ວັນບຸນ “ມິດຕະພາບ, ສາມັກຄີ ກັບຫວຽດນາມ” ຢູ່ຝຣັ່ງ
ທ່ານ ເອກອັກຄະລັດຖະທູດ Duong Chi Dung ແລະ ທ່ານ Daniel Davisse
ເຈົ້າຄອງນະຄອນ Choisy Le Roi
(vovworld) - ວັນທີ 19/5, ໃນຂອບເຂດບັນດາການເຄື່ອນໄຫວສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ສະຖານທູດຫວຽດນາມປະຈຳ ຝຣັ່ງ ໄດ້ສົມທົບກັບອຳນາດການປົກຄອງນະຄອນ Choisy Le Roi, ປະເທດຝຣັ່ງ ຈັດຕັ້ງວັນບຸນ “ມິດຕະພາບ, ສາມັກຄີກັບຫວຽດນາມ” ສຳເລັດຜົນ. ວັນບຸນໄດ້ຖືກຈັດຕັ້ງຂຶ້ນຢູ່ສວນສາທາລະນະຂອງສຳນັກງານປົກຄອງນະຄອນ, ຫ່າງຈາກໃຈກາງນະຄອນຫຼວງ ປາຣີ ປະມານ 20 ກມ. ນີ້ແມ່ນການພົບປະ ແລກປ່ຽນຄັ້ງທຳອິດໄດ້ຖືກຈັດຕັ້ງຂຶ້ນດ້ວຍຂອບຂະໜາດໃຫຍ່ ຕາມຂໍ້ລິເລີ່ມຂອງເອກອັກຄະລັດຖະທູດຫວຽດນາມ ປະຈຳຝຣັ່ງ. ວັນບຸນ ໄດ້ດຳເນີນໄປໃນບັນຍາກາດອົບອຸ່ນ, ເປີດອົກເປີດໃຈ ແລະ ເຂົ້າອົກເຂົ້າໃຈເຊິ່ງກັນ ແລະ ກັນ, ດຶງດູດການເຂົ້າຮ່ວມຂອງປະມານ 50 ອົງການ, ສະມາຄົມຂອງຝຣັ່ງ ແລະ ຊາວຫວຽດນາມ ອາໄສຢູ່ຝຣັ່ງ. ກ່າວຄຳເຫັນທີ່ການພົບປະ, ທ່ານເອກອັກຄະລັດຖະທູດຫວຽດນາມ Duong Chi Dung ໄດ້ຊີ້ແຈ້ງຄວາມໝາຍຂອງວັນບຸນ ແລະ ຖືວ່າ: ເຫດການນີ້ຍິ່ງມີຄວາມໝາຍ ເມື່ອຖືກຈັດຕັ້ງຂຶ້ນກົງກັບໂອກາດສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ຜູ້ທີ່ໄດ້ຜຸກຮັດ ແລະ ເພີ່ມພຸນຄຸນສ້າງຄວາມສາມັກຄີ, ມິດຕະພາບ, ການຮ່ວມມືລະຫວ່າງ 2 ຊາດຫວຽດນາມ ແລະ ຝຣັ່ງ. ທ່ານເອກອັກຄະລັດຖະທູດ Duong Chi Dung ກ່າວວ່າ:
“ຫວຽດນາມ ໄດ້ກ້າວເຂົ້າສູ່ໄລຍະພັດທະນາໃໝ່. ສິ່ງດັ່ງກ່າວບໍ່ມີຄວາມໝາຍວ່າຫວຽດນາມ ບໍ່ຕ້ອງການມີການຊ່ວຍເຫຼືອຕື່ມອີກ, ເຊິ່ງກົງກັນຂ້າມ. ພວກຂ້າພະເຈົ້າຫວັງວ່າ, ບັນດາການເຄື່ອນໄຫວສາມັກຄີກັບ ຫວຽດນາມ ຂອງພວກເພື່ອນຈະເປີດວິໄສທັດໃໝ່, ສອດຄ່ອງກັບບັນດາບຸລິມະສິດພັດທະນາເສດຖະກິດ - ສັງຄົມຂອງຫວຽດນາມ ແຕ່ນີ້ຮອດປີ 2020, ໃນນັ້ນ, ມະນຸດແມ່ນຈຸດໝາຍມ້ງໄປເຖິງ, ທັງແມ່ນເປົ້າໝາຍຂອງການພັດທະນາແບບຍືນຍົງ ແລະ ມີຄວາມຮັບຜິດຊອບ, ພ້ອມທັງສະຫງວນບຸລິມະສິດໃຫ້ແກ່ບັ້ນເຄື່ອນໄຫວຕ້ານຄວາມທຸກຍາກອຶດຫິວ”
ກໍໃນຂອບເຂດວັນບຸນນີ້, ມີການໂອ້ລົມສົນທະນາ 3 ຄັ້ງ ດ້ວຍ 3 ຫົວເລື່ອງສະເພາະກ່ຽວກັບການໜູນຊ່ວຍຫວຽດນາມ ນັ້ນແມ່ນ: “ມະນຸດສະທຳ: ສາມັກຄີເພື່ອຜູ້ປະສົບເຄາະຮ້າຍຈາກທາດຜິດສີສົ້ມ ດີໂອຊີນ”, “ສຸຂະພາບ” ແລະ “ພັດທະນາແບບຍືນຍົງ: ເພີ່ມທະວີການສຶກສາບຳລຸງສ້າງ, ປົກປັກຮັກສາສິ່ງແວດລ້ອມ”