ວາລະປະຊຸມປະຈຳເດືອນຂອງລັດຖະບານຫວຽດນາມ
ພາບປະກອບ ຈາກ internet
|
(vov) - ໃນວັນທີ 5 ແລະ 6/3 ຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີຢູງ ໄດ້ເປັນປະທານວາລະປະຊຸມປະຈຳເດືອນ 2/2012. ຕາມການສະຫລຸບທີ່ວາລະປະຊຸມ, ສະພາບການເສດຖະກິດສັງຄົມໃນເດືອນ 2 ແລະ ສອງເດືອນຕົ້ນປີສືບຕໍ່ບັນລຸບັນດາໝາກຜົນດີພໍສົມຄວນ. ຖ້າວ່າ 2 ເດືອນຕົ້ນປີ 2011, ໄພເງິນເຟີ້ຢູ່ໃນລະດັບ 3,87%, 2 ເດືອນຕົ້ນປີ 2012 ນີ້ ໄພເງິນເຟີ້ພຽງ 2,38%. ທະນາຄານການຄ້າຈຳນວນຫນຶ່ງໄດ້ຫລຸດອັດຕາດອກເບ້ຍ, ປະກອບສ່ວນແກ້ໄຂຄວາມຫຍຸ້ງຍາກໃນການຜະລິດດຳເນີນທຸລະກິດ. ການສົ່ງອອກໃນ 2 ເດືອນຕົ້ນປີ ບັນລຸກວ່າ 15 ຕື້ USD ເພີ່ມຂຶ້ນເກືອບ 25% ເມື່ອທຽບໃສ່ກັບໄລຍະດຽວກັນຂອງປີກ່າຍ. ກ່າວຄຳເຫັນທີ່ວາລະປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີໃຫ້ບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆຕ້ອງ ສືບຕໍ່ຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ທະນາຄານແຫ່ງລັດ ຕ້ອງບໍລິຫານເພື່ອຮັກສາອັດຕາແລກປ່ຽນເປັນປົກກະຕິ, ສືບຕໍ່ປົວແປງຄວາມສາມາດການຊຳລະຂອງລະບົບ ແລະ ຍູ້ແຮງການສ້າງໂຄງປະກອບທະນາຄານຄືນໃຫມ່ຢ່າງແຫນ້ນແຟ້ນ.
“ພາຍຫລັງວາລະປະຊຸມຄັ້ງນີ້, ທ່ານນາຍົກລັດຖະມົນຕີສະເຫນີໃຫ້ທະນາຄານແຫ່ງລັດຕ້ອງຫລຸດຜ່ອນອັດຕາດອກເບ້ຍໃນທັນທີ່. ຮັກສາອັດຕາແລກປ່ຽນເປັນປົກກະຕິ, ຄວາມສາມາດການຊຳລະຂອງທະນາຄານໄດ້ແກ້ໄຂໄດ້ບາດກ້າວສຳຄັນຫນຶ່ງ, ການເຄື່ອນໄຫວຂອງບັນດາທະນາຄານທີ່ປະສົບກັບຄວາມຫຍຸ້ງຍາກໃນໄລຍະຜ່ານມາມີສັນຍານດີຂຶ້ນ.”
ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີໃຫ້ບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆ ສຸມໃສ່ໃນລະດັບສູງສຸດເພື່ອແກ້ໄຂຄວາມຫຍຸ້ງຍາກ ດ້ວຍກົນໄກ, ນະໂຍບາຍລະອຽດສຳລັບແຕ່ລະຂົງເຂດ, ແຕ່ລະຮູບການວິສາຫະກິດ ເພື່ອຊຸກຍູ້ການຜະລິດດຳເນີນທຸລະກິດພັດທະນາ.
ແລະກໍໃນວາລະປະຊຸມ, ບັນດາສະມາຊິກໃນຄະນະລັດຖະບານ ໄດ້ປະກອບຄຳເຫັນບາງບັນຫາໃຫຍ່ທີ່ກ່ຽວຂ້ອງເຖິງການສະຫລຸບ 5 ປີ ແຫ່ງການປະຕິບັດມະຕິສູນກາງພັກຄັ້ງທີ 3 ຊຸດທີ 10 ກ່ຽວກັບການເພີ່ມທະວີການນຳພາຂອງພັກສຳລັບວຽກງານປ້ອງກັນ, ຕ້ານໄພສໍ້ລາດບັງຫລວງ, ການຟຸມເຟືອຍ. ແຜນຮ່າງບາງບັນຫາຮັບປະກັນຊີວິດສັງຄົມໄລຍະ 2012 - 2020 ແລະ ເອກະສານນິຕິກຳສຳຄັນຈຳນວນຫນຶ່ງ.