(vovworld) - ຕອນເຊົ້າວັນທີ 06/05, ຢູ່ຮ່າໂນ້ຍ, ທ່ານນາງຮ່າທິຄ໋ຽດ, ຫົວໜ້າຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມ ໄດ້ລົງຢ້ຽມຢາມ, ອວຍພອນສະພາບໍລິຫານງານສູນກາງສະມາຄົມພຸດທະສາສະໜາຫວຽດນາມ ເນື່ອງໃນໂອກາດວັນບຸນວິສາຂະບູຊາ ປີ 2014. ທ່ານນາງ ຮ່າທິຄ໋ຽດ ໄດ້ຕີລາຄາສູງ ແລະ ຮັບຮູ້ບັນດາການປະກອບສ່ວນຂອງສະມາຄົມພຸດທະສາສະໜາຫວຽດນາມໃນການປະຕິບັດບັນດາການເຄື່ອນໄຫວກຸສົນສັງຄົມ; ກໍ່ສ້າງວັດຢູ່ບັນດາເຂດປະສົບກັບຄວາມຫຍຸ້ງຍາກ, ເຂດໝູ່ເກາະທະເລ. ທ່ານນາງ ຮ່າທິຄ໋ຽດ ປາດຖະໜາວ່າ ສະມາຄົມພຸດທະສາສະໜາຫວຽດນາມ ສືບຕໍ່ຮ່ວມເດີນທາງພ້ອມກັບປະເທດຊາດ, ຕັ້ງໜ້າເຂົ້າຮ່ວມການພັດທະນາເສດຖະກິດ, ສັງຄົມ, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ປະກອບສ່ວນເຂົ້າໃນພາລະກິດປ່ຽນໃໝ່ປະເທດຊາດ. ທີ່ການຕ້ອນຮັບ, ພະອາຈານມະຫາ ທິ໋ກແທງຍ້ຽວ, ຮອງປະທານຜູ້ປະຈຳການສະພາບໍລິຫານງານສູນກາງສະມາຄົມພຸດທະສາສະໜາຫວຽດນາມ ໄດ້ຂອບໃຈຕໍ່ຄວາມເອົາໃຈໃສ່ຂອງພັກ, ລັດ ກໍ່ຄືບັນດາຄະນະ, ຂະແໜງການ, ໝູ່ຄະນະ ແລະ ອຳນາດການປົກຄອງທຸກຂັ້ນ ເຊິ່ງໄດ້ເອົາໃຈໃສ່, ສ້າງເງື່ອນໄຂເພື່ອໃຫ້ສະມາຄົມພຸດທະສາສະໜາຫວຽດນາມ ເຄື່ອນໄຫວນັບມື້ນັບມີປະສິດທິຜົນ. ກ່ຽວກັບວຽກງານກະກຽມໃຫ້ວັນບຸນວິສາຂະບູຊາ ປີ 2014, ພະມະຫາອາຈານ ທິ໋ກແທງຍ້ຽວ ໃຫ້ຮູ້ວ່າ: ມາຮອດປະຈຸບັນ, ວຽກງານກະກຽມໃຫ້ວັນບຸນວິສາຂະບູຊາໄດ້ສຳເລັດໂດຍພື້ນຖານແລ້ວ ເພື່ອຕ້ອນຮັບບັນດາຜູ້ແທນພາຍໃນ ແລະ ຜູ້ແທນຕ່າງປະເທດກວ່າ 80 ຄະນະ.