(vovworld) – ຕອນເຊົ້າວັນທີ 1/7, ຢູ່ນະຄອນຫຼວງຮ່າໂນ້ຍ, ມີຜູ້ແທນເກືອບ 1.200 ຄົນ, ທີ່ຕາງໜ້າໃຫ້ພະນັກງານ, ສະມາຊິກສະມາຄົມຊາວກະສີກອນ, ຊາວກະສີກອນທົ່ວປະເທດ 10 ລ້ານຄົນເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດສະມາຄົມຊາວກະສີກອນຫວຽດນາມຄັ້ງທີ 6. ດ້ວຍຫົວຂໍ້ວ່າ “ສາມັກຄີ - ປ່ຽນໃໝ່ - ເປັນເຈົ້າການ - ເຊື່ອມໂຍງ - ພັດທະນາຢ່າງໝັ້ນຄົງ“. ກອງປະຊຸມໃຫຍ່ຜູ້ແທນທົ່ວປະເທດສະມາຄົມຊາວກະສີກອນຫວຽດນາມຄັ້ງທີ 6 ແມ່ນເຫດການການເມືອງສຳຄັນຂອງຊົນຊັ້ນກຳມະກອນ ແລະ ປະຊາຊົນທົ່ວປະເທດ. ນີ້ແມ່ນໂອກາດເພື່ອໂຄສະນາ, ຍົກສູງຄວາມຮັບຮູ້ຂອງທຸກຂັ້ນ, ທຸກຂະແໜງ, ປະຊາຊົນທຸກຊັ້ນວັນນະ ກ່ຽວກັບທີ່ຕັ້ງ, ບົດບາດ, ໜ້າທີ່ຂອງຊົນຊັ້ນຊາວນາ, ຂອງສະມາຄົມຊາວກະສີກອນຫວຽດນາມ ໃນການພັດທະນາກະສີກຳ, ກໍ່ສ້າງຊົນນະບົດໃໝ່. ໃນ 3 ມື້ແຫ່ງການດຳເນີນ, ກອງປະຊຸມໃຫຍ່ຈະສຶກສາຫາລືກ່ຽວກັບການປະຕິບັດມະຕິກອງປະຊຸມໃຫຍ່ຄັ້ງທີ 5 ອະຍຸການ 2008-2013 ຂອງສະມາຄົມຊາວກະສີກອນຫວຽດນາມ, ວາງອອກໜ້າທີ່ວຽກງານຂອງສະມາຄົມ ແລະ ຂະບວນການຊາວກະສີກອນແຂ່ງຂັນຮັກຊາດອະຍຸການ 2013 – 2018; ປັບປຸງ, ເພີ່ມເຕີມກົດລະບຽບສະມາຄົມຊາວກະສີກອນຫວຽດນາມໃຫ້ເໝາະສົມກັບຄວາມຮຽກຮ້ອງຕ້ອງການ, ໜ້າທີ່ໃນໄລຍະໃໝ່.