(vovworld) - ວາລະສານພາສາຝລັ່ງ “Francophonie Actualites”, ເຊິ່ງແມ່ນວາລະສານທີ່ມີຊື່ສຽງຂອງຝລັ່ງ, ໄດ້ຈຳໜ່າຍຢູ່ຫຼາຍປະເທດໃນໂລກ ຫາກໍ່ອອກສະບັບພິເສດ 40 ໜ້າແມ່ນສະຫງວນເພື່ອລົງພິມບັນດາຂ່າວ ແລະ ບົດໂຄສະນາກ່ຽວກັບຜົນງານຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ແລະ ຜົນງານໄລຍະ 30 ປີແຫ່ງການປ່ຽນໃໝ່ຂອງຫວຽດນາມ. ບັນດາຂ່າວ, ບົດກ່ຽວກັບຫວຽດນາມໂດຍນັກຂ່າວ Joseph Ahekoe, ຜູ້ອຳນວຍການຮັບຜິດຊອບການພິມຈຳໜ່າຍ ພ້ອມທັງເປັນທູດພິເສດຂອງວາລະສານ ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ເປັນຜູ້ຂຽນ, ໃນນັ້ນມີຫຼາຍບົດສັງລວມ, ບົດສຳພາດ, ໄຈ້ແຍກເຮັດໃຫ້ຫວຽດນາມ ພົ້ນເດັ່ນມີສະຖຽນລະພາບທາງດ້ານການເມືອງ, ມີລະດັບເຕີບໂຕເສດຖະກິດສູງໃນຫຼາຍທົດສະວັດ, ປະຕິບັດວຽກງານການເຊື່ອມຕໍ່ລະດັບເຕີບໂຕດ້ານເສດຖະກິດກັບຄວາມກ້າວໜ້າ ແລະ ຄວາມຍຸຕິທຳທາງສັງຄົມນັບມື້ນັບດີ.
ໃນບົດຂຽນ “30 ປີແຫ່ງການປ່ຽນໃໝ່ ດ້ວຍເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ”, ນັກຂ່າວ Joseph Ahekoe ຢືນຢັນວ່າ, ພາລະກິດແຫ່ງການປ່ຽນໃໝ່ ໄດ້ເລີ່ມປະຕິບັດເມື່ອປີ 1986 ດ້ວຍເນື້ອແທ້ແມ່ນການປະຕິວັດຂອງວິວັດການຫັນປ່ຽນຢ່າງເລິກເຊິ່ງ, ຮອບດ້ານເພື່ອແນໃສ່ປະຕິບັດເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມປະຊາທິປະໄຕ, ຍຸຕິທຳ, ສີວິໄລ”. ຕາມບົດຂຽນແລ້ວ, ພາຍຫຼັງໄລຍະ 30 ປີແຫ່ງການປ່ຽນໃໝ່ (1986 - 2016), ປະຈຸບັນ, ຫວຽດນາມພວມຍູ້ແຮງພາລະກິດຫັນປະເທດຊາດເປັນປະເທດອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນ. ໄລຍະ 30 ປີແຫ່ງການປ່ຽນແປງໃໝ່ແມ່ນໄລຍະປະຫວັດສາດສຳຄັນ ໃນພາລະກິດພັດທະນາຂອງປະເທດຊາດ, ເປັນຂີດໝາຍແຫ່ງການເຕີບໃຫຍ່ ແລະ ເຂັ້ມແຂງຂອງພັກ, ລັດ ແລະ ປະຊາຊົນຫວຽດນາມ. ການປະສົມປະສານລະຫວ່າງການຂຽນບົດໄຈ້ແຍກ ແລະ ການໃຫ້ຂໍ້ສັງເກດແມ່ນບັນດາເອກະສານຫວນຄືນບັນດາກອງປະຊຸມໃຫຍ່ຂອງພັກຄັ້ງຕ່າງໆ, ບົດສຳພາດບັນດາການນຳຫວຽດນາມ. ວາລະສານກໍ່ໄດ້ແນະນຳກ່ຽວກັບການຫັນປ່ຽນຂອງບັນດານະຄອນໃຫຍ່ຂອງຫວຽດນາມຄື: ຮ່າໂນ້ຍ, ນະຄອນໂຮ່ຈິມິນ, ດ່ານັ້ງ, ຫາຍຟ່ອງ, ໂຮ້ຍອານ. ບົດຂຽນຍັງໄດ້ລົງພິມບັນດາເອກະສານ ແລະ ແຜນທີ່ປະຫວັດສາດທີ່ຢັ້ງຢືນເຖິງອະທິປະໄຕສຳລັບ 2 ໝູ່ເກາະຮ່ວາງຊາ ແລະ ເຈື່ອງຊາຂອງຫວຽດນາມ.