ທ່ານເລຂາທິການໃຫຍ່ ອາຊຽນ ເລເລືອງມິນ
(ພາບປະກອບ)
(vovworld) - ທ່ານເລຂາທິການໃຫຍ່ ອາຊຽນ ເລເລືອງມິນ ໄດ້ເຂົ້າຮ່ວມບັນດາກອງປະຊຸມວົງແຄມ ລັດຖະມົນຕີການຕ່າງປະເທດ ອາຊຽນ, ກອງປະຊຸມສະພາປະຊາຄົມຄວາມໝັ້ນຄົງ - ການເມືອງ ອາຊຽນ ຄັ້ງທີ 9, ກອງປະຊຸມສະພາປະສານງານ ອາຊຽນ ຄັ້ງທີ 12 ເມື່ອວັນທີ 11/4, ຢູ່ນະຄອນຫຼວງ Banda Seri Begawan, ບຣູໄນດ ເພື່ອກະກຽມໃຫ້ກອງປະຊຸມສຸດຍອດ ອາຊຽນ ຄັ້ງທີ 22 ຈະດຳເນີນໃນວັນທີ 24 – 25/4 ຈະມາເຖິງ. ໃນບົດກ່າວປາໄສທີ່ກອງປະຊຸມ, ທ່ານເລຂາທິການໃຫຍ່ ເລເລືອງມິນ ເນັ້ນໜັກວ່າ: ໃນປີນີ້, ຄາດວ່າ, ບັນດາພື້ນຖານເສດຖະກິດ ອາຊຽນ ຈະບັນລຸລະດັບເຕີບໂຕ 5,5%, ສູງກ່ວາເມື່ອທຽບໃສ່ລະດັບ 5,3% ຂອງປີ 2012. ບົນພື້ນຖານນີ້, ອາຊຽນ ຄວນພິຈາລະນາບັນດາຜົນງານ ແລະ ໜ້າທີ່ຂອງຕົນ ເພື່ອເພີ່ມທະວີຄວາມມານະພະຍາຍາມ, ຄວາມຄືບໜ້າ ແລະ ປະສິດທິຜົນຂອງການປະຕິບັດ ເພື່ອສ້າງສຳເລັດຈຸດໝາຍອັນໃຫຍ່ຫຼວງແມ່ນສ້າງປະຊາຄົມ ອາຊຽນ ໃຫ້ຖືກກັບກຳນົດເວລາໃນວັນທີ 31/12/2015. ທ່ານເລຂາທິການໃຫຍ່ ເລເລືອງມິນ ຊີ້ແຈງວ່າ: ໃນຂົງເຂດສ້າງປະຊາຄົມການເມືອງ - ຄວາມໝັ້ນຄົງ ອາຊຽນ (ຫຼື APSC), ສັນຍາໄມຕີຈິດ ແລະ ການຮ່ວມມືຢູ່ ອາຊີ ຕາເວັນອອກສ່ຽງໃຕ້ (ຫຼື TAC) ໄດ້ດຶງດູດການເຂົ້າຮ່ວມຂອງ ບຣາຊິນ, ອັງກິດ ແລະ ສະຫະພາບ ເອີລົບ (ຫຼື EU) ໃນປີ 2012. ຮອດເດືອນ 1/2013 ສະມາຊິກທັງໝົດຂອງ ອາຊຽນ ໄດ້ໃຫ້ສັດຕະຍາບັນສົນທິສັນຍາຕ້ານກໍ່ການຮ້າຍ (ຫຼື ACCT) ແລະ ພວມສືບຕໍ່ບັນດາຄວາມມານະພະຍາຍາມໃຂຂອບເຂດແຜນການເຄື່ອນໄຫວຮອບດ້ານ ອາຊຽນ ຕ້ານກໍ່ການຮ້າຍ (ຫຼື ACPoA on CT).
ທ່ານເລຂາທິການໃຫຍ່ ເນັ້ນໜັກວ່າ: ອາຊຽນ ພວມຕັ້ງໜ້າພິຈາລະນາບັນດາບັນຫາເຂົ້າເປັນພາຄີກຸ່ມຂອງ Timor Leste, ເປີດກ້ວາງການພົວພັນຄູ່ຮ່ວມມືຍຸດທະສາດກັບບັນດາຄູ່ເຈລະຈາອື່ນໆ, ຊຸກຍູ້ການແກ້ໄຂບັນດາການປະທະກັນ, ການພິພາດຢູ່ບາງປະເທດ ສະມາຊິກ ແລະ ລະຫວ່າງບັນດາປະເທດສະມາຊິກໂດຍສັນຕິ, ໃນນັ້ນພິເສດແມ່ນຊຸກຍູ້ການເຈລະຈາ, ແກ້ໄຂບັນຫາພິພາດບົນທະເລຕາເວັນອອກ ໂດຍສັນຕິ, ເພື່ອແນໃສ່ຮັກສາສັນຕິພາບ ແລະ ຄວາມໝັ້ນຄົງຢູ່ພາກພື້ນບົນພື້ນຖານຂໍ້ຕົກລົງກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (ຫຼື DOC), ມຸ້ງໄປເຖິງການສ້າງຕັ້ງຂໍ້ກຳນົດການປະພຶດບົນທະເລຕາເວັນອອກ (ຫຼື COC).
ກ່ຽວກັບແງ່ຫວັງ ແລະ ເສັ້ນທາງພັດທະນາຂອງ ອາຊຽນ ໃນ 5 ປີຈະມາເຖິງ, ທ່ານເລຂາທິການໃຫຍ່ ເລເລືອງມິນ ຖືວ່າ: ເພື່ອໃຫ້ ອາຊຽນ ສືບຕໍ່ແມ່ນເວທີປາໄສໃຫ້ການເຈລະຈາສັນຕິພາບ ແລະ ການຮ່ວມມືລະຫວ່າງບັນດາປະເທດສະມາຊິກ ແລະ ສ່ວນຍັງເຫຼືອຂອງປະຊາຄົມສາກົນ, ບັນດາປະເທດສະມາຊິກຄວນສືບຕໍ່ມານະພະຍາຍາມຮ່ວມສຳພັນ ແລະ ເຊື່ອມໂຍງ ເພື່ອໃຫ້ ອາຊຽນ ກາຍເປັນກຸ່ມກ້ອນເສດຖະກິດເຂັ້ມແຂງ, ເຊື່ອມໂຍງ ເຂົ້າກັບພື້ນຖານເສດຖະກິດທົ່ວໂລກ.