ສັນຍານຕັ້ງໜ້າໃນການພົວພັນລະຫວ່າງ ຕວັກກີ - ອາເມລິກາ
(VOVWORLD) -ວັນທີ 24 ມີນາ, ທ່ານລັດຖະມົນຕີການຕ່າງປະເທດຕວັກກີ Mevlut Cavusoglu ໃຫ້ຮູ້ວ່າ ທ່ານໄດ້ມີການໂອ້ລົມສົນທະນາທີ່ມີລັກສະນະສ້າງສັນ ກັບຄູ່ຕຳແໜ່ງ ອາເມລິກາ Antony Blinken ກ່ຽວກັບທຸກດ້ານທີ່ກ່ຽວຂ້ອງເຖິງການພົວພັນສອງຝ່າຍ.
ນີ້ແມ່ນການພົບປະໂດຍກົງຄັ້ງທຳອິດ ລະຫວ່າງ ລັດຖະມົນຕີການຕ່າງປະເທດສອງປະເທດ ນັບແຕ່ເມື່ອທ່ານ Joe Biden ຮັບດຳລົງຕຳແໜ່ງເປັນປະທານາທິບໍດີ ອາເມລິກາ.
 ທ່ານລັດຖະມົນຕີການຕ່າງປະເທດຕວັກກີ Mevlut Cavusoglu (ພາບ: AFP/TTXVN) |
ການພົບປະລະຫວ່າງລັດຖະມົນຕີການຕ່າງປະເທດສອງປະເທດ ຖືກຈັດຂຶ້ນຢູ່ສຳນັກງານ ອົງການສົນທິສັນຍາອັດລັງຕິກເໜືອ (NATO) ຢູ່ນະຄອນຫຼວງ ບຣຸກແຊນ, ປະເທດ ແບນຊິກ, ຢູ່ນອກກອງປະຊຸມລັດຖະມົນຕີ NATO.
ທີ່ການໂອ້ລົມສົນທະນາ, ສອງຝ່າຍໄດ້ປຶກສາຫາລືກ່ຽວກັບບັນດາການໂຕ້ຖຽງກັນທີ່ກ່ຽວຂ້ອງເຖິງເລື່ອງ Ankara ຊື້ລະບົບລູກສອນໄຟ S – 400 ຂອງ ລັດເຊຍ, ສະພາບການປະທະກັນຢູ່ ຊີຣີ ແລະ ລີບີ ກໍຄືສະພາບການຢູ່ທະເລ ເມດີເຕຣາເນ.