(VOVWORLD) - ໃນວັນທີ 02 ສິງຫາ, ໄດ້ດຳເນີນບັນດາວາລະຄົບຄະນະ ແລະ ວົງແຄບຂອງກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 51, ໂດຍມີການເຂົ້າຮ່ວມຂອງລັດຖະມົນຕີການຕ່າງປະເທດ ທີ່ມາຈາກ 10 ປະເທດ ອາຊຽນ ແລະ ເລຂາທິການໃຫຍ່ ອາຊຽນ.
 ວາລະຄົບຄະນະ ແລະ ວາລະວົງແຄບຂອງກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 51 |
ທ່ານ ຟ້າມບີ່ງມິງ ຮອງນາຍົກລັດຖະມັນຕີ, ລັດຖະມັນຕີການຕ່າງປະເທດ ໄດ້ນຳພາຄະນະຜູ້ແທນ ຫວຽດນາມ ເຂົ້າຮ່ວມບັນດາກິດຈະກຳທີ່ກ່າວມາຂ້າງເທິງ.
ກ່າວຄຳເຫັນໃນກອງປະຊຸມ, ທ່ານຮອງນາຍົກລັດຖະມົນຕີ ຟ້າມບີ່ງມິງ ໄດ້ຮັບຮອງບັນດາຄວາມຄືບໜ້າຫຼາຍດ້ານໃນການຮ່ວມມື ອາຊຽນ ແລະ ລະຫວ່າງ ອາຊຽນ ກັບບັນດາຄູ່ຮ່ວມມື. ຕໍ່ໜ້າບັນດາການຫັນປ່ຽນຢ່າງໄວວາ, ຍາກທີ່ຈະຄາດຄະເນໄວ້ລ່ວງໜ້າໃນສະພາບການຢູ່ພາກພື້ນ ແລະ ສາກົນ, ທ່ານຮອງນາຍົກລັດຖະມົນຕີສະເໜີໃຫ້ ອາຊຽນ ຕ້ອງໄດ້ເອົາໃຈໃສ່ການຮ່ວມມືພາຍໃນກຸ່ມຫຼາຍກວ່າເກົ່າ, ໃນນັ້ນ ຕ້ອງມີບັນດາມາດຕະການສະເພາະເພື່ອອຳນວຍຄວາມສະດວກໃຫ້ແກ່ການຄ້າ, ການລົງທຶນພາຍໃນກຸ່ມ, ຄຽງຄູ່ກັບການສືບຕໍ່ຍູ້ແຮງການຮ່ວມມືຮັດແຄບຄວາມແຕກໂຕນກັນໃນການພັດທະນາ ແລະ ການເຊື່ອມຕໍ່.
ກ່ຽວກັບບັນຫາສັນຕິພາບ ແລະ ຄວາມສະຫງົບ, ທ່ານຮອງນາຍົກລັດຖະມັນຕີ ສະເໜີ ອາຊຽນ ຕ້ອງຮັກສາຄວາມສາມັກຄີ ແລະ ບົດບາດເປັນແກ່ນກາງ, ພ້ອມດຽວກັນນັ້ນ ຍົກສູງຄວາມສາມາດລວມໝູ່ ເພື່ອສາມາດຮັບມື ຕໍ່ກັບບັນດາສີ່ງທ້າທາຍທີ່ວາງອອກ ຢ່າງມີປະສິດທິຜົນ.
ກ່ຽວກັບບັນຫາທະເລຕາເວັນອອກ, ທ່ານຮອງນາຍົກລັດຖະມົນຕີແບ່ງປັນຄວາມວິຕົກກັງວົນ ກ່ຽວກັບບັນດາການເຄື່ອນໄຫວມໍ່ໆມານີ້ ໃນສະພາບຕົວຈິງ, ໃນນັ້ນ, ມີບັນດາການເຄື່ອນໄຫວທາງດ້ານການທະຫານ, ສົ່ງຜົນກະທົບຕໍ່ສັນຕິພາບ, ຄວາມໝັ້ນຄົງຢູ່ພາກພື້ນກໍ່ຄືຄວາມໄວ້ເນື້ອເຊື່ອໃຈ ລະຫວ່າງ ບັນດາປະເທດ; ຕາມນັ້ນແລ້ວ, ສະເໜີບັນດາຝ່າຍຕ້ອງລະງັບໃຈ, ບໍ່ຄວນມີບັນດາການເຄື່ອນໄຫວເຮັດໃຫ້ສະພາບການສັບສົນຂື້ນຕື່ມ, ເຄົາລົບປະຕິບັດບັນດາຫຼັກການ ແລະ ຄຳໝັ້ນສັນຍາທີ່ໄດ້ຕົກລົງກັນ.