ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ເຮັດວຽກຢູ່ແຂວງລາຍເຈົາ
(ພາບ: chinhphu.vn)
(vovworld) - ວັນທີ 22/07, ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ແລະ ຄະນະປະຕິບັດງານ ໄດ້ລົງຢ້ຽມຢາມ ແລະ ເຮັດວຽກຢູ່ແຂວງລາຍເຈົາ ກ່ຽວກັບສະພາບການພັດທະນາເສດຖະກິດສັງຄົມ. ສະຫຼຸບການເຮັດວຽກ, ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ເອົາໃຈໃສ່ວ່າ ແຂວງ ລາຍເຈົາ ຕ້ອງສຸມໃສ່ສ້າງລະບົບການເມືອງ, ປ້ອງກັນຄວາມສະຫງົບຢູ່ເຂດຊາຍແດນ. ນອກຈາກທ່າແຮງກ່ຽວກັບຕົ້ນຊາ ແລະ ຢາງພາລາ ແລ້ວ, ລາຍເຈົາ ຄວນສືບຕໍ່ເອົາໃຈໃສ່ເຖິງການພັດທະນາກະສິກຳ; ເອົາໃຈໃສ່ເຖິງເຄື່ອງໝາຍການຄ້າ, ພິເສດແມ່ນຕົ້ນຊາ, ຜ່ານນັ້ນປະກອບສ່ວນຫຼຸດຜ່ອນຄວາມທຸກຍາກຢ່າງໝັ້ນຄົງໃຫ້ແກ່ປະຊາຊົນ. ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ຊີ້ແຈ້ງວ່າ: ການພັດທະນາແຫຼ່ງຊັບພະຍາກອນມະນຸດທ້ອງຖິ່ນແມ່ນສຳຄັນ, ພິເສດແມ່ນບຳລຸງສ້າງວິຊາຊີບໃຫ້ແກ່ຄົນງານຊົນນະບົດ, ໜູນຊ່ວຍການບຳລຸງສ້າງໃຫ້ຄົນທຸກຍາກ, ໄວໜຸ່ມຊາວຊົນເຜົ່າສ່ວນໜ້ອຍ ເພື່ອຕອບສະໜອງຄວາມຕ້ອງການໃຊ້ຄົນງານຢູ່ກັບທີ່. ທ່ານຮອງນາຍົກລັດຖະມົນຕີ ຮຽກຮ້ອງໃຫ້ແຂວງ ລາຍເຈົາ ຕ້ອງປະຕິບັດແຜນການພັດທະນາເສດຖະກິດສັງຄົມເປັນຢ່າງດີ, ສຸມໃສ່ສ້າງສະພາບແວດລ້ອມແຫ່ງການລົງທຶນໃຫ້ດີ, ດຶງດູດບັນດາວິສາຫະກິດຜ່ານກົນໄກ, ນະໂຍບາຍຕ່າງໆ. ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ໄດ້ເປັນສັກຂີພິຍານພິທີລົງນາມໃນລະບຽບການສົມທົບວຽກງານ ແລະ ຂໍ້ຕົກລົງຮ່ວມມືຮອບດ້ານລະຫວ່າງແຂວງລາຍເຈົາ ແລະ ກຸ່ມບໍລິສັດອຸດສາຫະກຳຢາງພາລາຫວຽດນາມ.