(vovworld) - ເນື່ອງໃນໂອກາດກອງປະຊຸມການທູດຄັ້ງທີ 29, ຕອນບ່າຍວັນທີ 25/08, ຢູ່ສຳນັກງານປະທານປະເທດ, ທ່ານປະທານປະເທດ ເຈີນດ້າຍກວາງ ໄດ້ມີການພົບປະ ແລະ ໂອ້ລົມກັບບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ຢູ່ຕ່າງປະເທດ ກັບມາເຂົ້າຮ່ວມກອງປະຊຸມ. ທ່ານປະທານປະເທດ ເຈີນດ້າຍກວາງ ໄດ້ແລກປ່ຽນກັບບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ຢູ່ຕ່າງປະເທດ ກ່ຽວກັບບັນດາຜົນງານຂອງປະເທດຊາດ ໃນການພັດທະນາເສດຖະກິດ, ວັດທະນະທຳ, ສັງຄົມ, ການປ້ອງກັນຊາດປ້ອງກັນຄວາມສະຫງົບ… ໃນການເຊື່ອມໂຍງເຂົ້າກັບສາກົນ, ການພົວພັນກັບບັນດາຄູ່ຮ່ວມມືສຳຄັນ, ສ້າງກອບການພົວພັນມິດຕະພາບກັບບັນດາປະເທດ, ຮັກສາເອກະລາດ, ອະທິປະໄຕ, ເອກະພາບ, ພືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ, ຍົກສູງທີ່ຕັ້ງບົດບາດຂອງຫວຽດນາມ ບົນເວທີສາກົນ. ທ່ານປະທານປະເທດ ເຈີນດ້າຍກວາງ ຊີ້ແຈ້ງວ່າ, ມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ໄດ້ກຳນົດແຈ້ງແນວທາງ, ນະໂຍບາຍ, ທິດນຳ, ຫຼັກການ ແລະ ໜ້າທີ່ວຽກງານການທູດ ດ້ວຍຈິດໃຈເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ, ຮັກສາສະພາບແວດລ້ອມສັນຕິພາບ, ສະຖຽນລະພາບໃຫ້ໝັ້ນຄົງ, ຍາດແຍ່ງບັນດາແຫຼ່ງກຳລັງພາຍນແກເພື່ອພັດທະນາປະເທດຊາດ… ບົນຈິດໃຈນີ້, ທ່ານປະທານປະເທດ ເຈີນດ້າຍກວາງ ສະເໜີໃຫ້ບັນດາອົງການຕາງໜ້າຫວຽດນາມ ຢູ່ຕ່າງປະເທດເອົາໃຈໃສ່ເປັນພິເສດສືບຕໍ່ປ່ຽນໃໝ່ແນວຄິດພົວພັນກັບຕ່າງປະເທດ ຕາມທິດຫັນປ່ຽນຈຸດສຸມຢ່າງແຮງ ແລະ ບຸລິມະສິດຮັບໃຊ້ຄາດໝາຍພັດທະນາແບບຍືນຍົງຂອງປະເທດຊາດ, ຮັບໃຊ້ຜົນປະໂຫຍດຂອງປະເທດຊາດໃຫ້ເປັນຢ່າງດີທີ່ສຸດ, ຍົກສູງທີ່ຕັ້ງຂອງຫວຽດນາມ ບົນເວທີສາກົນ.