(vovworld) - ວັນທີ 25 ຕຸລາ, ສິ້ນສຸດສັບປະດາເຮັດວຽກທຳອິດຂອງກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13, ສະພາແຫ່ງຊາດໄດ້ສະຫງວນເວລາຕອນເຊົ້າເພື່ອປຶກສາຫາລືຢູ່ໜ່ວຍ ກ່ຽວກັບສະພາບການປະຕິບັດແຜນງົບປະມານແຫ່ງລັດປີ 2013, ແຜນງົບປະມານແຫ່ງລັດ ແລະ ວິທີການຈັດແບ່ງງົບປະມານສູນກາງປີ 2014; ສະຫຼຸບ 3 ປີແຫ່ງການປະຕິບັດໂຄງການຈຸດໝາຍແຫ່ງຊາດໄລຍະ 2011 – 2015; ວິທີການຈຳໜ່າຍພັນທະບັດລັດຖະບານໄລຍະ 2014 – 2016. ບັນດາຜູ້ແທນສະແດງຄວາມເຫັນດີສູງຕໍ່ມາດຕະການຈຳໜ່າຍພັນທະບັດລັດຖະບານໄລຍະ 2014 – 2016 ດ້ວຍຍອດຈຳນວນທຶນຈຳໜ່າຍແມ່ນ 170.000 ຕື້ດົງເພື່ອສະຫງວນໃຫ້ການລົງທຶນພັດທະນາພື້ນຖານເສດຖະກິດ, ກໍ່ສ້າງລະບົບພື້ນຖານໂຄງລ່າງ ແລະ ສືບຕໍ່ປະຕິບັດບັນດາໂຄງການຮີບດ່ວນທີ່ພວມໄດ້ຮັບການຜັນຂະຫຍາຍ.
ຕອນບ່າຍວັນດຽວກັນ, ສະພາແຫ່ງຊາດ ໄດ້ປຶກສາຫາລືຢູ່ຫໍປະຊຸມ ກ່ຽວກັບບາງເນື້ອໃນທີ່ຍັງມີຄວາມເຫັນແຕກຕາງກັນຂອງຮ່າງກົດໝາຍປັບປຸງ, ເພີ່ມເຕີ່ມບາງຂໍ້ມາດຕາຂອງກົດໝາຍວ່າດ້ວຍການປ້ອງກັນ ແລະ ດັບເພິງ.
ຕາມແຜນການເຮັດວຽກ ຄາດວ່າ, ວັນທີ 28 ຕຸລາ, ສະພາແຫ່ງຊາດເຮັດວຽກຢູ່ຫໍປະຊຸມ, ຮັບຟັງບົດລາຍງານກ່ຽວກັບວຽກງານປ້ອງກັນ ແລະ ຕ້ານການລະເມີດກົດໝາຍ ແລະ ອາດຊະຍາກຳ; ໝາກຜົນແຫ່ງການປະຕິບັດມະຕິເລກທີ 37/2012 ຂອງສະພາແຫ່ງຊາດ ກ່ຽວກັບການປ້ອງກັນ ແລະ ຕ້ານອາດຊະຍາກຳ; ຮັບຟັງໃບສະເໜີ ແລະ ບົດລາຍງານກວດກາຮ່າງກົດໝາຍວ່າດ້ວຍພາສີອາກອນ (ສະບັບປັບປຸງ); ຮ່າງກົດໝາຍວ່າດ້ວຍການເຂົ້າອອກເມືອງ, ການຢູ່ອາໄສຂອງຊາວຕ່າງປະເທດຢູ່ຫວຽດນາມ ແລະ ປຶກສາຫາລືກ່ຽວກັບບາງເນື້ອໃນທີ່ຍັງມີຄວາມເຫັນແຕກຕາງກັນຂອງກົດໝາຍວ່າດ້ວຍການຕ້ອນຮັບພົນລະເມືອງ.