(vovworld) -     ຕອນ​ບ່າຍ​ວັນ​ທີ 7/9, ຄະນະ​ຜູ້​ແທນກະຊວງ​ຕຳຫຼວດ​ຫວຽດນາມ ​ໂດຍ​ພົນ​ຈັດຕະວາ Nguyen Kim Quy, ຮອງ​ກົມ​ໃຫຍ່, ກົມປ້ອງ​ກັນ​ຄວາມ​ສະຫງົບ​ເລກ 1, ​ນຳ​ໜ້າ ​ໄດ້​​ເຂົ້າ​ຢ້ຽມ​ຄຳນັບ​ທ່ານ​ຮອງລັດຖະມົນຕີກະຊວງປ້ອງ​ກັນ​ຄວາມ​ສະຫງົບ​ລາວ, ພົນ​ຈັດຕະວາ ກົງ​ທອງ ​ພົງ​ວິຈິດ. ທີ່ການ​ພົບ​ປະ, ພົນ​ຈັດຕະວາ Nguyen Kim Quy ​ໄດ້​ຕີ​ລາຄາ​ສູງ​ວຽກ​ງານ​ປ້ອງ​ກັນ​ກອງ​ປະຊຸມ​ຂອງ​ກຳລັງ​ປ້ອງ​ກັນ​ຄວາມ​ສະຫງົບ​ລາວ, ພ້ອມ​ກັນ​ນັ້ນ​ກໍສະ​ແດງ​ຄວາ​ມ​ເຊື່ອ​ໝັ້ນ​ວ່າ, ດ້ວຍ​ຄວາມ​ຕັດສິນ​ໃຈ ​ແລະ ຄວາມ​ມານະ​ພະຍາຍາມ​ຂອງ​ລັດຖະບານ ​ແລະ ກະຊວງ​ປ້ອງ​ກັນ​ຄວາມ​ສະຫງົບ​ລາວ, ກອງ​ປະຊຸມ​ທີ່​ຈະ​ມາ​ເຖິງ​ຈະ​ດຳ​ເນີນ​ໄປ​ຢ່າງ​ປອດ​ໄພ. ສ່ວນ​ທ່ານຮອງລັດຖະມົນຕີ ພົງ​ວິຈິດ ກໍ​ເນັ້ນ​ໜັກ​ວ່າ ບັນດາ​ບົດຮຽນ​ເຊິ່ງຄະນະ​ຜູ້​ແທນ​ກະຊວງ​ຕຳຫຼວດ​ຫວຽດນາມ ​ໄດ້​ແບ່ງປັນ​ໃນ​ການ​ຢ້ຽມຢາມ​ຄັ້ງ​ນີ້ ​ແມ່ນ​ມີ​ຜົນ​ປະ​ໂຫຍ​ດທີ່​ສຸດ, ຊ່ວຍ​ໃຫ້​ກຳລັງ​ປ້ອງ​ກັນ​ຄວາມ​ສະຫງົບ​ລາວ ​ມີ​ບົດ​ຮຽນ​ໃນ​ວຽກ​ງານ​ຕື່ມ​ອີກ, ປະຕິບັດສຳ​ເລັດ​ໜ້າ​ທີ່​ຂອງ​ພັກ ​ແລະ ລັດ​ມອບ​ໝາຍ​ໃຫ້, ຢືນຢັນ​ທີ່​ຕັ້ງ​ບົດບາດ​ຂອງ​ລາວ ​ໃນ​ພາກ​ພື້ນ ​ແລະ ​ໃນ​ໂລກ.

        ​ເນື່ອງ​ໃນ​ໂອກາດ​ນີ້, ພົນ​ຈັດຕະວາ Nguyen Kim Quy ​ໄດ້​ມອບ​ໃຫ້​ກະຊວງ​ປ້ອງ​ກັນ​ຄວາມ​ສະຫງົບ​ລາ​ວ ​ແລະ ບັນດາທ້ອງ​ຖິ່ນ​ພາຫະນະ​ອຸປະກອນ​ວິຊາ​ການເພື່ອ​ຮັບ​ໃຊ້​ວຽກ​ງານ​ຮັບປະກັນ​ຄວາມ​ປອດ​ໄພ​​ໃຫ້ກອງ​ປະຊຸມ ASEM 9.