(vovworld) - ວັນທີ 17/7, ກ່າວຄຳເຫັນຊີ້ນຳທີ່ກອງປະຊຸມຜ່ານເຄືອຂ່າຍ ອິນເຕີເນັດກ່ຽວກັບການຜັນຂະຫຍາຍໜ້າທີ່ການເງິນ - ງົບປະມານ 6 ເດືອນທ້າຍປີ 2013 ກັບບັນດາແຂວງ, ນະຄອນ ຂຶ້ນກັບສູນກາງ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຮຽກຮ້ອງໃຫ້ຂະແໜງການເງິນຕ້ອງປະຕິບັດໜ້າທີ່ວາງອອກໃຫ້ໄດ້ນັ້ນແມ່ນສຸມໃສ່ຊີ້ນຳບໍລິຫານຢ່າງຂ້ຽວຂາດ, ສູ້ຊົນບັນລຸຜົນງານສູງສຸດ ແລະ ປະຕິບັດສຳເລັດແຜນງົບປະມານແຫ່ງລັດປີ 2013, ບໍ່ດັດປັບການດຸນດ່ຽງລາຍຮັບ - ລາຍຈ່າຍງົບປະມານປີ 2013. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ: ກ້າວເຂົ້າສູ່ປີ 2013, ເສດຖະກິດໂລກສືບຕໍ່ມີການຜັນແປຢ່າງສັບສົນ, ບໍ່ທັນເປັນປົກກະຕິເທື່ອ ແລະ ຍັງມີຄວາມສ່ຽງຫຼາຍຢ່າງ. ຢູ່ພາຍໃນປະເທດ, ເຖິງວ່າບັນລຸໄດ້ບັນດາໝາກຜົນສຳຄັນໃນການຄວບຄຸມໄພເງີນເຟີ້, ຮັກສາເສດຖະກິດມະຫາພາກໃຫ້ເປັນປົກກະຕິ ແລະ ບັນລຸໄດ້ລະດັບເຕີບໂຕເໝາະສົມ, ຮັບປະກັນຊີວິດສັງຄົມ, ພື້ນຖານເສດຖະກິດ ຫວຽດນາມ ຍັງຕ້ອງປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ. ຕາມທ່ານນາຍົກລັດຖະມົນຕີ ຫງວຽນເຕີນຢູງ ແລ້ວ, ດ້ວຍຄວາມມານະພະຍາຍາມຂອງລະບົບການເມືອງ, ຂອງປະຊາຄົມວິສາຫະກິດ ແລະ ປະຊາຊົນ ໃນທົ່ວປະເທດ, ສະພາບເສດຖະກິດ - ສັງຄົມຂອງປະເທດໃນ 6 ເດືອນຕົ້ນປີ 2013 ສືບຕໍ່ມີການຫັນປ່ຽນຢ່າງຕັ້ງໜ້າ, ຖືກທິດ, ສ້າງປະຖົມປັດໄຈໃຫ້ການປະຕິບັດແຜນການພັດທະນາເສດຖະກິດ - ສັງຄົມປີ 2013 ຢ່າງມີໄຊ... ເສດຖະກິດມະຫາພາກເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ການສົ່ງອອກສືບຕໍ່ເພີ່ມຂຶ້ນສູງ (ຄືເພີ່ມຂຶ້ນ 16% ເມື່ອທຽບໃສ່ໄລຍະດຽວກັນຂອງປີກາຍ), ອັດຕາແລກປ່ຽນເງິນຕາ ແລະ ຕະຫຼາດເງິນຕ່າງປະເທດເປັນປົກກະຕິໂດຍພື້ນຖານ, ການຜະລິດ ດຳເນີນທຸລະກິດໃນບັນດາຂົງເຂດລ້ວນແຕ່ມີການເຕີບໂຕ, GDP 6 ເດືອນຕົ້ນປີເພີ່ມຂຶ້ນ 4,9%.... ກ່ຽວກັບໜ້າທີ່ໃນ 6 ເດືອນທ້າຍປີ 2013, ທ່ານ ຫງວຽນເຕີນຢູງ ສະເໜີໃຫ້ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆຈົ່ງປະຕິບັດບັນດາມາດຕະການເພີ່ມທະວີການຄຸ້ມຄອງການໃຊ້ຈ່າຍງົບປະມານ, ຮັບປະກັນຢ່າງແໜ້ນແຟ້ນ, ມີປະສິດທິຜົນ ເພື່ອປະຕິບັດການປະຢັດ, ຕ້ານການຟຸມຟືອຍ ຢ່າງມີປະສິດທິຜົນ.