ທ່ານຫງວຽນຊິງຮຸ່ງ ພົບປະເຈລະຈາກັບທ່ານDimitri Medvedev
(ພາບ::phungquangthanh.net)
(vovworld) - ຕອນຄ່ຳວັນທີ 11/3, ທ່ານປະທານສະພາແຫ່ງຊາດຫງວຽນຊິງຮຸ່ງ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີສະຫະພັນລັດເຊຍ Dimitri Medvedev ແລະ ພົບປະກັບປະທານສະພາຕ່ຳ Sergei Naryshkin.
ທີ່ການພົບປະກັບທ່ານນາຍົກລັດຖະມົນຕີສະຫະພັນລັດເຊຍ Dimitri Medvedev, ທ່ານປະທານສະພາແຫ່ງຊາດຫງວຽນຊິງຮຸ່ງ ຢືນຢັນວ່າ: ຍາມໃດ, ສະພາແຫ່ງຊາດຫວຽດນາມ ກໍ່ເຮັດຈົນສຸດຄວາມສາມາດຂອງຕົນເພື່ອປົກປັກຮັກສາ ແລະ ພັດທະນາການພົວພັນມິດຕະພາບ, ຄູ່ຮ່ວມມືຍຸດທະສາດຮອບດ້ານກັບສະຫະພັນລັດເຊຍ ກ່ວາອີກ. ສ່ວນທ່ານນາຍົກລັດຖະມົນຕີສະຫະພັນລັດເຊຍ Dimitri Medvedev ຖືວ່າ: ການຢ້ຽມຢາມຂອງທ່ານປະທານສະພາແຫ່ງຊາດຫງວຽນຊິງຮຸ່ງ ມີຄວາມໝາຍສຳຄັນ, ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນມິດຕະພາບ, ການຮ່ວມມືລະຫວ່າງລັດຖະສະພາ ແລະ ປະຊາຊົນສອງປະເທດ.
ທີ່ການພົບປະກັບທ່ານປະທານສະພາຕ່ຳ Sergei Naryshkin, ທ່ານປະທານສະພາແຫ່ງຊາດຫງວຽນຊິງຮຸ່ງ ສະແດງຄວາມພາກພູມໃຈຕໍ່ເລື່ອງເຊັນຂໍ້ຕົກລົງຮ່ວມມືລະຫວ່າງສະພາແຫ່ງຊາດຫວຽດນາມ ແລະ ສະພາຕ່ຳລັດເຊຍ, ອັນໄດ້ສ້າງພື້ນຖານນິຕິກຳໃຫ້ແກ່ການເພີ່ມທະວີການຮ່ວມມືສອງຝ່າຍ, ແລກປ່ຽນບົດຮຽນດ້ານນິຕິບັດຍັດ, ຕິດຕາມກວດກາ ແລະ ການເຄື່ອນໄຫວຂອງອົງການນິຕິບັນຍັດສອງປະເທດ. ທ່ານປະທານສະພາແຫ່ງຊາດຫງວຽນຊິງຮຸ່ງ ເນັ້ນໜັກວ່າ:
“ຂ້າພະເຈົ້າໄປຢ້ຽມຢາມປະເທດລັດເຊຍ ດ້ວຍອາລົມຈິດຄວາມຮັກແພງທີ່ເລິກເຊິ່ງທີ່ສຸດ, ດ້ວຍນ້ຳໃຈມິດຕະພາບອັນເປັນມູນເຊື້ອລະຫວ່າງສອງປະເທດ ແລະ ການຮ່ວມມືທີ່ນັບມື້ນັບໄດ້ຮັບການພັດທະນາຂອງສອງປະເທດ. ຫວຽດນາມ ແລະ ສະຫະພັນລັດເຊຍ ໄດ້ກາຍເປັນຄູ່ຮ່ວມມືຍຸດທະສາດ ແລະ ການຮ່ວມມືຮອບດ້ານ. ພວກຂ້າເຈົ້າມີຄວາມພາກພູມໃຈທີ່ສຸດຍ້ອນວ່າລັດເຊຍ ແມ່ນຄູ່ຮ່ວມມືທີ່ໜ້າໄວ້ເນື້ອເຊື່ອໃຈທີ່ສຸດຂອງຫວຽດນາມ“
ທ່ານປະທານສະພາຕ່ຳ Sergei Naryshkin ຢືນຢັນວ່າ: ຍາມໃດ, ສະພາຕ່ຳລັດເຊຍ ກໍ່ໃຫ້ບຸລິມະສິດ, ຍູ້ແຮງການພົວພັນຮ່ວມມືກັບຫວຽດນາມ ໃນທຸກຂົງເຂດ, ເໝາະສົມກັບການພົວພັນຄູ່ຮ່ວມມືຍຸດທະສາດຮອບດ້ານຊື່ງສອງປະເທດໄດ້ສ້າງຂຶ້ນ:
“ຫວຽດນາມ ແມ່ນຄູ່ຮ່ວມມືທີ່ໜ້າໄວ້ເນື້ອເຊື່ອໃຈຂອງສະຫະພັນລັດເຊຍ, ສອງປະເທດໄດ້ຍົກເປັນການພົວພັນຄູ່ຮ່ວມມືຍຸດທະສາດຮອບດ້ານ. ສະພາຕ່ຳລັດເຊຍ ເຫັນດີເປັນເອກະສັນຕ້ອງພັດທະນາ ແລະ ເປີດກ້ວາງການພົວພັນຮ່ວມມືກັບຫວຽດນາມ ໃນ ທຸກຂົງເຂດ: ເສດຖະກິດ-ການເມືອງ-ສັງຄົມ… ຂ້າພະເຈົ້າຫວັງວ່າ: ຂໍ້ຕົກລົງການຮ່ວມມືລະຫວ່າງສະພາແຫ່ງຊາດສອງປະເທດ ຈະປະກອບສ່ວນປັບປຸງ ແລະ ເພີ່ມທະວີການສົມທົບກັນເຄື່ອນໄຫວລະຫວ່າງສອງສະພາແຫ່ງຊາດເວົ້າສະເພາະກໍ່ຄືການພົວພັນລະຫວ່າງສອງປະເທດເວົ້າລວມ“.