະຫວັດສາດແມ່ນພະຍານຫຼັກຖານທີ່ມີຊີວິດຊີວາ, ຢັ້ງຢືນເສັ້ນທາງພັດທະນາເຊິ່ງສອງພັກໄດ້ເລືອກແຟ້ນແມ່ນຖືກຕ້ອງທີ່ສຸດ. ບົນພື້ນຖານບັນດາບົດຮຽນອັນລ້ຳຄ່າ ໃນຕະຫຼອດ 30 ປີແຫ່ງການປ່ຽນໃໝ່, ພວກເຮົາເຊື່ອໝັ້ນວ່າ 2 ພັກຈະສືບຕໍ່ຜັນຂະຫຍາຍການປະຕິບັດມະຕິກອງປະຊຸມໃຫຍ່ຂອງແຕ່ລະພັກຢ່າງມີໄຊ, ສ້າງສາປະເທດລາວ ແລະ ປະເທດ ຫວຽດນາມ ໃຫ້ນັບມື້ນັບພັດທະນາຈະເລີນຮຸ່ງເຮືອງ, ສີວິໄລ, ນຳເອົາຊີວິດອິ່ມໜຳສຳລານມາໃຫ້ປະຊາຊົນສອງປະເທດ.”
ເມື່ອເຕື້ອງເຖິງບົດບາດຂອງຊາວໜຸ່ມໃນການຮັກສາ, ພັດທະນາການພົວພັນແບບພິເສດຫວຽດນາມ - ລາວ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັນວ່າ:
“ຂ້າພະເຈົ້າຫວັງວ່າ ພວກເພື່ອນໜຸ່ມຈະອອກແຮງຫຼໍ່ຫຼອມຕົນເອງ ເພື່ອກາຍເປັນແຫຼ່ງຊັບພະຍາກອນມະນູດທີ່ມີຄຸນນະພາບສູງ, ປະກອບສ່ວນປະຕິບັດປະລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝຂອງແຕ່ລະປະເທດ, ຍົກສູງຄວາມຂະຫຍັນຂັນເຄື່ອນ, ມີປະສິດທິຜົນໃນການພົວພັນຫວຽດນາມ - ລາວ ໃນສະພາບການໃໝ່ ກ່ວາອີກ. ການນຳ 2 ປະເທດເຊື່ອໝັ້ນວ່າ, ລຸ້ນໜຸ່ມສອງປະເທດໃນປະຈຸບັນ ແລະ ໃນພາຍພາກໜ້າຈະເຄົາລົບ, ຮັກສາ ແລະ ເສີມຂະຫຍາຍສັບສົມບັດອັນລ້ຳຄ່າ, ເຮັດໃຫ້ປະຫວັດແຫ່ງການພົວພັນລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຮຸ່ງເຮືອງເຫຼືອງເຫຼື້ອມກ່ວາອີກ. ການອຸທິດສ່ວນ ແລະປະກອບສ່ວນຢ່າງສຸດຈິດສຸດໃຈຂອງພວກເພື່ອນຈະກາຍເປັນໜ້າປະຫວັດສາດອັນສະຫງ່າອົງອາດຂອງຊາວໜຸ່ມໄລຍະອັນຟົດຟື້ນ”
ເນື່ອງໃນໂອກາດມາໂອ້ລົມຢູ່ມະຫາວິທະຍາໄລແຫ່ງຊາດລາວ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ມອບໃຫ້ໂຮງຮຽນຄອມພິວເຕີ 30 ຊຸດເພື່ອຮັບໃຊ້ວຽກງານຄົ້ນຄ້ວາ ແລະ ສິດສອນ.