(vovworld) – ວັນຊາວໜຸ່ມສາກົນ (12/8) ປີນີ້, ສະຫະປະຊາຊາດໄດ້ສະເຫຼີມສະຫຼອງເພື່ອຮັບຮູ້ນ້ຳໃຈຜ່ານຜ່າຄວາມທຸກຍາກ, ລຳບາກໃນຊີວິດການເປັນຢູ່ ແລະ ວິວັດການຊອກຫາວຽກເຮັດງານທຳ, ກໍ່ຄືບັນດາການປະກອບສ່ວນຂອງຊາວໜຸ່ມອາໄສຢູ່ປະເທດຕ່າງໆເຂົ້າໃນການພັດທະນາເສດຖະກິດ, ສັງຄົມຂອງບັນດາປະເທດ, ບ່ອນທີ່ເຂົາເຈົ້າພວມຢູ່ອາໄສ. ເນື່ອງໃນເຫດການນີ້, ທ່ານເລຂາທິການໃຫຍ່ ສະຫະປະຊາຊາດ Ban Ki Moon ໄດ້ສົ່ງສານເຖິງກອງປະຊຸມສຳມະນາ “ຊາວໜຸ່ມອາໄສຢູ່ປະເທດຕ່າງໆ ແລະ ວິວັດການພັດທະນາ” ໂດຍຄະນະກຳມະການເສດຖະກິດ - ສັງຄົມຂອງສະຫະປະຊາຊາດສົມທົບກັບອົງການແຮງງານສາກົນ (ILO) ພ້ອມກັນຈັດຕັ້ງຢູ່ສຳນັກງານສະຫະປະຊາຊາດ ຢູ່ ນິວຢອກ, ແຫ່ງປະເທດ ອາເມລິກາ. ທ່ານ Ban Ki Moon ເນັ້ນໜັກພິເສດເຖິງບັນດາການປະກອບສ່ວນອັນໃຫຍ່ຫຼວງຂອງຊາວໜຸ່ມຢູ່ປະເທດຕ່າງໆທີ່ມີຕໍ່ວິວັດການພັດທະນາເສດຖະກິດ, ວັດທະນະທຳ, ສັງຄົມຂອງບັນດາປະເທດບ່ອນທີ່ບັນດາຊາວໜຸ່ມຜູ້ນີ້ອອກເດີນທາງ, ນັບທັງບ່ອນທີ່ເຂົາເຈົ້າຢູ່ອາໄສ ແລະ ບັນດາບ່ອນທີ່ເຂົາເຈົ້າຢູ່ອາໄສຊົ່ວຄາວ. ຕາມທ່ານແລ້ວ, ມີຫຼາຍຄົນໃນຈຳນວນເຂົາເຈົ້າ, ນອກຈາກເລື່ອງມີການປະກອບສ່ວນອັນໃຫຍ່ຫຼວງໃຫ້ແກ່ “ບ້ານເກີດເມືອງນອນແຫ່ງທີ 2”, ຍັງຄົງນຳບັນດາບົດຮຽນໃນການດຳລົງຊີວິດ, ບົດຮຽນໃນວຽກເຮັດງານທຳ ກໍ່ຄືແນວຄວາມຄິດ, ບັນດາຄວາມກ້າວໜ້າດ້ານວິທະຍາສາດ, ເຕັກນິກທີ່ສະສົມມາໄດ້ໃນໄລຍະຢູ່ຫ່າງຈາກບ້ານເກີດເມືອງນອນເພື່ອປະກອບສ່ວນກໍ່ສ້າງ ແລະ ພັດທະນາບ້ານເກີດເມືອງນອນ, ປະເທດຊາດ. ເນື່ອງໃນໂອກາດນີ້, ທ່ານເລຂາທິການໃຫຍ່ ສປຊ ຮຽກຮ້ອງໃຫ້ບັນດາປະເທດ ແລະ ທຸກໆປະຊາຄົມພ້ອມກັນເອົາໃຈໃສ່, ແບ່ງປັນກັບຊາວຕ່າງດ້າວ, ໃນນັ້ນມີບັນດາຊາວໜຸ່ມປະເທດຕ່າງໆ, ຊ່ວຍໃຫ້ເຂົາເຈົ້າມີການດຳລົງຊີວິດເປັນປົກກະຕິ ແລະ ພ້ອມກັນພັດທະນາ.