ທ່ານນາຍົກລັດຖະມົນຕີ ລາວ ທອງສິງ ທຳມະວົງ ໂອ້ລົມກັບບັນດາຜູ້ແທນເຂົ້າຮ່ວມກອງປະຊຸມສຳມະນາ
(ພາບ: Hoàng Chương/Vietnam+)
(vovworld) – ວັນທີ 3/5, ໂດຍປະຕິບັດຕາມຂໍ້ຕົກລົງຂອງກົມການເມືອງສູນກາງພັກປະຊາຊົນປະຕິວັດລາວ, ຢູ່ເຂດປູຊະນີຍະສະຖານປະຫວັດສາດ ວຽງໄຊ, ແຂວງ ຫົວພັນ, ກະຊວງປ້ອງກັນປະເທດ ລາວ ແລະ ອຳນາດການປົກຄອງແຂວງ ຫົວພັນ ໄດ້ສົມທົບກັນຈັດຕັ້ງກອງປະຊຸມສຳມະນາວິທະຍາສາດບັ້ນຮົບພາກເໜືອ - ປົດປ່ອຍ ຊຳເໜືອ. ມີບົດທາບທາມຄວາມເຫັນກ່ວາ 20 ບົດທີ່ກອງປະຊຸມສຳມະນາ ໄດ້ຊີ້ແຈ້ງເຖິງການນຳພາທີ່ສະຫຼາດສ່ອງໄສຂອງລັດຖະບານ ຫວຽດນາມ ແລະ ລັດຖະບານ ລາວ ໂດຍພາຍໃຕ້ການນຳພາຂອງ ປະທານ ໂຮ່ຈີມິນ ໃນການສົມທົບກັນເປີດບັ້ນຮົບພາກເໜືອ ລາວປີ 1953, ເພື່ອແນໃສ່ດັບສູນພາກສ່ວນໜຶ່ງທີ່ສຳຄັນຂອງສັດຕູ, ປົດປ່ອຍເຂດດິນແດນ, ກໍ່ສ້າງ ແລະ ເປີດກ້ວາງເຂດຖານທີ່ໝັ້ນ ແລະ ທັບມ້າງທ່າສະໜາມຍຸດທະສາດຂອງສັດຕູຢູ່ເຂດທາງທິດເໜືອ ອິນດູຈີນ.
ກອງປະຊຸມສຳມະນາໄດ້ຢືນຢັນວ່າ: 60 ປີຜ່ານມາ, ເຖິງວ່າສະພາບການໂລກມີການປ່ຽນແປງຫຼາຍຢ່າງກໍ່ຕາມ ແຕ່ໄຊຊະນະຂອງບັ້ນຮົບພາກເນືອ ລາວ ປີ 1953 ຍັງສາມາດຮັກສາຄຸນຄ່າ ແລະ ເປັນສັນຍາລັກແຫ່ງການພົວພັນແບບພິເສດ ຫວຽດນາມ - ລາວ ຕະຫຼອດການ. ບັນດາບົດຮຽນ, ຄວາມໝາຍປະຫວັດສາດສຳຄັນເຊິ່ງໄຊຊະນະດັ່ງກ່າວໄດ້ ນຳມາເຊິ່ງຄວນໄດ້ຮັບການສະຫລຸບ ແລະ ໝູນໃຊ້ຢ່າງມີຫົວຄິດປະດິດສ້າງໃນພາລະກິດສ້າງສາ ແລະ ປົກປັກຮັກສາປະເທດຊາດຂອງແຕ່ລະປະເທດ, ເພື່ອແນໃສ່ນຳການພົວພັນແບບພິເສດ ຫວຽດນາມ - ລາວ ໃຫ້ນັບມື້ນັບພັດທະນາ, ສົມກັບປະຫວັດສາດທີ່ສະຫງ່າອົງອາດຂອງ 2 ຊາດ.