( vovworld ) - ຕອນເຊົ້າວັນທີ 20/7, ຢູ່ຮ່າໂນ້ຍ, ໄດ້ດຳເນີນກອງປະຊຸມສຳມະນາແຫ່ງຊາດກ່ຽວກັບລັດຖະບານເອເລັກໂຕນິກ ຄັ້ງທີ 10 ດ້ວຍຫົວຂໍ້ວ່າ “ພັດທະນາ ລັດຖະບານເອເລັກໂຕນິກ; ກະຈາງແຈ້ງກວ່າ, ເພື່ອຮັບໃຊ້ ປະຊາຊົນໃຫ້ດີກວ່າ”. ບົດລາຍງານທີ່ກອງປະຊຸມສຳມະນາຊີ້ແຈ້ງວ່າ ປີ 2012 ສືບຕໍ່ເປັນຂີດໝາຍໃນການພັດທະນາການນຳໃຊ້ເຕັກໂນໂລຊີຂໍ້ມູນຂ່າວສານ ເຂົ້າໃນບັນດາການເຄື່ອນໄຫວບໍລິຫານ ກໍຄືກໍ່ສ້າງລັດຖະບານເອເລັກໂຕນິກຢູ່ຫວຽດນາມ. ລັດຖະບານຫວຽດນາມ ກໍໄດ້ຍົກອອກບັນດາຈຸດໝາຍໃຫ້ແກ່ໄລຍະ 2011 – 2015 ກ່ຽວກັບ ລັດຖະບານເອເລັກໂຕນິກ, ມຸ່ງໄປເຖິງການຮັບປະກັນພື້ນຖານໂຄງລ່າງເຕັກນິກ ເພື່ອຮັບໃຊ້ການນຳໃຊ້ເຕັກໂນໂລຊີໃນການເຄື່ອນໄຫວຂອງອົງການແຫ່ງລັດ ໃນຂອບເຂດທົ່ວປະເທດ. ກ່າວຄຳເຫັນທີ່ການສຳມະນາ, ທ່ານລັດຖະມົນຕີກະຊວງຖະແຫຼງຂ່າວ ແລະ ສື່ສານ Nguyen Bac Son ໄດ້ເນັ້ນໜັກວ່າ.
“ໃນວຽກງານຄຸ້ມຄອງບໍລິຫານແຫ່ງລັດ, ເຕັກໂນໂລຊີຂໍ້ມູນຂ່າວສານພວມກາຍເປັນໜຶ່ງໃນບັນດາເຄື່ອງມືທີ່ມີປະສິດທິຜົນ ຊ່ວຍໃຫ້ວຽກງານຊີ້ນຳບໍລິຫານຂອງລັດຖະບານດຳເນີນໄປຢ່າງວ່ອງໄວ ແລະ ສະດວກ, ປະກອບສ່ວນຍົກສູງປະສິດທິຜົນແຫ່ງການເຄື່ອນໄຫວຂອງກົງຈັກບໍລິຫານ ແລະ ຍົກສູງຄຸນນະພາບຮັບໃຊ້ປະຊາຊົນ ຊ່ວຍປະຢັດເວລາ ແລະ ຄ່າໃຊ້ຈ່າຍ, ຫຼຸດຜ່ອນລະບຽບການດ້ານບໍລິຫານ ແລະ ເພີ່ມທະວີຄວາມກະຈາງແຈ້ງ. ເພາະສະນັ້ນ, ເລື່ອງນຳໃຊ້ເຕັກໂນໂລຊີຂໍ້ມູນຂ່າວສານເຂົ້າໃນບັນດາການເຄື່ອນໄຫວ ຫຼື ພັດທະນາ ລັດຖະບານເອເລັກໂຕນິກ ພວມກາຍເປັນທ່າແຮງລວມຂອງຫວຽດນາມ ກໍຄືທົ່ວໂລກ.”