ຄະນະຊີ້ນຳສູນກາງກ່ຽວກັບການປ້ອງກັນ,
ຕ້ານການສໍ້ລາດບັງຫຼວງ ດຳເນີນວາລະປະຊຸມທີ 5
(vovworld) - ວັນທີ 9/7 ຢູ່ຮ່າໂນ້ຍ, ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງ ໄດ້ຈັດວາລະປະຊຸມທີ 5. ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ຫົວໜ້າຄະນະຊີ້ນຳ, ເປັນເຈົ້າພາບ ແລະ ສະຫຼຸບວາລະປະຊຸມ. ໃນນັ້ນເນັ້ນໜັກບົດບາດໂດຍກົງ, ສຳຄັນ ແລະ ຕັດສິນຂອງຄະນະຊີ້ນຳສູນກາງໃນການເພີ່ມຜົນສັກສິດ, ປະສິດທິຜົນຂອງວຽກງານປ້ອງກັນ, ຕ້ານການສໍ້ລາດບັງຫຼວງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ, ໂດຍເສີມຂະຫຍາຍບັນດາໝາກຜົນຂອງປີ 2013, ໃນ 6 ເດືອນຕົ້ນປີ 2014, ວຽກງານປ້ອງກັນ ແລະ ຕ້ານການສໍ້ລາດບັງຫຼວງບັນລຸໄດ້ໝາກຜົນພົ້ນເດັ່ນພໍສົມຄວນ. ເມື່ອເຕື້ອງເຖິງໜ້າທີ່ 6 ເດືອນທ້າຍປີ 2014. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ, ຄວນສືບຕໍ່ກຳນົດ ແລະ ຊາບຊືມກ່ຽວກັບວຽກງານປ້ອງກັນ ແລະ ຕ້ານການສໍ້ລາດບັງຫຼວງໃນໄລຍະຈະມາເຖິງແມ່ນຍັງຄົງລຳບາກ, ສັບສົນ ແລະ ຫຍຸ້ງຍາກທີ່ສຸດ, ຍັງຄົງມີວຽກງານຫຼາຍຢ່າງທີ່ຈຳເປັນຕ້ອງເຮັດ.
“ພວກເຮົາຕ້ອງກຳນົດວຽກງານປ້ອງກັນ ແລະ ຕ້ານການສໍ້ລາດບັງຫຼວງ ແມ່ນວຽກງານເປັນປະຈຳ, ສຳຄັນທີ່ສຸດ, ແຕ່ກໍ່ຫຍຸ້ງຍາກ, ສັບສົນ, ດັ່ງນັ້ນຕ້ອງເດັດດ່ຽວ ແລະ ຍືດໝັ້ນໃນການປະຕິບັດ. ມາຮອດປະຈຸບັນເຫັນວ່າຄວາມຮັບຜິດຊອບຂອງພວກເຮົາໃນວຽກງານນີ້ແມ່ນໃຫຍ່ຫຼວງທີ່ສຸດ. ເຖິງວ່າບັນຫາ ປ້ອງກັນ ແລະ ຕ້ານການສໍ້ລາດບັງຫຼວງ ແມ່ນຄວາມຮັບຜິດຊອບຂອງທົ່ວພັກ, ທົ່ວປວງຊົນ, ທົ່ວລະບົບການເມືອງ, ແຕ່ ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງພວກເຮົາຕ້ອງມີຄວາມຮັບຜິດຊອບໂດຍກົງ“.
ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີໃຫ້ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງສືບຕໍ່ເອົາໃຈໃສ່, ເພີ່ມທະວີວຽກງານສ້າງລະບຽບກົດໝາຍ, ແກ້ໄຂບັນດາຊ່ອງຫວ່າງໃນກົດໝາຍ; ສືບຕໍ່ປ່ຽນໃໝ່ວິທີການເຄື່ອນໄຫວ ເພື່ອເພີ່ມທະວີການສົມທົບ, ຮັບປະກັນລັກສະນະແທດຈິງ, ມີປະສິດທິຜົນຕາມກົນໄກທີ່ໄດ້ກຳນົດ.